អ្នកពាក់ព័ន្ធដែលធ្វើការលើផ្នែកស្រូវអង្ករក្នុងប្រទេសកម្ពុជាបានអំពាវនាវឱ្យកសិករមានការប្រុងប្រយ័ត្ននឹងការដាំស្រូវប្រភេទ IR និង OM ខណៈបង្ហាញការព្រួយបារម្ភអំពីតម្លៃធ្លាក់ចុះ នៅគ្រាដែលប្រទេសឥណ្ឌាដែលជាប្រទេសនាំចេញអង្ករសច្រើនជាងគេលើពិភពលោកបានចាប់ផ្តើមនាំចេញអង្ករសឡើងវិញ។
កាលពីសប្តាហ៍មុន ប្រទេសឥណ្ឌាបានអនុញ្ញាតឱ្យនាំចេញប្រភេទអង្ករសឡើងវិញ ក្រោយបិទការនាំចេញជាងមួយឆ្នាំមកហើយ ពោលគឺចាប់តាំងពីខែកក្កដា ឆ្នាំ ២០២៣។
ការបើកការនាំចេញឡើងវិញនេះបានធ្វើឱ្យតម្លៃអង្ករសនៅវៀតណាម ថៃ ប៉ាគីស្ថាន និងមីយ៉ាន់ម៉ាធ្លាក់ចុះ។ នេះបើតាមអ្នកជំនាញក្នុងប្រទេសកម្ពុជា។
លោក ឡាយ ឈុនហួ ប្រធានក្រុមប្រឹក្សាភិបាលក្រុមហ៊ុននាំចេញអង្ករ City Rice និងជាម្ចាស់រោងម៉ាស៊ីនកិនស្រូវមួយរូប ប្រាប់វីអូអេនៅថ្ងៃអង្គារថា នៅពេលដែលប្រទេសឥណ្ឌាបើកការនាំចេញអង្ករសទៅក្រៅប្រទេស លោកសង្កេតឃើញតម្លៃអង្ករនៅប្រទេសជិតខាងកម្ពុជាធ្លាក់ចុះ បើទោះនៅកម្ពុជាមិនទាន់ធ្លាក់ចុះក៏ដោយ។
លោកបង្ហាញក្តីបារម្ភថា ក្នុងរយៈពេលពីរបីខែខាងមុខទៀត តម្លៃស្រូវនិងអង្ករសនឹងធ្លាក់ចុះក្នុងប្រទេសកម្ពុជា ដែលវានឹងប៉ះពាល់កសិករខ្មែរដែលនិយមធ្វើស្រូវប្រភេទ OM និង IR។ លោកអំពាវនាវដល់កសិករខ្មែរងាកមកដាំប្រភេទពូជស្រូវក្នុងស្រុក ដូចជាស្រងែ និងសែនក្រអូបជាដើម ដើម្បីធានាថាទទួលបានតម្លៃខ្ពស់ដដែល។
លោកថ្លែងថា៖ «តែបើសិនជាកន្លែងអំណោយផលដាក់ដាំពីរប្រភេទហ្នឹង ព្រោះអីទីផ្សារវានៅតែមានរហូត។ ខ្ញុំសង្កេតឃើញក្នុងរយៈពេលពីរឆ្នាំក្រោយនេះ តាំងពីឥណ្ឌាបិទការនាំចេញ ទាំងថៃទាំងវៀតណាម ប្រទេសផ្សេងៗ គឺគាត់ងាកមកដាំតែអង្ករសទេ ដោយសារតែអង្ករសបានថ្លៃ ហើយអាកាសធាតុក្នុងរយៈពេលពីរឆ្នាំនេះ រាំងស្ងួត។ កត្តាពីរហ្នឹងធ្វើឱ្យអង្ករសមានចំនួនច្រើននៅលើទីផ្សារ»។
លោក លន់ យ៉េង អគ្គលេខាធិការនៃសហព័ន្ធស្រូវអង្ករកម្ពុជា ប្រាប់វីអូអេថា ស្រូវប្រភេទ IR និង OM របស់កម្ពុជាពឹងផ្អែកលើការលក់ចេញទៅប្រទេសវៀតណាម ដែលជាប្រទេសនាំចេញអង្ករសទៅអន្តរជាតិដែរ។ លោកបន្តថា បើវៀតណាមទិញស្រូវតាមតម្លៃអង្ករនៅលើទីផ្សារអន្តរជាតិ នោះតម្លៃស្រូវនៅកម្ពុជាអាចនឹងធ្លាក់មកនៅក្រោម ៨០០រៀល ក្នុងមួយគីឡូក្រាម។
