កាសែត New York Times បានឲ្យដឹងថា ការស្ថាបនាផ្លូវយន្តហោះរបស់ចិននៅក្នុងប្រទេសកម្ពុជាកំពុងធ្វើឱ្យមានការព្រួយបារម្ភអំពីមហិច្ឆតាយោធាចិន។
ទីភ្នាក់ងារព័ត៌មាន Bloomberg បានរាយការណ៍ថា រដ្ឋាភិបាលក្រុងប៉េកាំងឥឡូវនេះគ្រប់គ្រងតំបន់ឆ្នេរសមុទ្រកម្ពុជា ២០ ភាគរយតាមរយៈការជួលរមនីយដ្ឋានតារាសាគរ ដែលអ្នកម៉ៅការកំពុងសាងសង់ព្រលានយន្តហោះ កំពង់ផែទឹកជ្រៅ មណ្ឌសសុខាភិបាល និងរមណីយដ្ឋាន។
កាសែត New York Times ថា ចិនបានអះអាងថា រមនីយដ្ឋានតារាសាគរដែលមានផ្លូវយន្តហោះចុះវែងជាងគេនៅកម្ពុជានោះគឺជាទីតាំងស៊ីវិល។
ទោះយ៉ាងណាកាសែតនេះរាយការណ៍ថា ទំហំសាងសង់និងឆ្នេរសមុទ្ររឆេងរឆូញសម្រាប់ផ្ទុកយន្តហោះចម្បាំងនោះ បង្ហាញគោលបំណងខាងយោធា។
ក្រុមហ៊ុនអភិវឌ្ឍន៍ Union Development Group ដែលមានមូលដ្ឋាននៅប្រទេសចិន ទទួលបានអាជ្ញាបណ្ណកាន់កាប់តំបន់វិនិយោគតារាសាគររយៈពេល៩៩ឆ្នាំ។
ដោយដកស្រង់សម្តីលោក អៀរ សុផល អ្នកវិទ្យាសាស្ត្រនយោបាយនៅមហាវិទ្យាល័យ Occidental កាសែត New York Times បានរាយការណ៍ថា ការសាងសង់ផ្លូវយន្តហោះរបស់ចិននេះគឺដើម្បីបង្កើនអំណាចនៅក្នុងតំបន់។
កាសែត New York Times ឲ្យដឹងថា សំណង់នៅកម្ពុជានេះទំនងជាការផ្លាស់ប្តូរយុទ្ធសាស្ត្រយោធារបស់រដ្ឋាភិបាលក្រុងប៉េកាំងដែលត្រូវបានគេហៅថា«ខ្សែគុជ»។
យុទ្ធសាស្ត្រនេះពាក់ព័ន្ធនឹងការបង្កើតហេដ្ឋារចនាសម្ព័ន្ធនិងមូលដ្ឋានយោធាដែលលាតសន្ធឹងចាប់ពីសមុទ្រចិនខាងត្បូងដល់មហាសមុទ្រឥណ្ឌា និងលើសពីនេះទៅទៀត៕
