ក្រោយជំនួបជាមួយមន្រ្តីជាន់ខ្ពស់ក្រសួងមហាផ្ទៃ កាលពីព្រឹកថ្ងៃព្រហស្បតិ៍ អ្នកនាំពាក្យគណបក្សភ្លើងទៀន លោក គីម សួរភិរិទ្ធ លើកឡើងថាក្រសួងមហាផ្ទៃនៅតែមិនអាចផ្តល់ឯកសារដើមឬនីត្យានុកូលកម្មដល់គណបក្សភ្លើងទៀន ដើម្បីគណបក្សអាចបង្ហាញទៅស្ថាប័នរៀបចំការបោះឆ្នោតសម្រាប់ចូលរួមការបោះឆ្នោតពេលក្រោយទៀត។
បើតាមអ្នកនាំពាក្យរូបនេះ មន្រ្តីក្រសួងមហាផ្ទៃបានលើកហេតុផលថាការមិនអាចចេញឯកសារដើមជាទុតិយតាបាន ដោយសារតែរនាំងផ្លូវច្បាប់។
ហេតុផលនេះត្រូវបានលោក គីម សួរភិរិទ្ធ ចាត់ទុកករណីនេះពាក់ព័ន្ធនឹងរឿងនយោបាយ។
លោកប្រាប់វីអូអេក្រោយបញ្ចប់កិច្ចប្រជុំថា៖ «ក្រសួងប្រាប់យើងថាគាត់អស់សមត្ថភាពបច្ចេកទេសតែប៉ុណ្ណឹងហើយ អ៊ីចឹងបើដោះស្រាយមិនចេញ មានតែរឿងនយោបាយហើយ។ អត់ចាំបាច់និយាយអីច្រើនទៀតទេ តែបច្ចេកទេស អ្នកទទួលការងារបច្ចេកទេសថាគាត់អស់សមត្ថភាពធ្វើបានត្រឹមប៉ុណ្ណឹងហើយ។អាហ្នឹងផុតបច្ចេកទេស មានតែរឿងនយោបាយ»។
នៅពេលសួរថាតើគណបក្សភ្លើងទៀននឹងធ្វើយ៉ាងណាបន្តទៀត លោក គីម សួរភិរិទ្ធ ថ្លែងថាគណបក្សនឹងរិះរកមធ្យោបាយផ្សេង ដើម្បីធានាថាខ្លួនអាចចូលរួមការបោះឆ្នោតលើកក្រោយបាន។
រដ្ឋលេខាធិការក្រសួងមហាផ្ទៃ លោក ប៊ុន ហុន ដែលបានជួបជាមួយមន្រ្តីគណបក្សភ្លើងទៀន ប្រាប់វីអូអេថានៅក្នុងបញ្ញត្តិច្បាប់មិនមានចែងអនុញ្ញាតឱ្យក្រសួងមហាផ្ទៃចេញច្បាប់ដើមឡើងវិញដល់គណបក្សនយោបាយឡើយ។
លោកបញ្ជាក់ថា៖ «អ៊ីចឹងចម្លើយមានប៉ុណ្ណឹង ដោយសារយើងដែលសិក្សាផ្លូវច្បាប់ វាអត់មានផ្លូវអីផ្សេងហ្នឹងទៀតទេ»។
ឆ្លើយតបទៅនឹងការលើកឡើងថាជារឿងនយោបាយ លោក ប៊ុន ហុន ថាវាជារឿងរបស់គណបក្សភ្លើងទៀន។
គណបក្សភ្លើងទៀនដែលជាគណបក្សជំទាស់ធំមួយក្នុងប្រទេសកម្ពុជាត្រូវបានស្ថាប័នជាតិរៀបចំការបោះឆ្នោតផាត់ចេញពីការបោះឆ្នោតជាតិកាលពីខែកក្កដាកន្លងទៅ ដោយសារគ្មានឯកសារដើមបញ្ជាក់ពីការចុះបញ្ជីគណបក្សនៅក្រសួងមហាផ្ទៃសម្រាប់ចូលរួមប្រកួតប្រជែងការបោះឆ្នោត។
គណបក្សភ្លើងទៀនតែងតែបញ្ជាក់ថាឯកសារដើមប្រកាសលេខ១៩៣ ដែលជាឯកសារចុះបញ្ជីគណបក្សនយោបាយនៅក្រសួងមហាផ្ទៃ តាំងពីឆ្នាំ១៩៩៨ គឺបានបាត់នៅអំឡុងឆ្នាំ២០១៧ នៅពេលដែលស្នាក់ការគណបក្សសង្គ្រោះជាតិ ត្រូវបានតុលាការរំលាយ ហើយពេលនោះ សាលាដំបូងរាជធានីភ្នំពេញ និងសាលាឧទ្ធរណ៍មិនអនុញ្ញាតឱ្យមន្ត្រីគណបក្សភ្លើងទៀន ចូលទៅយកឯកសារអ្វីទាំងអស់។
គណបក្សជំទាស់មួយនេះអះអាងថាគណបក្សបានដាក់លិខិតទៅក្រសួងមហាផ្ទៃជាច្រើនលើកច្រើនសា ដើម្បីសុំច្បាប់ដើម ឬសេចក្តីចម្លង ដែលមានបញ្ជាក់នីត្យានុកូលកម្ម នៃប្រកាសលេខ១៩៣នោះ ចាប់តាំងពីថ្ងៃទី៣ ខែមេសា ឆ្នាំ២០២៣ ប៉ុន្តែគណបក្សមិនទទួលបានលិខិតបញ្ជាក់ឡើយ ទើបជាហេតុធ្វើឱ្យគណបក្សបាត់បង់ឱកាសចូលរួមការបោះឆ្នោតថ្នាក់ជាតិកាលពីខែកក្កដា៕
