ក្តីរំពឹងកំពុងឈានឡើងសម្រាប់ជំនួបនៅសប្តាហ៍នេះរវាងរដ្ឋមន្ត្រីការបរទេសចិនលោក Wang Yi និងរដ្ឋមន្ត្រីការបរទេសជប៉ុនលោកស្រីYoko Kamikawa នៅខាងក្រៅជំនួបអាស៊ានក្នុងរដ្ឋធានីវៀងចន្ទប្រទេសឡាវ។
នៅដើមសប្តាហ៍នេះ អនុរដ្ឋមន្ត្រីការបរទេសចិនលោក Ma Zhaoxuបានជួបជាមួយសមភាគីរបស់លោកនៅក្នុងទីក្រុងតូក្យូ ដែលជាជំនួបលើកទី១របស់ប្រទេសទាំង២ក្នុងការពិភាក្សាយុទ្ធសាស្ត្រចាប់តាំងពីឆ្នាំ២០២០មក។ លោក Ma ក្រោយមកបានជួបលោកស្រី Kamikawaក្នុងដំណើរទស្សនកិច្ចទៅកាន់រាជធានីតូក្យូ។
តាមសេចក្តីរាយការណ៍មួយនៅក្នុងសារព័ត៌មាន Global Times ដែលរៀបចំចាត់ចែងដោយរដ្ឋចិនថា៖«ភាគីទាំង២បានប្តូរទស្សនៈគ្នាដោយផ្លែផ្កាស្តីពីបញ្ហាយុទ្ធសាស្ត្រទាក់ទិននឹងទំនាក់ទំនងរវាងចិននិងជប៉ុន»។ នៅមុនជំនួបនៅក្នុងប្រទេសឡាវ ទីភ្នាក់ងារសារព័ត៌មានKyodo របស់ជប៉ុនបានដកស្រង់ប្រភពរដ្ឋាភិបាលដែលបាននិយាយថារដ្ឋាភិបាលក្រុងតូក្យូកំពុងស្វែងរកលទ្ធភាពនៃជំនួបមួយរវាងលោក Wang និងលោកស្រី Kamikawa។
ទីភ្នាក់ងារសារព័ត៌មានក្យូដូបានរាយការណ៍កាលពីថ្ងៃព្រហស្បតិ៍ថារដ្ឋាភិបាលទាំង២បានចាប់ផ្តើមធ្វើការរៀបចំសម្រាប់ជំនួបរវាងរដ្ឋមន្ត្រីការបរទេសទាំង២នៅថ្ងៃសុក្រនេះ៕
