នាយករដ្ឋមន្ត្រីកម្ពុជានៅថ្ងៃច័ន្ទនេះបានទាមទារឲ្យប្រទេសម៉ាឡេស៊ីបកស្រាយនិងទទួលខុសត្រូវចំពោះការ«ខាតបង់កិត្តិយស»ដែលកើតឡើងដោយសារប្រទេសនេះបានរកឃើញភ្ញៀវទេសចរលើនាវា Westerdam ម្នាក់ដែលធ្វើដំណើរពីកម្ពុជាទៅកាន់ប្រទេសម៉ាឡេស៊ីមានផ្ទុកវីរុសកូរ៉ូណា Covid-19។
លោក ហ៊ុន សែន នាយករដ្ឋមន្ត្រីនៃប្រទេសកម្ពុជាបានរៀបចំកិច្ចប្រជុំមួយកាលពីព្រឹកថ្ងៃច័ន្ទនេះនៅវិមានសន្តិភាព រាជធានីភ្នំពេញ ជាមួយនឹងរដ្ឋមន្ត្រីជាន់ខ្ពស់នៅកម្ពុជាផ្សេងៗទៀត ទាក់ទិននឹងស្ថានភាពថ្មីៗចុងក្រោយ ដែលមានរយៈពេលជិតប្រាំម៉ោង។
នៅក្នុងការថ្លែងដែលមានរយៈពេលវែងខុសពីធម្មតានិងបានផ្សាយផ្ទាល់នៅគណនីហ្វេសប៊ុករបស់លោកលោក ហ៊ុន សែន បានទាមទារឲ្យប្រទេសម៉ាឡេស៊ីទទួលខុសត្រូវ បន្ទាប់ពីប្រទេសនេះបានប្រកាសថារកឃើញថា មានអ្នកជំងឺឆ្លងវីរុសCovid-19 វ័យ៨៣ឆ្នាំម្នាក់ដែលចុះពីនាវាកម្សាន្ត Westerdam ហើយធ្វើដំណើរទៅកាន់ប្រទេសម៉ាឡេស៊ីកាលពីថ្ងៃទី១៥ ខែកុម្ភៈ ឆ្នាំ២០២០។
លោកបានថ្លែងថា៖ «បញ្ហានេះបានដាក់បន្ទុកឲ្យយើងនៅការខាតបង់កិត្តិយសនិងសេចក្តីថ្លៃថ្នូររបស់ជាតិរបស់យើង។ អ្នកខ្លះគិតថា រឿងនេះជារឿងស្រាល ប៉ុន្តែពលរដ្ឋកម្ពុជារបស់យើងមិនគិតរឿងនេះជារឿងស្រាលទេ»។
យោងតាមសេចក្តីប្រកាសព័ត៌មានរបស់អគ្គនាយកនៃសុខភាពម៉ាឡេស៊ី ស្ត្រីជនជាតិអាមេរិកាំងអាយុ៨៣ឆ្នាំនោះត្រូវបានធ្វើតេស្ត Covid-19 វិជ្ជមានពីរដង តាមការស្នើពីភាគីកម្ពុជា ហើយត្រូវបានបញ្ជូនទៅព្យាបាលនៅមន្ទីរពេទ្យ Sungai Buloh។ ប៉ុន្តែស្ថានភាពស្ត្រីជនជាតិអាមេរិកាំងវ័យចំណាស់រូបនេះប្រសើរឡើងវិញក្នុងរយៈពេល៧២ម៉ោងដោយបង្ហាញលទ្ធផលតេស្តCovid-19 អវិជ្ជមាន។
រដ្ឋាភិបាលកម្ពុជាថា លទ្ធផលពិនិត្យនោះបង្ហាញពី«ភាពមិនប្រក្រតី» ហើយវាបានបង្កឲ្យមានភាព«ភ័ន្តច្រឡំនិងភ័យខ្លាច» និង«ការរើងអើង» ចំពោះអ្នកដំណើរនាវា Westerdam ទាំងអស់ នេះបើយោងតាមសេចក្តីប្រកាសព័ត៌មាន ក្រសួងសុខាភិបាលកម្ពុជា។
