ទោះបីយ៉ាងណាក៏ដោយ ភរិយារបស់លោក Jiang និងក្រុមអង្គការសិទ្ធិមនុស្សនានាបានរិះគន់ការជំនុំជម្រះនោះថា «គ្រាន់តែជាការកាត់ទោសបែបសម្ដែងមួយ» តែប៉ុណ្ណោះ ដោយនិយាយថា ពួកគេមិនជឿថា លោក Jiang សារភាពចេញពីចិត្តខ្លួនឯងនោះទេ។
ខ្សែវីដេអូឃ្លីបនៃការជំនុំជម្រះក្តី ដែលតុលាការចិនបានហៅថាជា ការកាត់ទោស «បើកចំហជាសាធារណៈ» មួយ ត្រូវបានបង្ហោះនៅលើគណនី Weibo របស់តុលាការសម្រាប់មើលជាសាធារណៈ។
ការសារភាពទទួលកំហុស
នៅក្នុងការថ្លែងបញ្ចប់របស់លោក លោក Jiang ត្រូវបានគេឃើញថា បានធ្វើការសារភាពជាសាធារណៈពីបទឧក្រិដ្ឋ ដែលត្រូវបានចោទប្រកាន់មកលើរូបលោក។ លោក Jiang បានអានសេចក្ដីថ្លែងការណ៍សរសេរទុកជាមុនមួយទៅកាន់តុលាការថា៖
«ខ្ញុំទទួលស្គាល់យ៉ាងពេញលេញថា ខ្ញុំបានញុះញង់ឲ្យមានការផ្ដួលរំលំរដ្ឋអំណាច ក្នុងគោលបំណង ផ្ដួលរំលំរបបសង្គមនិយម ដែលនេះជាការរំលោភបំពានច្បាប់ឧក្រិដ្ឋកម្ម និងជាបទល្មើសមួយ។ ខ្ញុំសូមសារភាពឲ្យអស់ពីចិត្ត។ ហើយខ្ញុំពិតជា សោកស្ដាយយ៉ាងខ្លាំង ចំពោះអ្វីដែលខ្ញុំបានធ្វើ»។
ស្របពេលដែលស្នើសុំការសម្រាលទោសទណ្ឌពីចៅក្រម លោក Jiang បានបន្ថែមថា លោកសង្ឃឹមថា សកម្មជនសិទ្ធិមនុស្សដទៃទៀតអាចចាត់ទុករូបលោកជាមេរៀន។
ការរិះគន់រដ្ឋាភិបាល
នៅក្នុងអំឡុងពេលជំនុំជម្រះក្តី ក្រុមរដ្ឋអាជ្ញាបានចោទប្រកាន់លោក Jiang ពីការសរសេរសារបង្ហោះចំនួនជាង ៣៣.០០០ នៅលើបណ្ដាញសង្គម Twitter មុនឆ្នាំ ២០០៩។ គេបាននិយាយថា សារបង្ហោះចំនួន ២១៤ ក្នុងចំណោមសារបង្ហោះទាំងអស់នោះ លោក Jiang បានរិះគន់រដ្ឋាភិបាលនៅក្នុងភាសាមួយដែលញុះញង់ឲ្យមានការផ្ដួលរំលំរដ្ឋអំណាច។
លោក Jiang ក៏បានរងការចោទប្រកាន់ពីការផ្ដល់បទសម្ភាសន៍ជាមួយនឹងបណ្ដាញផ្សព្វផ្សាយបរទេស ដែលក្នុងនោះរួមមាន VOA ផងដែរ ដើម្បី «លាបពណ៌» តុលាការ និងរដ្ឋាភិបាល ស្របពេលដែលលោកបានគាំទ្របុព្វហេតុរបស់សកម្មជនសិទ្ធិមនុស្សនានាដូចជា លោក Zhang Kai លោក Xie Yang និងលោក Liu Xing ។
