ដោយស្លៀកក្បិនពណ៌បៃតងជាពណ៌តំណាងស្លឹកឈើ អ្នកដេញចាប៉ី៩ នាក់ រួមមានលោកតា គង់ ណៃ អ្នកច្រៀងចាប៉ីដ៏ល្បីល្បាញនៅក្នុងប្រទេសកម្ពុជា បានលើកយកអត្ថប្រយោជន៍ផ្សេងៗគ្នានៃព្រៃឈើមកច្រៀងដេញឆ្លើយឆ្លង។ ក្នុងនោះក៏បានលើកឡើងពីព្រៃឡង់ ដែលជាព្រៃធំចុងក្រោយនៅក្នុងប្រទេសកម្ពុជា ផងដែរ។
ការក្លែមសម្តីនៃអ្នកដេញចាប៉ីដងវែងបានធ្វើឲ្យទស្សនិកជនហ៊ោរពេញសាលសន្និសីទចតុមុខ កាលពីថ្ងៃអាទិត្យកន្លងទៅ នៅក្នុងមហោស្រពចាប៉ីដងវែងលើកទី១ ដែលប្រារព្ធធ្វើឡើង ក្រោមប្រធានបទ «សម្រស់ព្រៃខ្មែរ» ដោយសហគមន៍ចាប៉ីអមតៈនិងអង្គការដៃគូពាក់ព័ន្ធនានាធ្វើការទាក់ទងនឹងព្រៃឈើ ក្រោមការឧបត្ថម្ភដោយ ទីភ្នាក់ងារអាមេរិកដើម្បីការអភិវឌ្ឍអន្តរជាតិហៅកាត់ថា (USAID)។
លោក ពេជ សារ៉ាត់ ស្ថាបនិកនិងប្រធានដឹកនាំសហគមន៍ចាប៉ីអមតៈនិងជាអ្នករៀបចំឲ្យមានមហោស្រពនេះ បានឲ្យដឹងថា សិល្បៈចាប៉ីដងវែងខ្សែ២ ត្រូវបានគេស្គាល់ថា ជាការសម្តែងចម្រៀងឥតព្រៀងទុកសម្រាប់ការប្រៀនប្រដៅប្រជាពលរដ្ឋក្នុងប្រពៃណីខ្មែរ ដូច្នេះការដែលលើកយកប្រធានបទសម្រស់ព្រៃឈើមកច្រៀង ពិតជាមានសារៈសំខាន់ណាស់ ក្នុងការផ្ញើសារទៅកាន់សាធារណជន។
«យើងបញ្ចូនសារតាមរយៈចាប៉ី ធ្វើយ៉ាងណាឲ្យប្រជាពលរដ្ឋយើងទាំងអស់គ្នាចេះស្រឡាញ់ ចេះថែរក្សា ចេះដាំឡើងវិញ ចេះយកចិត្តទុកដាក់អំពីព្រៃឈើយើងទាំងអស់គ្នា»
ចាប៉ីដងវែង គឺជាឧបករណ៍តន្រ្តីខ្មែរមួយ ក្នុងចំណោមឧបករណ៍ជាច្រើនទៀត ដែលក្នុងនោះ៨០ភាគរយ ធ្វើឡើងពីឈើប្រណិត ដែលនឹងឈានទៅរកការវិនាសនាពេលខាងមុខ។ ស្របគ្នានោះដែរ ព្រៃឈើនៅកម្ពុជាត្រូវបានកាប់បំផ្លាញជាបន្តបន្ទាប់។
កម្រងរូបភាព៖ «មហោស្រពចាប៉ីធំបំផុតនៅកម្ពុជា ជួយអភិរក្សព្រៃកម្ពុជា»
យុវជន គង់ សុភ័ក្រ ជាអ្នកចូលរួមទស្សនានៅក្នុងមហោស្រពចាប៉ីនោះបាននិយាយថា វាជាការល្អដែលមានការផ្សារភ្ជាប់សិល្បៈទៅនឹងព្រៃឈើ ដែលកំពុងប្រឈមនឹងការបាត់បង់ដូចគ្នា។
«ដោយសារឧបករណ៍បុរាណយើងធ្វើឡើងពីឈើ អីចឹងកាលណាព្រៃឈើរបស់យើងនៅគង់វង់ អីចឹងឧបករណ៍បុរាណយើងក៏នៅគង់វង់នាថ្ងៃអនាគត»
ស្រដៀងគ្នានោះដែរ កញ្ញា ប្លុង ចាន់លាភា ទស្សនិកជនម្នាក់ទៀតនិយាយថា វាមានការទាក់ទាញខ្លាំងនៅពេលដែលមានការភ្ជាប់ចាប៉ីទៅនឹងព្រៃឈើ។
«នៅពេលដែលគេផ្សារភ្ជាប់ព្រៃឈើ ប្រធានបទសម្រស់ព្រៃឈើជាមួយនឹងវប្បធម៌ដែលលើកពី ទាក់ទងនឹងចាប៉ីដងវែង វាហាក់ដូចជាមានភាពទាក់ទាញ ចាប់អារម្មណ៍ខ្លាំងចំពោះប្រធានបទសម្រស់នៃព្រៃឈើ»
ក្រៅពីការសម្តែងចាប៉ីដងវែង មហោស្រពដែលមានរយៈពេលមួយថ្ងៃនេះ ក៏មានការសម្តែងផ្សេងទៀត ដែលរៀបរាប់ពីទំនាក់ទំនងមនុស្សនឹងធម្មជាតិ រួមទាំងជំនឿប្រជាជនកម្ពុជាទៅនឹងធម្មជាតិ និងអត្ថប្រយោជន៍ព្រៃឈើ។
