ខណៈដែលក្រុមចៅក្រម មេធាវីនិងក្រុមបុគ្គលិកជំនួយការនៅតុលាការសហព័ន្ធក្នុងក្រុង Concord រដ្ឋ New Hampshire សហរដ្ឋអាមេរិក បំពេញការងាររបស់ពួកគេតាមប្រព័ន្ធយុត្តិធម៌អាមេរិកាំង សត្វឃ្មុំរាប់ពាន់នៅលើដំបូលអគារនេះបំពេញមុខនាទីខ្លួនសំខាន់ជាងនេះ ដែលកិច្ចការនោះគឺការចិញ្ចឹមពិភពលោក។
អគារតុលាការ Warren B. Rudman ជាអគារសហព័ន្ធមួយក្នុងបណ្តាអគារសហព័ន្ធជាច្រើននៅទូទាំងប្រទេសអាមេរិក ដែលចូលរួមក្នុងកម្មវិធីផ្តួចផ្តើមគំនិតឱ្យឃ្មុំរោយលម្អងផ្កា (Pollinator Initiative) របស់ទីភ្នាក់ងារកិច្ចការសេវាកម្មទូទៅ (General Services Administration) របស់រដ្ឋាភិបាលអាមេរិក។
គោលដៅនៃកម្មវិធីនេះគឺវាយតម្លៃនិងលើកកម្ពស់សុខភាពឃ្មុំនិងសត្វល្អិតដែលរោយលម្អងផ្កាឯទៀតៗ ដែលមានសារៈសំខាន់ដល់ជីវិតនៅលើផែនដី។
ខណៈសត្វល្អិតទាំងនេះជួយរួមចំណែករាប់ពាន់លានដុលា្លរដល់សេដ្ឋកិច្ចសហរដ្ឋអាមេរិកជារៀងរាល់ឆ្នាំ សត្វល្អិតទាំងនេះក៏រងការគំរាមកំហែងជាប្រចាំដែរ។ បើគ្មានអន្តរាគមន៍របស់មនុស្សទេ ការបាត់បង់ឃ្មុំអាចជាមហន្តរាយមួយសម្រាប់ពិភពលោក។
លោក Noah Wilson-Rich ជាសហស្ថាបនិក ប្រធានប្រតិបត្តិ និងជាប្រធានមន្ត្រីវិទ្យាសាស្ត្រនៃក្រុមហ៊ុន Best Bees មានមូលដ្ឋាននៅក្រុង Boston។ លោកបាននិយាយថា៖ «ជនទាំងឡាយណាដែលបរិភោគអាហារ ត្រូវការឃ្មុំ»។ ក្រុមហ៊ុនលោកមានកុងត្រាជាមួយរដ្ឋាភិបាលអាមេរិកក្នុងការថែទាំសំបុកឃ្មុំនៅអគារតុលាការរដ្ឋNew Hampshire និងអគារឯទៀតៗរបស់សហព័ន្ធ។
លោកបានថ្លែងថា ឃ្មុំជួយនាំលម្អងផ្កាឱ្យប្រភេទរុក្ខជាតិផ្លែឈើនិងបន្លែដែលមនុស្សបរិភោគ។
ឃ្មុំនាំលម្អងផ្កាសម្រាប់ចំបើងនិងស្មៅ alfalfa ដែលជាចំណីសម្រាប់ឱគោស៊ីដែលផ្តល់សាច់ឱ្យយើងបរិភោគ។ ហើយឃ្មុំក៏ជួយដល់សុខភាពរុក្ខជាតិ ហើយតាមរយៈដំណើរការធ្វើរស្មីសំយោគ (photosynthesis) របស់រុក្ខជាតិ វាក៏ផ្តល់ខ្យល់ស្អាតសម្រាប់យើងដកដង្ហើមផងដែរ៕
ប្រែសម្រួលដោយ ឈឹម សុមេធ
ក្រុង Concord រដ្ឋ New Hampshire សហរដ្ឋអាមេរិក —