លោកថ្លែងថា៖ «អ៊ីចឹងសូមប្រជាកសិករគាត់ប្រយ័ត្នប្រយែង ជាពិសេសដាំស្រូវមិនក្រអូបប្រភេទ OM ហើយនឹង IR ដែលគាត់ពឹងផ្អែកលើការលក់ទៅទីផ្សារវៀតណាម ព្រោះវៀតណាមក៏គាត់នាំចេញប្រភេទហ្នឹង អ៊ីចឹងពេលខ្លះគាត់ត្រូវការទិញពីយើងខ្លះ ដើម្បីទៅបង្គ្រប់ផែនការនាំចេញ ប៉ុន្តែប្រសិនបើធ្លាក់ថ្លៃខ្លាំងអ៊ីចឹង គាត់ក៏ទិញទៅតាមតម្លៃទីផ្សារអង្ករអន្ដរជាតិដែរ»។
បើតាមតម្លៃដែលបង្ហាញដោយសហព័ន្ធស្រូវអង្ករកម្ពុជា តម្លៃស្រូវប្រភេទ OM និង IR មានតម្លៃប្រហែលគ្នាក្នុងរង្វង់ ១០៦០រៀល ក្នុងមួយគីឡូក្រាម ខណៈស្រូវស្រងែមានតម្លៃ ១១៨០រៀលក្នុ ងមួយគីឡូក្រាម។
វីអូអេមិនទាន់អាចសុំការអត្ថាធិប្បាយពីអ្នកនាំពាក្យក្រសួងកសិកម្ម កញ្ញា អ៊ឹម រចនា និងលោក ឃឹម ហ្វីណង់ បាននៅឡើយទេ។
លោក ផង់ សាខន អាយុ៤៣ឆ្នាំ ជាកសិករក្នុងស្រុកកំពង់ត្រាច ខេត្តកំពត ថ្លែងថា លោកកំពុងដាំស្រូវប្រភេទ OM លើទំហំដីប្រមាណ ២ ហិកតា។ លោកមិនបានដឹងព័ត៌មានអំពីប្រទេសឥណ្ឌាចាប់ផ្តើមនាំចេញអង្ករសឡើងវិញឡើយ។ លោកក៏បង្ហាញក្តីបារម្ភអំពីតម្លៃស្រូវធ្លាក់ចុះ ក្រោម ១០០០រៀល ដែលធ្លាប់លក់បាន ដោយសារតែហាងឆេងស្រូវអាស្រ័យលើឈ្មួញជាអ្នកកំណត់។ ក្នុងនាមជាកសិករម្នាក់ លោកចង់ឃើញតម្លៃជីថ្នាំចុះថ្លៃ ដើម្បីកាត់បន្ថយថ្លៃចំណាយក្នុងការធ្វើកសិកម្ម។
លោកប្រាប់វីអូអេថា៖ «យើងសំណូមពរថាឱ្យធ្វើម៉េចឱ្យជីវាថោក ជីថ្នាំនឹងច្រើនតែឈ្មួញគេដាក់កោរតម្លៃយើង។ ស្រូវក៏អ៊ីចឹង។ វាអត់មានតម្លៃថេរ»។
គួរបញ្ជាក់ថា ស្រូវនៅកម្ពុជាបានឡើងថ្លៃ ចាប់តាំងពីឆ្នាំ ២០២៣ ដោយសារឥទ្ធិពលនៃការមិននាំចេញអង្ករប្រភេទធម្មតារបស់ប្រទេសឥណ្ឌា ដែលកាលនោះឥណ្ឌាចង់រក្សានូវសន្តិសុខស្បៀងនៅក្នុងប្រទេស។ ការសម្រេចរបស់ឥណ្ឌាបណ្តាលឱ្យប្រទេសជិតខាងកម្ពុជា ដូចជាថៃ និងវៀតណាមសម្រុកទិញស្រូវពីកម្ពុជាក្នុងតម្លៃថ្លៃជាងមុន៕
វេទិកាបញ្ចេញមតិ