ទាំងលោក Jiang និងទាំងមេធាវីការពារក្តីរបស់លោក មិនបានធ្វើការបដិសេធករណីចោទប្រកាន់ណាមួយនោះទេ។ ករណីចោទប្រកាន់មួយក្នុងនោះលើកឡើងថា លោក Jiang ត្រូវបានគេកំណត់ឈ្មោះថាជា អ្នកបំផុសបំផុលឲ្យភរិយាលោក Xie ធ្វើការចោទប្រកាន់ពីការធ្វើទារុណកម្មលើលោក Xie ពេលលោក Xie ត្រូវបានប៉ូលិសឃុំខ្លួន។
តុលាការបានប្រកាសថា ខ្លួននឹងចេញសាលក្រមនៅពេលក្រោយ។
សក្ខីកម្មបញ្ជាក់ពីភាពស្អាតស្អំរបស់លោក Jiang
ដោយទទូចពីភាពស្អាតស្អំរបស់លោក Jiang ភរិយារបស់លោក អ្នកស្រី Jin Bianling បានអះអាងថា ការកាត់ទោសបើកចំហជាសាធារណៈកាលពីថ្ងៃអង្គារសប្ដាហ៍នេះ គឺជា សក្ខីកម្មបង្ហាញពីការជំរុញរកយុត្តិធម៌របស់ស្វាមីលោកស្រីទៅវិញទេ។
អ្នកស្រី Jin ដែលបានរស់នៅសហរដ្ឋអាមេរិកតាំងពីឆ្នាំ ២០១៣មក ដើម្បីគេចពីការធ្វើទុក្ខបុកម្នេញពីសំណាក់រដ្ឋាភិបាលចិន បានប្រាប់ VOA តាមទូរស័ព្ទថា៖
«អ្នកដែលមានការយល់ដឹងត្រឹមត្រូវឃើញថា នៅពីក្រោយការចោទប្រកាន់ទាំងនោះ លោក Jiang មិនបានធ្វើអ្វីខុសនោះទេ ប៉ុន្តែគឺលោកបានគាំទ្រក្រុមដែលមិនមានសំឡេងនៅក្នុងសង្គម ដើម្បីបុព្វហេតុសង្គមតែប៉ុណ្ណោះ»។
មុនពេលការចាប់ខ្លួនរបស់លោកកាលពីខែវិច្ឆិកា លោក Jiang វ័យ ៤៦ ឆ្នាំរូបនេះ បានធ្វើការនៅលើរឿងក្តីធំៗជាច្រើន ដូចជារឿងក្ដីក្រុមអ្នកប្រតិបត្តិសាសនា Falun Gong រឿងក្ដីបាតុករទីបេ និងជនរងគ្រោះក្នុងរឿងអាស្រូវម្សៅទឹកដោះគោពុលឆ្នាំ ២០០៨ ជាដើម មុនពេលលោកត្រូវបានហាមឃាត់មិនឲ្យធ្វើសកម្មភាពគាំពារសិទ្ធិមនុស្សរបស់លោកក្នុងឆ្នាំ ២០០៩។
លោកបានរិះគន់ការបង្ក្រាបជាបន្តបន្ទាប់របស់រដ្ឋាភិបាលទៅលើក្រុមអ្នករិះគន់ ដែលកន្លងមករដ្ឋាភិបាលបានចាប់មេធាវី និងសកម្មជនការពារសិទ្ធិមនុស្សរាប់រយនាក់ ដាក់ឃុំឃាំង និងកាត់ទោស ចាប់តាំងពីខែកក្កដា ឆ្នាំ ២០១៥ មក។
ការជំនុំជម្រះក្ដីដ៏អាម៉ាស់មួយទៀត
ទោះបីជាមានការទង្គុកក្នុចិត្តក៏ដោយ ក៏អ្នកស្រី Jin និយាយថា អ្នកស្រីនៅតែគិតថា លោក Jiang ត្រូវបានគេដាក់ថ្នាំ និងធ្វើទារុណកម្ម បន្ទាប់ពីជាប់ឃុំអស់រយៈពេលជាច្រើនខែ ដោយមិនអាចជួបជាមួយនឹងក្រុមគ្រួសារ ឬមេធាវី ដែលជ្រើសឡើងដោយក្រុមគ្រួសាររបស់លោកដដែល។
