សន្ទុះបានបង្ហាញនៅខាងអនុប្រធានាធិបតីសហរដ្ឋអាមេរិកអ្នកស្រី Kamala Harris
កាលពីថ្ងៃចន្ទ នៅពេលដែលពួកសមាជិកសភា អភិបាលរដ្ឋនិងអ្នកផ្តល់ហិរញ្ញវត្ថុ ខាងគណបក្សប្រជាធិបតេយ្យបានសម្តែងនូវការគាំទ្រអ្នកស្រីដើម្បីក្លាយជាអ្នកទទួលបានការតែងតាំងជាបេក្ខជនប្រធានាធិបតីរបស់គណបក្សនៅក្នុងការបោះឆ្នោតខែវិច្ឆិកាបន្ទាប់ពីលោកប្រធានាធិបតី Joe Biden បានដកខ្លួនចេញពីការប្រកួតប្រជែង។
បន្ទាប់ពីលោក Biden បានធ្វើការប្រកាសដ៏ភ្ញាក់ផ្អើលដកខ្លួនចេញពីការប្រកួតកាលពីថ្ងៃអាទិត្យ លោក Biden បានចេញការគាំទ្រដល់អ្នកស្រី Harris ដើម្បីប្រឈមអតីតប្រធានាធិបតីលោក Donald Trump បេក្ខជនប្រធានាធិបតីខាងគណបក្សសាធារណរដ្ឋ។
អ្នកស្រី Harris ដែលមានអាយុ៥៩ឆ្នាំបានប្រកាសភ្លាមៗថាអ្នកស្រីនឹងស្វះស្វែងរកឱ្យបានទទួលការតែងតាំងនេះ។ អ្នកស្រីធ្លាប់ជាសមាជិកាព្រឹទ្ធសភាម្នាក់មកពីរដ្ឋ California ដែលមានពលរដ្ឋច្រើនបំផុតនៅក្នុងសហរដ្ឋអាមេរិក នៅពេលដែលលោក Biden ជ្រើសរើសអ្នកស្រីនៅឆ្នាំ២០២០ជាបេក្ខជនអនុប្រធានាធិបតីរបស់លោក បន្ទាប់ពីការឈរឈ្មោះរបស់ អ្នកស្រី Harris ជាបេក្ខជនប្រធានាធិបតីមិនបានទទួលការគាំទ្រពីប្រជាពលរដ្ឋ។
អត្រាយល់ស្របបំពេញការងាររបស់អ្នកស្រីនៅក្នុងការស្ទង់មតិថ្នាក់ជាតិភាគច្រើនឆ្លុះបញ្ចាំងពីលោក Biden ក៏ប៉ុន្តែ ការស្ទង់មតិខ្លះរបស់អ្នកបោះឆ្នោតបង្ហាញថា អ្នកស្រី Harris មានភាពប្រសើជាងបន្តិចជាងលោក Biden នៅក្នុងការតទល់នឹងលោក Trump។ ក្នុងការស្ទង់មតិខ្លះ អ្នកស្រីបាននាំមុខលោក Trump។
អ្នកស្រី Harrisបានបញ្ជាក់នៅក្នុងសេចក្តីថ្លែងការណ៍ថាលោក Biden ដែលដកខ្លួនចេញពីការប្រកួតប្រជែងប្រឆាំងនឹងលោក Trump «កំពុងធ្វើអ្វីដែលលោកបានធ្វើទូទាំងជីវិតនៃការបម្រើការងាររបស់លោកដោយការដាក់ប្រជាពលរដ្ឋអាមេរិកាំងនិងប្រទេសរបស់លោកមុនអ្វីៗទាំងអស់»។
កាលពីព្រឹកថ្ងៃចន្ទ យុទ្ធនាការរបស់ អ្នកស្រី Harris បាននិយាយថាខ្លួនបានប្រមូលថវិកាចំនួន៤៩លាន៦សែនដុល្លារនៅក្នុងការផ្តល់វិភាគទានប្រាក់ដុល្លារចំនួនតូចៗ ចាប់តាំងពីលោក Biden បានដកខ្លួនចេញពីការប្រកួតប្រជែងហើយអ្នកស្រីបានប្រកាសជាបេក្ខជន។ ការណ៍នេះផ្ទុយស្រឡះទៅនឹងប៉ុន្មានសប្តាហ៍នៃការធ្លាក់ចុះនៃការគាំទ្រលោក Biden ជាពិសេស ក្នុងចំណោមអ្នកផ្តល់វិភាគទានសំខាន់ៗ បន្ទាប់ពីការជជែកដេញដោលមិនបានល្អរបស់លោក Biden នៅចុងខែមិថុនាតទល់នឹងលោក Trump មក៕
