កាលពីថ្ងៃពុធម្សិលមិញនេះ មានការចូលរួមរំលែកទុក្ខជាច្រើនពីមន្ត្រីការទូតនានានៅជុំវិញពិភពលោកចំពោះមរណភាពរបស់អ្នកស្រី Madeleine Albright ដែលជាអតីតរដ្ឋមន្ត្រីការបរទេសអាមេរិកស្ត្រីលើកដំបូង និងជារដ្ឋនារីដ៏មានឥទ្ធិពលមួយរូបដែលបានទទួលមរណភាពក្នុងអាយុ៨៤ឆ្នាំ។ នេះ បើតាមការចេញផ្សាយរបស់ទីភ្នាក់ងារព័ត៌មាន AFP។
អ្នកស្រី Albright បានមករស់នៅក្នុងសហរដ្ឋអាមេរិកកាលពីអ្នកស្រីមានវ័យ១១ឆ្នាំក្នុងនាមជាជនភៀសខ្លួនផ្នែកនយោបាយ។ អ្នកស្រី បានបម្រើការងាររហូតក្លាយជារដ្ឋមន្ត្រីក្រសួងការបរទេសសហរដ្ឋអាមេរិក ក្រោមអណត្តិរបស់អតីតប្រធានាធិបតីអាមេរិកលោក Bill Clinton ពីឆ្នាំ១៩៩៧ ដល់ឆ្នាំ២០០១។
អតីតប្រធានាធិបតីសហរដ្ឋអាមេរិកលោក Bill Clinton លោក George W. Bush លោក Barack Obama និងប្រធានាធិបតីអាមេរិកបច្ចុប្បន្នលោក Joe Biden បានសរសើរពីវីរភាពការងារជាប្រវត្តិសាស្ត្ររបស់អ្នកស្រី Albright។
អតីតប្រធានាធិបតីអាមេរិកលោក Barack Obama បានបញ្ជាក់នៅក្នុងសេចក្តីថ្លែងការណ៍ថា អ្នកស្រី Albright បានត្រួសត្រាយផ្លូវសម្រាប់ការរីកចម្រើននៅក្នុងតំបន់មួយចំនួនដែលមានអស្ថិរភាពនៅលើពិភពលោក និងជាជើងឯកមួយរូបក្នុងការការពារតម្លៃនៃលទ្ធិប្រជាធិបតេយ្យ។ ដោយធ្លាប់ឆ្លងកាត់ជាជនអន្តោប្រវេសន៍ អ្នកស្រី បានធ្វើឲ្យមានទស្សនវិស័យដ៏ពិសេស និងសំខាន់មួយដល់ការងារអាជីពដ៏ឆ្នើមរបស់អ្នកស្រី»។
អ្នកស្រី Albright កើតនៅឆ្នាំ១៩៣៧ ក្នុងទីក្រុងប្រាក ប្រទេសឆែក។ គ្រួសាររបស់លោកស្រីមានអំបូជាជនជាតិជ្វីវ ប៉ុន្តែ អ្នកស្រីមិនបានដឹងទេរហូតពេលក្រោយមក។ អ្នកស្រី បានរត់គេចចេញមុនការឈ្លានពានរបស់ពួកណាស៊ីក្នុងប្រទេសឆេកូស្លូវ៉ាគីនៅឆ្នាំ១៩៣៩។ អ្នកស្រី បានបាត់បង់សមាជិកគ្រួសារជាច្រើននាក់នៅក្នុងជំរំប្រមូលផ្តុំកាប់សម្លាប់។ អ្នកស្រី បានរត់ភៀសខ្លួនទៅកាន់ចក្រភពអង់គ្លេសហើយ១០ឆ្នាំក្រោយមក បានចាកចេញមករស់នៅសហរដ្ឋអាមេរិក។
បន្ទាប់ពីសិក្សាមុខវិជ្ជាវិទ្យាសាស្ត្រនយោបាយមក អ្នកស្រី Albright បានចូលក្នុងវិស័យនយោបាយជាអ្នករៃអង្កៀសប្រាក់ឲ្យគណបក្សប្រជាធិបតេយ្យ បន្ទាប់មកជាអ្នកជំនួយការសភា ហើយបានចូលបម្រើការងារឲ្យលោក Zbigniew Brzezinski ទីប្រឹក្សាសន្តិសុខជាតិរបស់លោកអតីតប្រធានាធិបតី Jimmy Carter។
ក្រុមគ្រួសាររបស់អ្នកស្រី បានបញ្ជាក់ក្នុងសេចក្តីថ្លែងការណ៍ថា អ្នកស្រី Albright បានទទួលមរណភាពដោយសារជំងឺមហារីក ដោយមានក្រុមគ្រួសារ និងមិត្តភ័ក្តនៅជុំវិញខ្លួន ហើយបានគោរពវិញ្ញានខណ្ឌអ្នកស្រីក្នុងនាមជាម្តាយ ជាជីដូន ជាបងស្រី និងមិត្តភ័ក្តជាទីស្រឡាញ់ក៏ដូចជាបុគ្គលជើងឯកម្នាក់ដែលមិនចេះនឿយហត់ក្នុងការការពារលទ្ធិប្រជាធិបតេយ្យ និងសិទ្ធិមនុស្ស»៕