ក្រោយពីប្រទេសម៉ាឡេស៊ីបានរកឃើញថា មានអ្នកដំណើរនៃនាវា Westerdam មានផ្ទុកវីរុស Covid-19មក ប្រទេសក្នុងអាស៊ីមួយចំនួនដូចជាថៃ សិង្ហបុរី និងម៉ាឡេស៊ី ផងនោះបានមិនអនុញ្ញាតឲ្យអ្នកដំណើរនៃនាវា Westerdam ធ្វើការផ្លាស់ប្តូរជើងហោះហើរនៅក្នុងប្រទេសខ្លួនឡើយ។
ប្រមុខរដ្ឋាភិបាលកម្ពុជាលោក ហ៊ុន សែនថា លោកអាណិតភ្ញៀវទេសចរនាវា Westerdam ដែលមិនអាចចេញដំណើរទៅកាន់ប្រទេសកំណើតរបស់ខ្លួនបានភ្លាមៗ បន្ទាប់ពីមានការប្រកាសរបស់ប្រទេសម៉ាឡេស៊ីនោះ។
លោកបានថ្លែងថា៖ «ហើយធ្ងន់ធ្ងរជាងហ្នឹងទៀតដោយសារតែម៉ាឡេស៊ីប្រកាស អ្នកដែលនៅលើកប៉ាល់ត្រូវបន្តនៅ ២៤០នាក់ជាង ដែលគួរឲ្យអាណិត គួរឲ្យអាណិត ដោយសារអី? ដោយសារម៉ាឡេស៊ីប្រកាស»។
លោកបន្ថែមថា៖«ម៉ាឡេស៊ីត្រូវទទួលខុសត្រូវនូវវិបត្តិមនុស្សធម៌មួយនេះ។ ហើយនិងកិត្តិយសរបស់កម្ពុជា»។
លោក ហ៊ុន សែន ក៏បានស្នើឲ្យរដ្ឋមន្ត្រីនៃក្រសួងការបរទេសលោក ប្រាក់ សុខុន ជួបជាមួយនឹងឯកអគ្គរដ្ឋទូតម៉ាឡេស៊ីប្រចាំនៅកម្ពុជាដើម្បី«បំភ្លឺ»លើករណីនេះផងដែរ។ ជាងនេះទៅទៀត លោក ហ៊ុន សែន បានបដិសេធនឹងការរិះគន់ដែលថា ការដែលកម្ពុជាអនុញ្ញាតឲ្យនាវាកម្សាន្តខ្នាតធំ Westerdam ចូលចតដើម្បីហេតុផលនយោបាយ។
លោក ហ៊ុន សែន និយាយថា៖ «ខ្ញុំអត់មានត្រូវការប្រើប្រាស់មធ្យោបាយមនុស្សធម៌ ដើម្បីតម្រូវចិត្តដើម្បីទិញចិត្តអ្វីម្យ៉ាងនោះទេ។ ប៉ុន្តែបើគេមើលឃើញថា អាហ្នឹងវាល្អគេផ្តល់ការគាំទ្រ អាហ្នឹងជាហេតុផលសមរម្យរបស់គេ»។
វីអូអេបានទូរស័ព្ទនិងផ្ញើសារអេឡិចត្រូនិកឬអ៊ីម៉ែលទៅកាន់ស្ថានទូតម៉ាឡេស៊ីប្រចាំនៅកម្ពុជាដើម្បីសុំការបកស្រាយប៉ុន្តែ មិនទាន់ការឆ្លើយតបនោះទេ។
កម្ពុជាបានបន្តធ្វើតេស្តភ្ញៀវទេសចរដែលនៅសេសសល់និងនាវិកជាង១៥០០នាក់ដោយលទ្ធផលបង្ហាញថា មិនមានអ្នកណាផ្ទុកមេរោគនេះឡើយ។ យោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា ចេញផ្សាយកាលពីថ្ងៃសុក្រសប្តាហ៍មុន។ នាវាកម្សាន្តខ្នាតធំ Westerdam បានចាកចេញពីកំពង់ផែខេត្តព្រះសីហនុកាលពីចុងសប្តាហ៍មុនហើយ៕
