ក្រុមអង្គការសិទ្ធិមនុស្សបានធ្វើសន្និសីទបដិសេធការចោទប្រកាន់របស់នាង ខុម ចាន់តារ៉ាទី ដែលថា ចម្លើយរបស់នាងប្រាប់អង្គការសិទ្ធិមនុស្សអាដហុកនោះ គឺធ្វើតាមការណែនាំរបស់បុគ្គលិកអង្គការសិទ្ធិមនុស្សនេះ។ សន្និសីទនេះធ្វើឡើងក្រោយពេលអង្គភាពប្រឆាំងអំពើពុករលួយកោះហៅបុគ្គលិក៥នាក់របស់អង្គការអាដហុក។
នៅក្នុងសន្និសីទព័ត៌មាននៅថ្ងៃអង្គារនេះ មន្ត្រីសិទ្ធិមនុស្សបាននិយាយថា កិច្ចប្រឹងប្រែងរបស់ខ្លួនក្នុងការជួយនាង ខុម ចាន់តារ៉ាទី ហៅ ស្រីមុំ នោះ គឺធ្វើត្រឹមត្រូវតាមអាណត្តិបេសកកម្មរបស់ខ្លួន។ អង្គការសិទ្ធិមានការភ្ញាក់ផ្អើល និងមានចម្ងល់ចំពោះការណ៍ដែលអង្គភាពប្រឆាំងអំពើពុករលួយចេញលិខិត កាលពីថ្ងៃច័ន្ទ កោះហៅមន្ត្រីសិទ្ធិមនុស្សដែលមិនមានតំណែង និងអំណាចអាចប្រព្រឹត្តអំពើពុករលួយបាននោះ។
លោក ធន សារាយ ប្រធានអង្គការសិទ្ធិមនុស្សអាដហុក បានប្រាប់អ្នកយកព័ត៌មានថា អង្គការរបស់លោកបានផ្តល់ប្រាក់តិចតួចជួយនាង ខុម ចាន់តារ៉ាទី ដូចជនក្រីក្រដទៃទៀតដែរ ដោយសារនាងខ្វះខាត។
លោក ធន សារាយ បញ្ជាក់ថា៖ «អញ្ចឹងហើយបានជាយើងនាំគ្នាឆ្ងល់ថា ហេតុអីបានជាករណីនេះ បែរទៅជាអង្គភាពប្រឆាំងអំពើពុករលួយកោះអញ្ជើញបុគ្គលិកយើងខ្ញុំ ទៅសាកសួរពីរឿងហ្នឹង ពីព្រោះថា តាមខ្ញុំបានដឹង ល្ងង់ខ្លៅ គឺអង្គភាពប្រឆាំងពុករលួយ គឺគាត់គួរតែអង្កេតអំពើពុករលួយលួចប្រាក់ជាតិ លួចអីទេ! ឯចំណែករឿងនេះ គឺយើងអត់បានប្រព្រឹត្តអំពើពុករលួយអីសោះ! ហេតុអីបានជារឿងនេះវាទៅជាអញ្ចឹង? យើងមានការឆ្ងល់តែប៉ុណ្ណឹងទេ។ គ្រាន់តែសុំបើកវង់ក្រចកបន្តិច»។
ទោះជាយ៉ាងណាក្តីលោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រាប់ VOA ថា អង្គភាពរបស់លោកកោះហៅបុគ្គលិកសិទ្ធិមនុស្សទាំងនេះដើម្បីសាកសួររកការណ៍ពិត។
លោក ឱម យ៉ិនទៀង ថ្លែងប្រាប់ VOA ថា៖ «គាត់មិនទាន់ត្រូវបានកំណត់ជាអីទេ។ គាត់អាចជាសាក្សី។ ពាក់ព័ន្ធរឿងអីៗ សូមកុំទាន់គិតខ្លួនឯងដោយរបៀបអញ្ចឹងណា៎។ សូមរួមចំណែក»។
លោក ឱម យ៉ិនទៀង បានបន្តថា អង្គភាពរបស់លោកចាត់វិធានការប្រឆាំងអំពើពុករលួយ មិនថា អំពើពុករលួយនោះទ្រង់ទ្រាយធំ ឬតូចទេ ព្រោះរឿងនេះពាក់ព័ន្ធនឹងវាសនារបស់មនុស្ស។
