បន្ទាប់ពីលោកហ៊ុន សែន និងក្រុមមន្ត្រីយោធាកម្ពុជាបដិសេធព័ត៌មានអំពីកិច្ចព្រមព្រៀងសម្ងាត់កម្ពុជាចិនសម្រាប់ដាក់កងទ័ពជើងទឹកចិននៅកម្ពុជានោះ អ្នកនាំពាក្យក្រសួងការពារជាតិចិននៅថ្ងៃពុធនេះបានចេញមុខបដិសេធថា មិនមានកិច្ចព្រមព្រៀងសម្ងាត់ណាមួយជាមួយប្រទេសកម្ពុជា ដើម្បីដាក់មូលដ្ឋានកងទ័ពជើងទឹកចិនក្នុងដែនសមុទ្ររាម នៅខេត្តព្រះសីហនុនោះទេ។
កាសែត The Wall Street Journal ដែលចេញផ្សាយកាលពីថ្ងៃអាទិត្យបានសរសេរថា ប្រទេសកម្ពុជា និងចិនបានចុះហត្ថលេខារួមគ្នាលើកិច្ចព្រមព្រៀងនោះកាលពីនិទាឃរដូវកន្លងទៅ។ ក្នុងកិច្ចព្រមព្រៀងនោះ កម្ពុជាផ្តល់ឲ្យភាគីចិននូវសិទ្ធិផ្តាច់មុខធ្វើមូលដ្ឋានទាហានជើងទឹកចិនមួយផ្នែកនៅឈូងសមុទ្រខ្មែរ ហើយនៅជិតអាកាសយានដ្ឋានធំមួយ ដែលកសាងដោយប្រទេសចិន។
The Wall Street Journal បញ្ជាក់បន្ថែមថា កិច្ចព្រមព្រៀងនោះនឹងអនុញ្ញាតឲ្យប្រទេសចិនប្រើកំពង់ផែកម្ពុជាជាមូលដ្ឋានយោធារយៈពេល៣០ឆ្នាំ ដើម្បីដាក់កងទ័ព ផ្ទុកសព្វាវុធ និងកន្លែងចតនាវាជាដើម ហើយកិច្ចព្រមព្រៀងនេះអាចបន្តដប់ឆ្នាំម្តងក្រោយពីចប់កុងត្រា។
អ្នកនាំពាក្យក្រសួងការពារជាតិចិន លោក Wu Qian ឆ្លើយតបថា នេះជាព័ត៌មាន«ចចាមអារ៉ាម និងថា ជារបាយការណ៍មិនពិត»។
លោក Wu បានឆ្លើយទៅនឹងសំណួររបស់អ្នកសារព័ត៌មានក្នុងសន្និសីទកាសែតក្នុងឱកាសដែលប្រទេសចិនចេញផ្សាយសៀវភៅសរបស់ក្រសួងការពារជាតិចិនក្នុងទីក្រុងប៉េកាំង នៅពុធទី២៤ ខែកក្កដានេះ។
តាមរយៈការផ្សាយតាមបណ្តាញទូរទស្សន៍រដ្ឋចិន CGTN លោក Wu Qian និយាយជាភាសាចិន ដោយមានអ្នកបកប្រែជាភាសាអង់គ្លេសថា៖ «ប្រទេសចិន និងកម្ពុជាមានកិច្ចសហប្រតិបត្តិការលើការហ្វឹកហ្វឺនយោធាជាមួយគ្នា ព្រមទាំងការផ្តល់ជំនួយដល់គ្នាទៅវិញទៅមក ហើយកិច្ចសហប្រតិបត្តិការទ្វេភាគីនេះគឺគ្មានការកំណត់គោលដៅទៅលើប្រទេសទីបីណាមួយឡើយ»។
កាលពីថ្ងៃចន្ទ លោកនាយករដ្ឋមន្ត្រី ហ៊ុន សែន ក៏បានបដិសេធសេចក្តីរាយការណ៍របស់កាសែត The Wall Street Journal នេះដែរ ដោយលោកហៅសេចក្តីរាយការណ៍ព័ត៌មាននោះថា «ជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា»។
លោកហ៊ុន សែន បានគូសបញ្ជាក់ថា កម្ពុជាមិនដែលបានធ្វើការពិភាក្សាណាមួយជាមួយប្រទេសចិនអំពីការដាក់មូលដ្ឋានកងទ័ពចិនក្នុងមូលដ្ឋានកងទ័ពជើងទឹកកម្ពុជានោះទេ។
កាសែត The Wall Street Journal របស់សហរដ្ឋអាមេរិកបានរាយការណ៍បន្ថែមថា ប្រសិនបើចិនមានមូលដ្ឋានទ័ពជើងទឹកនៅក្នុងឈូងសមុទ្រប្រទេសកម្ពុជា នោះចិននឹងមានឥទ្ធិពលខ្លាំងឡើងចំពោះបញ្ហាសេដ្ឋកិច្ច និងមានប្រៀបលើដែនសមុទ្រចិនខាងត្បូង ដែលកំពុងមានវិវាទជាមួយប្រទេសមួយចំនួនក្នុងតំបន់អាស៊ាន។
ជាមួយគ្នានោះ អ្នកនាំពាក្យស្ថានទូតសហរដ្ឋអាមេរិកនៅកម្ពុជា អ្នកស្រី Emily V Zeeberg បានផ្ញើសារអេឡិចត្រូនិកមកកាន់ VOA ដោយបង្ហាញពីការព្រួយបារម្ភ«អំពីវត្តមានយោធាបរទេសនៅក្នុងទឹកដីកម្ពុជា ដោយថា វាអាច«គំរាមកំហែងដល់ទំនាក់ទំនង និងភាពជាកណ្តាលរបស់កម្ពុជាក្នុងនាមជាប្រទេសក្នុងអាស៊ាន»។
អ្នកកាទូតដដែលបានអំពាវនាវឲ្យអ្នកដឹកនាំកម្ពុជាគោរពការប្តេជ្ញានៅក្នុងរដ្ឋធម្មនុញ្ញរបស់ខ្លួន ក្នុងការគោរពនយោបាយការបរទេសឯករាជ្យ និងការពារឯករាជ្យភាព និងអធិបតេយ្យភាពរបស់ខ្លួន។
នៅថ្ងៃអង្គារ លោកសម រង្ស៊ី ប្រធានស្តីគណបក្សសង្គ្រោះជាតិ ដែលត្រូវបានតុលាការកម្ពុជារំលាយកាលពីចុងឆ្នាំ២០១៧ បានចេញសេចក្តីថ្លែងការណ៍មួយ ដោយបញ្ជាក់ថា «ប្រទេសកម្ពុជាត្រូវតែធ្វើឱ្យមានភាពឯករាជ្យ និងមិនត្រូវបានរួមបញ្ចូលជាមួយប្រទេសចិនដែលមានមហិច្ឆតាខ្ពស់នោះទេ»៕
