គណៈកម្មាធិការសិទ្ធិមនុស្សកម្ពុជានឹងផ្តល់មេធាវីដល់ស្ត្រីជាម្តាយរបស់ទារកអាយុ៥ខែម្នាក់រស់ក្នុងពន្ធនាគារដែលបានស្លាប់កាលពីចុងខែមករាកន្លងទៅ។
សេចក្តីថ្លែងការណ៍អង្គការសិទ្ធិមនុស្សលីកាដូ បានឲ្យដឹងថា ទារកអាយុ៥ខែម្នាក់ដែលរស់នៅជាមួយម្តាយកំពុងជាប់ឃុំនៅក្នុងមណ្ឌលអប់រំកែប្រែទីពីរ បានស្លាប់នៅមន្ទីរពេទ្យខ្មែរសូវៀត កាលពីថ្ងៃទី២៦ មករា ដោយសារជំងឺរលាកសួតនិងកង្វះអាហារូបត្ថម្ភ។
មួយថ្ងៃក្រោយការចេញសេចក្តីថ្លែងការណ៍នេះ គណៈកម្មាធិការសិទ្ធិមនុស្សកម្ពុជាបានឲ្យដឹងថា ខ្លួនបានធ្វើការស៊ើបអង្កេតទៅលើការស្លាប់នេះ ហើយ«បានរកឃើញថាស្ត្រីជាប់ឃុំរូបនេះ មិនបានទទួលព័ត៌មានគ្រប់គ្រាន់ពាក់ព័ន្ធនឹងសិទ្ធិការពារខ្លួនតាមផ្លូវច្បាប់ឡើយ ដោយមិនមានមេធាវីការពារក្តីជូនគាត់»។
លោក ជិន ម៉ាលីន អនុប្រធាននិងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បានប្រាប់វីអូអេថា៖«បើរកអ្នកទទួលខុសត្រូវប្រហែលពិបាករកព្រោះអីអ្នកពន្ធនាគារគេយកចិត្តទុកដាក់ដែរណាស់។ គេបញ្ជូនទៅមន្ទីរពេទ្យអីជាហូរហែរ។ គេមិនព្រងើយកន្តើយទេ ប៉ុន្តែដោយសារជំងឺវាធ្ងន់ធ្ងរសង្គ្រោះអត់បាន។ ជាការសោកស្តាយ»។
លោកបន្ថែមថា៖ «ហើយចំណែកសវនាការមេធាវី យើងកំពុងតែធ្វើការថាធ្វើម៉េចជំរុញឲ្យមានសវនាការឲ្យបានលឿន ហើយស្នើឲ្យនៅក្រៅឃុំបណ្តោះអាសន្ន តាមនីតិវីធីច្បាប់»។
គណៈកម្មាធិការសិទ្ធិមនុស្សកម្ពុជា បានឲ្យដឹងនៅក្នុងសេចក្តីប្រកាសព័ត៌មានដែលចេញនៅថ្ងៃពុធនេះថា៖«ពន្ធនាគារបានតាមដាន និងបញ្ជូនទារិកាទៅព្យាបាលដោយយកចិត្តទុកដាក់ គ្មានការធ្វេសប្រហែសម្តងណាឡើយ ប៉ុន្តែដោយអាការៈរបស់ទារិការូបនេះ មានសភាពធ្ងន់ធ្ងរពេក ទើបមិនអាចជួយ សង្គ្រោះបាន ហើយខាងពន្ធនាគារពិតជាមានការសោកស្តាយចំពោះការស្លាប់របស់ទារិការូបនេះ»។
ទារកដែលមានអាយុ៥ខែនោះ ត្រូវបានបញ្ជូនទៅមន្ទីរពេទ្យខ្មែរសូវៀត កាលពីថ្ងៃទី១៨ ខែមករា ហើយត្រូវបានរកឃើញថា បាក់ឆ្អឹងភ្លៅ នឹងត្រូវបានបញ្ជូនទៅមន្ទីរពេទ្យកុមារជាតិ បន្ទាប់ពីមន្ទីរពេទ្យខ្មែរសូវៀតបដិសេធមិនទទួលព្យាបាល។ ប៉ុន្តែមន្ទីរពេទ្យកុមារជាតិមិនអនុញ្ញាតឲ្យទារកនេះស្នាក់នៅមួយយប់នោះទេ ដោយអះអាងថាគ្មានបន្ទប់។ នេះបើតាមសេចក្តីថ្លែងការណ៍របស់អង្គការសិទ្ធិមនុស្សលីកាដូ៕