លោក ធន សារាយ ប្រធានអង្គការសិទ្ធិមនុស្សអាដហុក បានប្រាប់អ្នកយកព័ត៌មានក្នុងសន្និសីទនៅទីស្នាក់ការគណៈកម្មាធិការប្រព្រឹត្តិកម្មនៃអង្គការសមាគមសិទ្ធិមនុស្សកម្ពុជា(CHRAC) នៅថ្ងៃអង្គារនេះថា មន្ត្រីរបស់លោកធ្វើការតាមការណ៍ពិតពីដំបូង ដែលនាង ខុម ចាន់តារ៉ាទី ប្រាប់ពួកគេ ដោយមិនមានការបញ្ចេះណែនាំ ខុសពីអាណត្តិបេសកកម្មរបស់ខ្លួនទេ។
លោក ធន សារាយ ថ្លែងថា៖ «ក្នុងនាមយើងជាសិទ្ធិមនុស្ស របៀបធ្វើការរបស់យើង វិធីសាស្ត្រធ្វើការរបស់យើង គឺយើងផ្តល់ប្រឹក្សាច្បាប់ទៅតាមអ្វីដែលនាងបានប្រាប់យើង។ យើងមិនអាចទៅនិយាយខុសពីអ្វីដែលនាងបានប្រាប់យើងទេ។ យើងគ្រាន់តែថា ធ្វើម៉េចឲ្យនាងនិយាយអ្វីដែលខ្លួនបាននិយាយប្រាប់យើងពីដំបូងមកឲ្យបានហូរហែអញ្ចឹងតទៅទៀត។ ដូច្នេះការផ្តល់មតិយោបល់របស់យើងនេះ មានរឿងអីដែលទៅ(ឃាត់)ឃាំង ទៅណែនាំឲ្យគាត់និយាយរឿងអីខុសពីការណ៍ពិត ដែលគាត់បានប្រាប់យើងទេ។ ដល់ពេលគាត់ទៅតុលាការ គាត់ទៅនិយាយការណ៍ពិតមួយទៀត។ រួចគាត់មកចោទយើងថា សហការីយើងណែនាំគាត់មិនឲ្យនិយាយការណ៍ពិត»។
ប្រធានអង្គការសិទ្ធិមនុស្សអាដហុកបន្តថា មន្ត្រីរបស់លោកគ្មានជម្រើសក្រៅពីការទៅបំភ្លឺទេ ព្រោះមានការព្រមាននាំខ្លួន បើមិនធ្វើតាមការកោះហៅ។ លោកនិយាយដោយអស់សំណើចជាច្រើនដង។
លោក ណៃ វង់ដា អនុប្រធានផ្នែកស៊ើបអង្កេតនៃអង្គការអាដហុក បានប្រាប់អ្នកយកព័ត៌មានថា លោកមិនបារម្ភទាក់ទងនឹងការចោទប្រកាន់របស់នាង ខុម ចាន់តារ៉ាទី និងការកោះហៅរបស់អង្គភាពប្រឆាំងអំពើពុករលួយនោះទេ។
«ខ្ញុំក៏គ្មានអីព្រួយបារម្ភដែរ ព្រោះកិច្ចការដែលខ្ញុំធ្វើគឺអ្វីដែលត្រូវតាមគោលការណ៍របស់សមាគមអាដហុក ហើយត្រឹមត្រូវតាមគោលការណ៍ច្បាប់»។
នាង ខុម ចាន់តារ៉ាទី បានកែប្រែចម្លើយរបស់នាងនៅអង្គការអាដហុក នៅពេលនាងត្រូវតុលាការរាជធានីភ្នំពេញកោះហៅកាលពីថ្ងៃអង្គារសប្តាហ៍មុន។ នាងបានដាក់ពាក្យប្តឹងនៅតុលាការដំបូងរាជធានីភ្នំពេញទាមទារជំងឺចិត្តគិតជាទឹកប្រាក់ចំនួន៣០ម៉ឺនដុល្លារពីលោក កឹម សុខា និងជនពាក់ព័ន្ធដទៃទៀត។
លោក អំ សំអាត ប្រធានការិយាល័យស៊ើបអង្កេតនៃអង្គការការពារសិទ្ធិមនុស្សលីកាដូ ដែលចូលរួមសន្និសីទនៅថ្ងៃអង្គារនេះ នៅទីស្នាក់ការគណៈកម្មាធិការប្រព្រឹត្តិកម្មនៃអង្គការសមាគមសិទ្ធិមនុស្សកម្ពុជា(CHRAC) បានប្រាប់ VOA ថា ករណីរបស់នាង ខុម ចាន់តារ៉ាទី ដែលបានកែប្រែចម្លើយចុះឡើងនេះ បង្ហាញពីការភ័យខ្លាចរបស់នាងដែលមានន័យថា ស្ថានភាពសិទ្ធិមនុស្សនៅកម្ពុជាទន់ខ្សោយ។
