លោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានជំរុញឱ្យអភិបាលខេត្តទាំងអស់ យកគំរូតាមអភិបាលខេត្តកំពត លោក ម៉ៅ ធនិន ដែលត្រូវជាក្មួយប្រសារបស់លោក ក្នុងការដោះស្រាយបញ្ហាដីធ្លីជូនប្រជាពលរដ្ឋ។
លោកថ្លែងបែបនេះនៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរខ្សែគឺផ្លូវជាតិលេខ ៣១ និងលេខ ៣៣ ស្ថិតក្នុងភូមិសាស្ត្រខេត្តកំពត និងខេត្តកែប។
លោកនាយករដ្ឋមន្ត្រី ហ៊ុន សែន ថ្លែងថា បើអភិបាលខេត្តផ្សេងៗធ្វើបានត្រឹមអភិបាលខេត្តកំពត លោក ម៉ៅ ធនិន ដែលតែងតែដោះស្រាយបញ្ហាដីធ្លីរបស់ប្រជាពលរដ្ឋនៅក្រៅប្រព័ន្ធតុលាការ នោះបញ្ហាដីធ្លីនេះនឹងអាចដោះស្រាយបានល្អប្រសើរ។
លោកថ្លែងថា៖ «បើសិនជាអភិបាលខេត្តគ្រប់ខេត្តធ្វើត្រឹមតែបានប៉ុន ម៉ៅ ធនិន ធ្វើនៅពោធិ៍សាត់ ហើយបន្តមកធ្វើនៅកំពត ខ្ញុំគិតថា ជម្លោះដីធ្លីនេះវានឹងស្ងប់ឯង ព្រោះវាអត់មានអីច្រើនទេ»។
លោក ម៉ៅ ធនិន បច្ចុប្បន្នជាអភិបាលខេត្តកំពត ដោយលោកបានផ្លាស់មកពីខេត្តពោធិ៍សាត់ ហើយត្រូវបានប្រជាពរដ្ឋស្គាល់លោកតាមរយៈការដោះស្រាយបញ្ហាដីធ្លីប្រជាពលរដ្ឋនៅតាមវេទិកាសាធារណៈ ដែលភាគច្រើនចែកចាយលើបណ្តាញសង្គមហ្វេសប៊ុក។
អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត កត់សម្គាល់ថា ការដោះស្រាយបញ្ហាដីធ្លីរបស់លោក ម៉ៅ ធនិន នៅពេលលោកកាន់តួនាទីជាអភិបាលខេត្តពោធិ៍សាត់ក្តី និងមកខេត្តកំពតនេះក្តី គឺភាគច្រើនលោកដោះស្រាយបាននូវបញ្ហាជាលក្ខណៈគ្រួសារ។ ប៉ុន្តែប្រសិនជាបញ្ហាដីធ្លីរបស់ប្រជាពលរដ្ឋជាមួយក្រុមហ៊ុនរបស់អ្នកមានអំណាច ឬរបស់ឧកញ៉ា គឺលោក ម៉ៅ ធនិន មិនទាន់អាចដោះស្រាយបានល្អប្រសើរនៅឡើយទេ៕
