ក្រុមហ៊ុនអយស្ម័យានចិននឹងដំឡើងតម្លៃសំបុត្ររថភ្លើងលឿនលឿនចំនួន ៤ ខ្សែរវាងពី ២០% ទៅ ៤០% នៅថ្ងៃទី ១៥ ខែមិថុនាខាងមុខ បើទោះបីជាខ្សែរថភ្លើងទាំងនោះកំពុងរកចំណូលបានច្រើនរួចហើយក៏ដោយ។
បើយោងតាមក្រុមហ៊ុន Sina Finance ទិន្នន័យហិរញ្ញវត្ថុរបស់ក្រុមហ៊ុនអយស្ម័យានចិនសម្រាប់ឆ្នាំ ២០២៣ បានបង្ហាញថា ប្រាក់ចំណេញសុទ្ធរបស់ក្រុមហ៊ុនបានប្រែក្លាយពីអវិជ្ជមានទៅវិជ្ជមានដោយឡើងដល់ចំនួនប្រហែល ៤៥៦,៨ លានដុល្លារ ហើយដំណើរការប្រតិបត្តិការរបស់ក្រុមហ៊ុននេះគឺល្អបំផុតនៅក្នុងប្រវត្តិសាស្ត្រ។
សេចក្ដីប្រកាសអំពីការដំឡើងតម្លៃសំបុត្ររថភ្លើងនេះដែលបានផ្សព្វផ្សាយកាលពីថ្ងៃទី ២ ខែឧសភាកន្លងទៅនេះ បានយោងលើ «ថ្លៃចំណាយលើប្រតិបត្តិការនានាដូចជាការថែទាំផ្លូវរថភ្លើង ការទិញទូរថភ្លើង ការកែលម្អឧបករណ៍ និងពលកម្ម» សម្រាប់ការបង្កើនតម្លៃសំបុត្រនេះ។
សេចក្តីប្រកាសនេះបានបញ្ជាក់ថា ផ្លូវរថភ្លើងដែលរងការប៉ះពាល់រួមមានផ្លូវរថភ្លើងពីទីក្រុង Wuhan ទៅទីក្រុង Guangzhou ដែលជាផ្នែកមួយនៃផ្លូវរថភ្លើងល្បឿនលឿនពីរដ្ឋធានីប៉េកាំងទៅទីក្រុង Guangzhou និងផ្លូវរថភ្លើងពីទីក្រុង Hangzhou ទៅទីក្រុង Changchun ដែលជាផ្នែកមួយនៃផ្លូវរថភ្លើងល្បឿនលឿនពីទីក្រុងសៀងហៃទៅទីក្រុង Kunming។
អ្នកវិភាគខ្លះជឿថា ការដំឡើងតម្លៃនេះបណ្តាលមកពីរដ្ឋាភិបាលថ្នាក់ជាតិនិងរដ្ឋបាលមូលដ្ឋានខ្វះថវិកានៅពេលដែលសេដ្ឋកិច្ចចិនបានចុះខ្សោយ។
លោក Wang Kuo-chen ដែលជាអ្នកស្រាវជ្រាវជំនួយការនៅវិទ្យាស្ថាន Chung-Hua សម្រាប់ការស្រាវជ្រាវសេដ្ឋកិច្ច (Chung-Hua Institute for Economic Research) នៅទីក្រុងតៃប៉ិ កោះតៃវ៉ាន់ បានប្រាប់ VOA ថា ចំណូលដ៏ច្រើនកាលពីឆ្នាំមុនរបស់អយស្ម័យានចិននេះគឺជា «ចំណូលបន្ទាប់ពីការកាត់បន្ថយថ្លៃចំណាយលើប្រតិបត្តិការ» ប៉ុណ្ណោះ ដោយវាមិនរាប់បញ្ចូលនូវបំណុលដែលបណ្តាលមកពីការវិនិយោគផ្នែកសំណង់នោះឡើយ។
ប្រព័ន្ធផ្សព្វផ្សាយព័ត៌មាន The Paper របស់ចិនបានរាយការណ៍កាលពីថ្ងៃទី ២០ ខែកក្កដា ឆ្នាំ ២០២៣ ថា ដោយសារការខាតបង់ដ៏ធ្ងន់ធ្ងរផ្នែកអយស្ម័យាន ស្ថានីយរថភ្លើងល្បឿនលឿនជាង ២០ កន្លែងដែលបានបញ្ចប់ការសាងសង់រួចហើយមិនត្រូវបានដាក់ឱ្យប្រើប្រាស់ឬក៏ត្រូវបានបញ្ឈប់ដំណើរការ។
ការដំឡើងតម្លៃសំបុត្ររថភ្លើងនេះបានរងការរិះគន់នៅលើបណ្តាញសង្គមអនឡាញនានាដូចជា Douyin និង Weibo ជាដើម។ ពលរដ្ឋម្នាក់បានសរសេរថា៖ «ចំណូលរបស់អយស្ម័យាននេះមិនជាប់ពាក់ព័ន្ធអ្វីជាមួយនឹងខ្ញុំទេ ក៏ប៉ុន្តែខ្ញុំត្រូវរួមចំណែកទទួលរងនូវការប៉ះពាល់នេះ»។
