គណបក្សប្រឆាំងធំបំផុតនៅកម្ពុជាទទួលបានជ័យជម្នះច្រើនជាងមុននៅក្នុងការបោះឆ្នោតក្រុមប្រឹក្សាឃុំសង្កាត់កាលពីថ្ងៃអាទិត្យ ដែលអាចគំរាមកំហែងដល់ការក្តោបក្តាប់អំណាចរបស់លោកនាយករដ្ឋមន្ត្រី ហ៊ុន សែន។
ដោយប្រកាសអំពីលទ្ធផលក្រៅផ្លូវការ លោក យឹម សុវណ្ណ អ្នកនាំពាក្យរបស់គណបក្សប្រឆាំងបានថ្លែងថា គណបក្សរបស់លោកទទួលបានជ័យជម្នះប្រហែល៤៦ភាគរយនៃឃុំសង្កាត់សរុបទាំងអស់ ដែលកើនឡើងច្រើនជាងការបោះឆ្នោតឃុំសង្កាត់កាលពី៥ឆ្នាំមុនដែលឈ្នះតែ៣០ភាគរយតែប៉ុណ្ណោះ។
លោក សុវណ្ណ បានថ្លែងនៅក្នុងសន្និសីទសារព័ត៌មានមួយថា «នេះគឺជាជោគជ័យដ៏ធំមួយសម្រាប់គណបក្សសង្គ្រោះជាតិ»។
គេហទំព័រព័ត៌មានមួយដែលគាំទ្ររដ្ឋាភិបាលបានចេញផ្សាយថា លទ្ធផលក្រៅផ្លូវការបានបង្ហាញថា គណបក្សប្រឆាំងបានឈ្នះប្រហែលមួយភាគបីនៃឃុំសង្កាត់សរុប។
លទ្ធផលផ្លូវការនៃការបោះឆ្នោតនេះនឹងត្រូវប្រកាសនៅថ្ងៃទី២៥ ខែមិថុនា ខាងមុខនេះ។
ការបោះឆ្នោតជ្រើសរើសមន្ត្រីក្រុមប្រឹក្សាឃុំសង្កាត់ជាង១២០០០នេះ ក៏ត្រូវបានគេមើលឃើញថា ជាការបង្ហាញនូវការប្រជែងគ្នារវាងគណបក្សនយោបាយពីរធំៗ ខណៈដែលមានការគំរាមកំហែងអំពីសង្គ្រាមស៊ីវិលនិងការបង្រ្កាបទៅលើការខ្វែងគំនិតខាងនយោបាយ នៅមុនការបោះឆ្នោតជាតិដែលនឹងមកដល់នៅពាក់កណ្តាលឆ្នាំក្រោយនេះ។
លោកនាយករដ្ឋមន្ត្រី ហ៊ុន សែន និងគណបក្សប្រជាជនកម្ពុជារបស់លោកមើលឃើញថា លទ្ធផលនៃការបោះឆ្នោតឃុំសង្កាត់គឺជាតេស្តដ៏សំខាន់មួយទៅលើប្រជាប្រិយភាពរបស់ខ្លួន ដែលទទួលរងសម្ពាធយ៉ាងខ្លាំងពីអ្នកបោះឆ្នោតជាយុវជននិងការផ្លាស់ប្ដូរឥរិយាបថរបស់អ្នកបោះឆ្នោត៕
