រដ្ឋាភិបាលក្រិកកំពុងតស៊ូដើម្បីឱ្យមានការគាំទ្រពីដៃគូក្នុងក្រុមចម្រុះដល់កំណែទម្រង់ខាងហិរញ្ញវត្ថុជាច្រើនដែលត្រូវតែមានការយល់ព្រមពីសភាដើម្បីឱ្យមានជំនួយសង្គ្រោះខាងហិរញ្ញវត្ថុពីម្ចាស់ឥណទានអន្តរជាតិ។
គណបក្ស Syriza របស់លោកនាយករដ្ឋមន្ត្រី Alexis Tsipras និងសម្ព័ន្ធមិត្តនៅក្នុងក្រុមចម្រុះបានធ្វើការប្រជុំដាច់ដោយឡែកពីគ្នាដើម្បីកំណត់ចុងក្រោយបង្អស់នូវវិធានការមួយនៅថ្ងៃអង្គារ។កិច្ចព្រមព្រៀងនេះមានរួមបញ្ចូលការបង្កើនពន្ធដារ, ការកែទម្រង់ប្រាក់សោធននិវត្តន៍និងការត្រួតពិនិត្យយ៉ាងតឹងតែងលើវិស័យហិរញ្ញវត្ថុរបស់រដ្ឋាភិបាលដែលជាវិធានការបានត្រូវច្រានចោលនៅក្នុងការបោះឆ្នោតប្រជាមតិកាលពីប៉ុន្មានថ្ងៃមុននេះ។
មេដឹកនាំអឺរ៉ុបបានប្រកាសអំពីកិច្ចព្រមព្រៀងបណ្តោះអាសន្នមួយកាលពីថ្ងៃចន្ទដើម្បីផ្តល់ឱ្យប្រទេសក្រិកនូវជំនួយសង្គ្រោះហិរញ្ញវត្ថុមួយទៀតមានទឹកប្រាក់ជិត៩៥ពាន់លានដុល្លារនិងធ្វើឱ្យប្រាកដប្រជាថាប្រទេសក្រិកឋិតនៅក្នុងតំបន់ប្រើប្រាក់អឺរ៉ូដែលមានប្រទេសជាតិ១៩ជាសមាជិកតទៅទៀត។
គេរំពឹងថាសេចក្តីព្រាងច្បាប់នេះនឹងត្រូវដាក់ស្នើក្នុងសភានៅថ្ងៃអង្គារហើយនឹងត្រូវបោះឆ្នោតនៅយប់ថ្ងៃពុធនេះ។
រដ្ឋាភិបាលកាន់កាប់កៅអី១៦២នៅក្នុងសភានៃប្រទេសក្រិកដែលមានសមាជិក៣០០នាក់។សេចក្តីព្រាងច្បាប់នេះទំនងជានឹងអាចត្រូវអនុម័តិបានពីព្រោះគណបក្សប្រឆាំងភាគច្រើនគាំទ្រច្បាប់នេះ។មានតំណាងរាស្ត្រប្រមាណ៣០នាក់នៃគណបក្ស Syriza ផ្ទាល់បានសម្តែងការជំទាស់របស់ពួកគេជាសាធារណៈ៕