យ៉ាងណាក៏ដោយ លោក ឡុង ឆាយ អាយុ៤៨ឆ្នាំ ដែលបានរៀនដេញចាប៉ីអស់រយៈពេលជាង១០ឆ្នាំមកហើយ បានបញ្ជាក់ពីការសោកស្តាយអំពីការដែលមានមនុស្សតិចតួចរៀនដេញចាប៉ីនិងយល់ដឹងពីឧបករណ៍ភ្លេងបុរាណនេះ។
«ខ្ញុំមានការសោកស្តាយ ព្រោះថាចាប៉ីដងជិតផុតពូជហើយ។ មនុស្សក្នុងព្រះរាជាណាចក្រកម្ពុជា បើតាមគិតមានដល់ទៅរាប់លាននាក់ ប៉ុន្តែអ្នកដែលចេះសម្តែងចាប៉ីនិងចូលចិត្តផ្នែកចាប៉ីគឺនៅតិចណាស់»។
លោក ឡុង ឆាយ ដែលបានមកសម្តែងចាប៉ីនៅក្នុងមហោស្រពសិល្បៈផងដែរនោះ លោកស្នើឲ្យរដ្ឋាភិបាលកម្ពុជា បញ្ចូលអាយ៉ៃនិងចាប៉ីដងវែងទៅក្នុងការប្រកួតប្រជែងថ្នាក់ជាតិ ដូចសិល្បៈទម្រង់ឯទៀត។
នាប៉ុន្មានឆ្នាំចុងក្រោយ ព្រៃឈើនៅកម្ពុជា បានបាត់បង់ជាបន្តបន្ទាប់ដោយសារដីសម្បទានសេដ្ឋកិច្ច និងការកាប់បំផ្លាញយកឈើប្រណិតជាដើម។ ព្រៃឡង់ មានទំហំ ៤៣.៦០០គីឡូម៉ែត្រក្រឡា ស្ថិតនៅក្នុងខេត្តចំនួនបួនគឺកំពង់ធំ ក្រចេះ ស្ទឹងត្រែង និងព្រះវិហារ ក៏ជាព្រៃមួយដែលទទួលរងគ្រោះផងដែរ។
សម្រាប់លោក ហឿន សុភាព តំណាងសហគមន៍ការពារព្រៃឡង់មកពីខេត្តកំពង់ធំ បាននិយាយថា លោកសារទរចំពោះមហោស្រពនេះ បើទោះបីជាលោកមិនមានការចូលរួមក្នុងមហោស្រពនោះក៏ដោយ ក៏លោកនិយាយថាវាស្ថិតនៅក្នុងគោលបំណងតែមួយជាមួយនឹងការការពារព្រៃឈើដែរ។
ថ្លែងប្រាប់ VOA ពីខេត្តកំពង់ធំតាមទូរស័ព្ទ លោក ហឿន សុភាព និយាយថា៖
«ជាក់ស្តែង អ្នកខ្លះ សូម្បីតែនៅក្នុងខេត្តខ្លួនឯងមិនដឹងព្រៃឡង់នៅឯណាទេ។ ប៉ុន្តែនៅពេលដែលមានការផ្សព្វផ្សាយ ខ្ញុំគិតថាមនុស្សជាច្រើនដែលបានឃើញ បានដឹងព័ត៌មានហើយ ក៏គេបានចាប់អារម្មណ៍ខ្លះដែរ ដោយសារតែយើងបានធ្វើនៅទីលានសាធារណៈផ្សេងៗនឹង ខ្ញុំគិតថាវាមានប្រយោជន៍ខ្លាំងមែនទែន ជាសារមួយដែលមានការអប់រំដល់យុវជនខ្មែរ ឬក៏ប្រជាជនខ្មែរយើង ឲ្យចាប់អារម្មណ៍ពីធនធានធម្មជាតិ ដែលកំពុងមាននៅតំបន់ព្រៃឡង់ ហើយក៏ធ្វើការចាប់អារម្មណ៍ឡើងវិញ ថាព្រៃឈើមានអត្ថប្រយោជន៍សម្រាប់ប្រទេសជាតិ សម្រាប់សង្គមយើងទាំងអស់ ផងដែរ»។
កាលពីចុងខែមីនាកន្លងទៅ លោក ហ៊ុន សែន នាយករដ្ឋមន្រ្តីកម្ពុជា បានប្រកាសដាក់បញ្ចូលព្រៃឡង់និងព្រៃមួយចំនួនទៀតចូលជាព្រៃការពារ តាមរយៈសំណើរួមគ្នារបស់ក្រសួងបរិស្ថាននិងក្រសួងកសិកម្ម។ ហើយបានហៅឲ្យក្រុមសង្គមស៊ីវិល និងអ្នកបំបួសដើមឈើទាំងនោះ ចូលរួមទាំងអស់គ្នាជាចលនាការពារព្រៃឈើ។
លោក ហឿន សុភាព ដែលបានដើរល្បាតនៅព្រៃឡង់អស់រយៈពេលជាង១០ឆ្នាំមកហើយ យល់ថា ការអភិរក្សនេះ គួរតែមានការចូលរួមពីប្រជាជនក្នុងសហគមន៍ដោយផ្ទាល់ ពិគ្រោះយោបល់និងការពារពីការកាប់បំផ្លាញព្រៃឈើក្នុងតំបន់ការពារថ្មីនេះ។
បើទោះជាមហោស្រពចាប៉ីដងវែងលើកទី១ក្រោមប្រធានបទសម្រស់ព្រៃខ្មែរបានបញ្ចប់ទៅ ហើយក៏ដោយតែការព្យាយាមការពារព្រៃឈើកម្ពុជាដែលនៅសេសសល់នៅតែបន្ត ដោយក្តីបារម្ភ៕