លោក អំ សំអាត ថ្លែងប្រាប់ VOA ថា៖ «ជាធម្មតាដែលខ្ញុំសង្កេតឃើញជារឿយៗមក ការដូរចម្លើយនេះវាច្រើនតែទទួលនូវបញ្ហាផ្សេងៗ ដូចជាការមានសម្ពាធ ឬក៏ការសន្យាអ្វីមួយសម្រាប់មនុស្សណាម្នាក់។ យើងឃើញថា ម្នាក់ៗគាត់ចេះតែផ្លាស់ប្តូរចម្លើយនេះ ចម្លើយនោះទៅតាមអ្វីដែលជាផលប្រយោជន៍របស់គាត់ចង់បាន។ អានេះដែលយើងសង្កេតឃើញកន្លងមកនោះណា៎»។
លោកនិយាយថា តាមបទពិសោធន៍ ព័ត៌មានដំបូងពេលជនរងគ្រោះមកសុំឲ្យអង្គការសិទ្ធិមនុស្សជួយនោះ ច្រើនជារឿងពិត ដែលមិនមានការគាបសង្កត់។
មន្ត្រីសិទ្ធិមនុស្ស៥នាក់របស់អង្គការអាដហុក ដែលត្រូវអង្គភាពប្រឆាំងអំពើពុករលួយកោះហៅនោះ រួមមានលោក នី សុខា ប្រធានផ្នែកស៊ើបអង្កេត អ្នកស្រី លឹម មុនី មន្ត្រីអង្កេតជាន់ខ្ពស់ អ្នកស្រី ទ្រី ឈួន ធ្លាប់ជាមេធាវីរបស់អ្នកនាង ខុម ចាន់តារ៉ាទី ឬ ស្រីមុំ ហើយនឹងលោក យី សុខសាន្ត និងលោក ណៃ វ៉ង់ដា ដែលអ្នកទាំងពីរជាអនុប្រធានផ្នែកស៊ើបអង្កេត។
ក្រៅពីមន្ត្រីសិទ្ធិមនុស្ស៥នាក់នេះ អង្គភាពប្រឆាំងអំពើពុករលួយក៏បានកោះហៅលោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត និងជាអតីតមន្ត្រីអាដហុក អ្នកស្រី ធីតា ឃឹះ ប្រធានអង្គការសីលការ និងលោក សឺន សាលី មន្ត្រីនៃការិយាល័យឧត្ដមស្នងការអ.ស.ប.ទទួលបន្ទុកសិទ្ធិមនុស្សប្រចាំកម្ពុជា។
បណ្តឹងរបស់ស្រីនាង ស្រីមុំ ធ្វើឡើងចំថ្ងៃដែលសមាគមអាដហុកប្រកាសឈប់ផ្តល់មេធាវីការពារក្តីឲ្យរូបនាង។ បណ្តឹងរបស់នាងធ្វើឡើងមិនដល់មួយសប្តាហ៍ផង ក្រោយពីនាងបានចូលទៅបំភ្លឺនៅសាលាដំបូងរាជធានីភ្នំពេញកាលពីថ្ងៃអង្គារកន្លងទៅ ទាក់ទិននឹងខ្សែអាត់សំឡេងស្នេហាដែលគេសង្ស័យថា ជាសំឡេងរបស់នាង និងសំឡេងរបស់លោក កឹម សុខា។ ការចូលខ្លួនរបស់នាងនាពេលនោះ គឺធ្វើទៅតាមបទចោទប្រកាន់ថា នាងបាន«ផ្តល់សក្ខីកម្មក្លែងក្លាយ និងប្រព្រឹត្តអំពើពេស្យាចារ»។ ការចោទប្រកាន់នេះធ្វើឡើងដោយអង្គភាពប្រឆាំងអំពើភេរវកម្មនៃក្រសួងមហាផ្ទៃ។
ម៉្យាងវិញទៀត អង្គភាពប្រឆាំងអំពើពុករលួយ កាលពីថ្ងៃអាទិត្យ បានឃាត់ខ្លួនលោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម ទាក់ទិននឹងការចោទប្រកាន់របស់នាង ខុម ចាន់តារ៉ាទី។ នាង ខុម ចាន់តារ៉ាទី បានចោទប្រកាន់ថា មេឃុំរូបនេះ បានបញ្ចុះបញ្ចូលឪពុកម្ដាយរបស់នាងឲ្យទទួលយកលុយចំនួន៥០០ដុល្លារ ជាថ្នូរនឹងការណែនាំនាងមិនឲ្យនិយាយការណ៍ពិតដែលអាចប៉ះពាល់កិត្តិយសលោក កឹម សុខា៕
