ប្រធានាធិបតីចិនលោក Xi Jinping និងនាយករដ្ឋមន្ត្រីអ៊ីតាលីអ្នកស្រី Giorgia Meloni បានពិភាក្សាអំពីសង្គ្រាមនៅអ៊ុយក្រែននិងវិបត្តិនៅមជ្ឈិមបូព៌ា ក្នុងជំនួបមួយនៅទីក្រុងប៉េកាំងកាលពីថ្ងៃចន្ទ។ នេះបើយោងតាមទីភ្នាក់ងារសារព័ត៌មាន Reuters ដែលបានរាយការណ៍នៅថ្ងៃចន្ទ ដោយស្រង់ប្រភពពីខុទ្ទកាល័យរបស់អ្នកស្រី Meloni។
ក្នុងពេលជួបពិភាក្សាគ្នានោះ អ្នកស្រី Meloni ដែលប្រទេសរបស់អ្នកស្រីបច្ចុប្បន្ន ធ្វើជាប្រធានផ្លាស់វេនក្រុមប្រទេសទាំង៧ដែលមានសេដ្ឋកិច្ចជឿនលឿនជាងគេក្នុងពិភពលោក ឬG7 បានសង្កត់ធ្ងន់អំពីសារៈសំខាន់របស់ចិនក្នុងនាមជាដៃគូមួយក្នុងការដោះស្រាយបញ្ហាអសន្តិសុខសកលលោកដែលកើនឡើង។
ខុទ្ទកាល័យរបស់មេដឹកនាំអ៊ីតាលី បានបញ្ជាក់ក្នុងសេចក្តីថ្លែងការណ៍មួយថាមេដឹកនាំទាំងពីរ បាននិយាយអំពី«បញ្ហាអាទិភាពក្នុងរបៀបវារៈអន្តរជាតិរាប់តាំងពីសង្គ្រាមនៅអ៊ុយក្រែនដល់ហានិភ័យនៃស្ថានភាពកាន់តែតានតឹងឡើងនៅមជ្ឈិមបូព៌ា។ មេដឹកនាំទាំងពីរ ក៏បានពិភាក្សាអំពីភាពតានតឹងកាន់តែខ្លាំងនៅតំបន់ឥណ្ឌូប៉ាស៊ីហ្វិកផងដែរ»។
អ្នកស្រី Meloni កំពុងស្វះស្វែងភ្ជាប់ទំនាក់ទំនងសេដ្ឋកិច្ចរបស់អ៊ីតាលីជាមួយចិនឡើងវិញ ក្រោយពីអ៊ីតាលីបានចាកចេញពីគម្រោងក្រវាត់ផ្លូវពាណិជ្ជកម្មរបស់លោក Xi កាលពីឆ្នាំមុន ហើយក្នុងពេលដែលទំនាក់ទំនងពាណិជ្ជកម្មកាន់តែធ្លាក់ចុះរវាងលោកខាងលិចនិងប្រទេសចិនដែលមានសេដ្ឋកិច្ចធំជាងគេទី២លើពិភពលោក៕
