អន្តរជាតិបានថ្កោលទោសយ៉ាងខ្លាំងកាលពីថ្ងៃព្រហស្បតិ៍ចំពោះការវាយប្រហារលើហ្វូងមនុស្សដែលសប្បាយរីករាយក្នុងពិធីបុណ្យចូលឆ្នាំសាកលនៅក្នុងទីក្រុង New Orleans រដ្ឋ Louisiana សហរដ្ឋអាមេរិក ដែលនៅក្នុងការវាយប្រហារនោះ មនុស្សយ៉ាងតិច ១៥ នាក់បានស្លាប់និងរាប់សិបនាក់ទៀតរងរបួស។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
អគ្គលេខាធិការអង្គការសហប្រជាជាតិលោក Antonio Guterres «ថ្កោលទោសយ៉ាងខ្លាំង» ចំពោះការវាយប្រហារនេះ ហើយ «បានចូលរួមរំលែកទុក្ខចំពោះក្រុមគ្រួសារនិងមនុស្សជាទីស្រឡាញ់របស់គ្រួសារទាំងនោះដែលបានបាត់បង់ជីវិត»។ នេះបើតាមសេចក្តីថ្លែងការណ៍មួយរបស់អ្នកនាំពាក្យរបស់លោក។
រដ្ឋមន្ត្រីការបរទេសវិមានវ៉ាទីកង់បានសរសេរនៅក្នុងសារផ្ញើទៅកាន់មេគណៈសាសនាគ្រិស្តនិកាយកាតូលិកនៃក្រុង New Orleans ថា៖ «សម្តេចប៉ាបហ្វ្រង់ស៊ីស (Francis) មានទុក្ខព្រួយយ៉ាងខ្លាំងដែលបានឮដំណឹងអំពីការបាត់បង់អាយុជីវិតនិងការរងរបួសនេះ»។
ប្រធានសហភាពអឺរ៉ុបអ្នកស្រី Ursula von der Leyen បានសរសេរនៅលើបណ្តាញសង្គមអនឡាញ Xថា៖ «ខ្ញុំមានទុក្ខព្រួយយ៉ាងខ្លាំងចំពោះការវាយប្រហារដ៏រន្ធត់នៅក្នុងទីក្រុង New Orleansនេះ។... យើងត្រូវតែរួមគ្នាជាធ្លុងមួយនៅក្នុងការប្រយុទ្ធប្រឆាំងនឹងអំពើហិង្សានិងភេរវកម្មនេះ ហើយធ្វើការជាមួយគ្នាឆ្ពោះទៅរកអនាគតមួយដែលមានសុវត្ថិភាពជាងមុន»។
អគ្គលេខាធិការអង្គការអូតង់លោក Mark Rutte បានសរសេរនៅលើបណ្តាញសង្គមអនឡាញ X ថា៖ «[ខ្ញុំ] សោកសង្រេងយ៉ាងខ្លាំងចំពោះដំណឹងនៃការវាយប្រហារដ៏រន្ធត់ក្នុងទីក្រុង New Orleans នេះ។ ខ្ញុំសូមបួងសួងឲ្យអ្នករងរបួសឆាប់បានជាសះស្បើយនិងចូលរួមរំលែកទុក្ខជាមួយអ្នកដែលបានបាត់បង់មនុស្សជាទីស្រឡាញ់របស់ខ្លួន»។
ចំណែកឯអ្នកនាំពាក្យក្រសួងការបរទេសចិនអ្នកស្រី Mao Ning វិញបានប្រាប់អ្នកយកព័ត៌មានថា៖ «យើងមានការតក់ស្លុតចំពោះការវាយប្រហារហិង្សានេះ។ ចិនជានិច្ចកាលប្រឆាំងនឹងសកម្មភាពហិង្សានិងភេរវកម្មណាមួយដែលដៅលើជនស៊ីវិល»។
អ្នកស្រីបានបន្ថែមថា៖ «យើងកាន់ទុក្ខចំពោះជនរងគ្រោះនិងសូមសម្តែងនូវសេចក្ដីអាណិតអាសូររបស់យើងដល់ក្រុមគ្រួសារជនរងគ្រោះនិងអ្នកដែលរងរបួស»។
រីឯប្រធានាធិបតីបារាំងលោក Emmanuel Macron វិញបានសរសេរលើបណ្តាញសង្គមអនឡាញ X ថា៖ «ក្រុង New Orleans ដែលពលរដ្ឋបារាំងស្រឡាញ់ពេញបេះដូង បានរងការវាយប្រហារភេរវកម្ម»។
លោក Macron បានបន្ថែមថា៖ «យើងសូមចូលរួមរំលែកទុក្ខជាមួយក្រុមគ្រួសាររបស់ជនរងគ្រោះនិងអ្នករងរបួស ក៏ដូចជាជាមួយពលរដ្ឋអាមេរិកាំងដែលរងទុក្ខព្រួយ»៕
