រដ្ឋមន្ត្រីការបរទេសអូស្រ្តាលីអ្នកស្រី Penny Wong បានលើកឡើងនូវកង្វល់ប្រាប់រដ្ឋមន្ត្រីការបរទេសចិនកាលពីថ្ងៃសុក្រអំពីការជូនដំណឹងមិនគ្រប់គ្រាន់របស់កងទ័ពជើងទឹកចិនអំពីការធ្វើសមយុទ្ធបាញ់គ្រាប់ពិតក្នុងផ្ទៃទឹកអន្តរជាតិនៅចន្លោះប្រទេសអូស្រ្តាលីនិងនូវែលសេឡង់ ដែលការធ្វើសមយុទ្ធនេះបានបង្ខំឲ្យយន្តហោះរបស់ក្រុមហ៊ុនអាកាសចរណ៍នានាប្តូរផ្លូវហោះហើររបស់ខ្លួន។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ក្រុមហ៊ុនអាកាសចរណ៍ដូចជា Qantas, Emirates និង Air New Zealand បានប្ដូរផ្លូវហោះហើរនៅចន្លោះប្រទេសអូស្រ្តាលីនិងនូវែលសេឡង់កាលពីថ្ងៃសុក្រ ក្រោយពីចិនបានផ្សាយសារមួយថាកងទ័ពជើងទឹករបស់ខ្លួននឹងធ្វើសមយុទ្ធបាញ់គ្រាប់ពិតនៅដែនទឹកអន្តរជាតិផុតពីមាត់សមុទ្រនៃរដ្ឋ New South Wales របស់អូស្ត្រាលី។
នាវាចម្បាំង នាវាល្បាត និងនាវាជំនួយរបស់ចិនបានចូលកៀកដែនសមុទ្ររបស់អូស្ត្រាលីកាលពីសប្តាហ៍មុន ហើយបានធ្វើដំណើរបន្តតាមសមុទ្រនៅផ្នែកខាងកើតរបស់អូស្ត្រាលីក្នុងសប្តាហ៍នេះ។ កងទ័ពជើងទឹកនិងជើងអាកាសរបស់អូស្ត្រាលីនិងនូវែលសេឡង់បានតាមឃ្លាំមើលការធ្វើដំណើររបស់នាវាចិនទាំងនេះ។
កាលពីថ្ងៃសុក្រ កងទ័ពជើងទឹកចិនបានផ្សាយតាមប៉ុស្តិ៍វិទ្យុរបស់យន្តហោះស៊ីវិលថាខ្លួនមានបំណងធ្វើសកម្មភាពបាញ់គ្រាប់ពិតក្នុងសមុទ្រ Tasman ដែលស្ថិតនៅចម្ងាយ ៦៤១ គីឡូម៉ែត្រពីក្រុង Eden របស់អូស្ត្រាលី។ នេះបើយោងតាមសេចក្តីថ្លែងការណ៍របស់អ្នកនាំពាក្យក្រសួងការពារជាតិអូស្ត្រាលី។
សេចក្តីថ្លែងការណ៍ដែលបានផ្តល់ជូន Reuters នោះសរសេរថា៖ «កងទ័ពជើងទឹកចិនមិនបានជូនដំណឹងដល់ក្រសួងការពារជាតិអូស្ត្រាលីអំពីបំណងរបស់ខ្លួនដើម្បីធ្វើសកម្មភាពបាញ់គ្រាប់ពិតនោះទេ ហើយក៏មិនបានផ្តល់ព័ត៌មានបន្ថែមអ្វីដែរ»៕