កាសែត South China Morning Post បានរាយការណ៍ថា វិស័យសាធារណៈរបស់ចិនកំពុងរងសម្ពាធឱ្យបង្កើនតម្លៃសម្រាប់សេវាកម្មខ្លះដូចជាថ្លៃសំបុត្ររថភ្លើងនិងថ្លៃទឹកភ្លើងជាដើម នៅចំពេលដែលថវិកាមូលដ្ឋានមានកម្រិតនិងការអូសបន្លាយយូរនៃហានិភ័យបរិត្តផរណា។
ពលរដ្ឋក្រុងសៀងហៃម្នាក់ ដែលបានប្រាប់តែនាមត្រកូលថាឈ្មោះ Shi ដោយសារមូលហេតុឯកជនភាព ជាអ្នកធ្វើដំណើរតាមរថភ្លើងល្បឿនលឿននេះទៅធ្វើការនៅទីក្រុង Hangzhou និងត្រឡប់មកសៀងហៃវិញរៀងរាល់សប្តាហ៍។
អ្នកស្រី Shi បានប្រាប់ VOA ថា អ្នកធ្វើការវិជ្ជាជីវៈដូចអ្នកស្រីដែលធ្វើដំណើររៀងរាល់សប្តាហ៍អាចចំណាយលើថ្លៃធ្វើដំណើរតាមរថភ្លើងល្បឿនលឿននេះបាន។
អ្នកស្រីបានបញ្ជាក់ថា អ្នកដំណើរភាគច្រើនដែលធ្វើដំណើរតាមរថភ្លើងល្បឿនលឿននេះជារៀងរាល់ថ្ងៃគឺជាអ្នកធ្វើដំណើរបែបការងារវិជ្ជាជីវៈដែលត្រូវបាននិយោជករបស់ខ្លួនចេញសោហ៊ុយចំណាយឱ្យ។
អ្នកស្រី Lynn Ling ដែលជាអ្នកនិពន្ធដែលបានធ្វើចំណាកស្រុកពីទីក្រុង Chengdu នៃប្រទេសចិនទៅកាន់កោះតៃវ៉ាន់ បាននិយាយថា ការដំឡើងតម្លៃសំបុត្ររថភ្លើងល្បឿនលឿននេះគឺពិតជាបានបន្ថែមការឈឺចាប់បន្ថែមទៀតដល់អ្នកធ្វើដំណើរតាមរថភ្លើងនេះ នៅពេលដែលប្រាក់បៀវត្សរ៍របស់មនុស្សជាច្រើនបានធ្លាក់ចុះ ប៉ុន្តែតម្លៃទំនិញចាំបាច់ប្រចាំថ្ងៃបានកើនឡើង។
អ្នកស្រីបានប្រាប់ VOA ថា ផ្លូវរថភ្លើងល្បឿនលឿនរបស់ចិននិងសេដ្ឋកិច្ចដែលពឹងផ្អែកលើវិស័យអចលនទ្រព្យគឺជាប់ពាក់ព័ន្ធគ្នាយ៉ាងខ្លាំង ដោយសារតែស្ថានីយរថភ្លើងល្បឿនលឿនភាគច្រើនស្ថិតនៅជាយក្រុងឆ្ងាយពីទីក្រុង ដែលជាកន្លែងដែលមជ្ឈមណ្ឌលលក់ដូរធំៗនិងតំបន់រស់នៅត្រូវបានគ្រោងទុកក្នុងក្ដីសង្ឃឹមថាផ្លូវរថភ្លើងល្បឿនលឿននេះនឹងបង្កើតអាជីវកម្មផ្សេងៗសម្រាប់តំបន់ទាំងនោះ។
អ្នកស្រី Ling បានបញ្ជាក់ថា ដោយសារការដួលរលំនៃសេដ្ឋកិច្ចពឹងផ្អែកលើវិស័យអចលនទ្រព្យរបស់ចិន គេឃើញថាអគារនិងហាងលក់ដូរថ្មីៗដែលស្ថិតនៅជិតស្ថានីយរថភ្លើងល្បឿនលឿនភាគច្រើននៅទំនេរទុកចោល។ អ្នកស្រីបានកត់សម្គាល់ថា ការអះអាងដែលថា «ផ្លូវរថភ្លើងល្បឿនលឿននឹងជំរុញពាណិជ្ជកម្ម» គឺជាការគិតខុស។
សម្រាប់អ្នកស្រី Shi វិញ អ្នកស្រីជឿថា ថ្វីបើបំណុលហេដ្ឋារចនាសម្ព័ន្ធមានកម្រិតខ្ពស់ក៏ដោយ ក៏ផ្លូវរថភ្លើងល្បឿនលឿននេះនឹងបង្កើតឱ្យមានអាជីវកម្ម ភាពងាយស្រួលក្នុងការធ្វើដំណើរ និងការអភិវឌ្ឍដ៏ឆាប់រហ័សដល់តំបន់សេដ្ឋកិច្ចនានាដូចជាតំបន់ដីសណ្តទន្លេ Yangtze និងតំបន់ដីសណ្ដទន្លេ Pearl ជាដើម។
អ្នកស្រី Shi បានបញ្ជាក់ថា គេនៅទន្ទឹងរង់ចាំមើលថាតើការដំឡើងតម្លៃសំបុត្ររថភ្លើងនេះផ្ដល់ប្រយោជន៍ច្រើនជាងផលវិបាកឬក៏អត់៕
រាយការណ៍បន្ថែមដោយអ្នកនាង Adrianna Zhang។
ប្រែសម្រួលដោយលោក ជឹង ប៉ូជីន