ពិសេសជាងនេះទៅទៀត អ្នកស្រីបានបន្ថែមថា អ្នកស្រីមានអារម្មណ៍សោកសៅ នៅពេលដឹងថា ឪពុកក្មេករបស់អ្នកស្រីត្រូវគេបង្ខំឲ្យមានវត្តមាន នៅតុលាការ ដើម្បី ត្រូវអង្គុយមើល «ការជំនុំជម្រះក្តីដ៏អាម៉ាស់» មួយ នៅក្នុងវ័យជាង ៧០ ឆ្នាំ បន្ទាប់ពីឪពុកក្មេករបស់អ្នកស្រីផ្ទាល់ធ្លាប់បានឆ្លងកាត់សម័យកាលបដិវត្តន៍វប្បធម៌។
អ្នកស្រី Jin និយាយថា អ្នកស្រីគិតថា លោក Jiang និងឪពុកម្តាយរបស់លោកអាចនឹងបាត់ខ្លួន នៅពេលអនាគត បន្ទាប់ពីតុលាការដោះលែងលោក Jiang ឲ្យនៅក្រៅឃុំ ដែលការណ៍នេះស្រដៀងនឹងអ្វីដែលបានកើតឡើងចំពោះលោកមេធាវី Xie។
ប៉ុន្តែអ្នកស្រីបានប្ដេជ្ញាធ្វើញត្តិទៅកាន់រដ្ឋាភិបាលអាមេរិកចំពោះការប្រព្រឹត្តមិនគប្បីលើលោក Jiang និងការដោះលែងខ្លួនលោកដោយប្រញាប់ប្រញាល់។
ការពង្រឹងការបង្ក្រាបទៅលើក្រុមអ្នករិះគន់
អ្នកស្រី Maya Wang អ្នកស្រាវជ្រាវអំពីកិច្ចការប្រទេសចិននៃអង្គការ Human Rights Watch បាននិយាយថា ការកាត់ទោសលោក Jiang ស្រដៀងទៅនឹងការកាត់ទោសសកម្មជនសិទ្ធិមនុស្សដទៃទៀត ដែលមួយចំនួនត្រូវគេបង្ខំឲ្យសារភាព ជាថ្នូរនឹងការដោះលែងឲ្យនៅក្រៅឃុំ ខណៈដែលអ្នកដទៃទៀតដូចជា លោកមេធាវី Zhou Shifeng ជាដើម នៅតែទទួលបានការផ្ដន្ទាទោសឲ្យជាប់ពន្ធនាគារប្រាំពីរឆ្នាំ ទោះបីជា លោកបានសារភាពកំហុសក៏ដោយ។
អ្នកស្រី Wang បានប្រាប់ VOA ថា៖
«វាពិបាកនឹងជឿថា គាត់សារភាពចេញពីចិត្តណាស់។ ខ្ញុំគិតថា អ្វីដែលបានបង្ហាញឡើងនេះ គឺការប្រើប្រាស់អំណាចតុលាការកាន់តែខ្លាំងពីសំណាក់អាជ្ញាធរ [ដើម្បីដាក់ទោសលើសកម្មជនសិទ្ធិមនុស្ស]។ ពិតណាស់ តុលាការចិន ត្រូវបានគេស្គាល់ជាយូរមកហើយថា ស្ថិតក្រោមការគ្រប់គ្រងរបស់បក្សកុម្មុយនិស្តចិន»។
អ្នកស្រាវជ្រាវ ដែលរស់នៅក្រុងហុងកុងរូបនេះ បន្តអះអាងថា ទោះបីជាមានការបន្ធូរបន្ថយមួយចំនួននៃការកាត់ទោសរឿងនយោបាយ ដោយមានការអនុញ្ញាតឲ្យជួបក្រុមគ្រួសារ និងការកាត់ទោស «បើកចំហជាសាធារណៈ» ក៏ដោយ ក៏អ្វីទាំងអស់នេះធ្វើឡើង គ្រាន់តែជាសញ្ញានៃការពង្រឹងការបង្ក្រាបរបស់អាជ្ញាធរទៅលើក្រុមសកម្មជនការពារសិទ្ធិមនុស្សតែប៉ុណ្ណោះ៕
ប្រែសម្រួលដោយ ណឹម សុភ័ក្ត្របញ្ញា
