សេចក្តីព្រាងច្បាប់ដែលមានឈ្មោះថា «ការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានអនុម័តដោយរដ្ឋាភិបាល នៅថ្ងៃអង្គារនេះ អាចផ្តន្ទាទោសអ្នកប្រឆាំងនឹងច្បាប់ឲ្យជាប់ពន្ធនាគាររហូតដល់ ១០ឆ្នាំ។
សេចក្តីព្រាងច្បាប់ដែលមាន ១១មាត្រានេះ ត្រូវបានផ្សព្វផ្សាយជាសាធារណៈនេះ ត្រូវបានលោក ជិន ម៉ាលីន អ្នកនាំពាក្យរបស់ក្រសួងយុត្តិធម៌ បញ្ជាក់ថា ជាសេចក្តីព្រាងច្បាប់ពិតប្រាកដ។ លោកបញ្ជាក់ដូច្នេះ ក្រោយពីលោកបានចូលរួមកិច្ចប្រជុំគណៈរដ្ឋមន្រ្តី ដឹកនាំដោយលោកនាយករដ្ឋមន្រ្តី ហ៊ុន សែន។
លោក ជិន ម៉ាលីន បានថ្លែងប្រាប់ VOA តាមទូរស័ព្ទនៅយប់ថ្ងៃអង្គារនេះថា សេចក្តីព្រាងច្បាប់នេះ ត្រូវបានអនុម័តរួចហើយក្នុងកិច្ចប្រជុំអចិន្រ្តៃយ៍គណៈរដ្ឋមន្រ្តីនៅថ្ងៃអង្គារ។ លោកបន្ថែមថា តាមនីតិវិធី សេចក្តីព្រាងច្បាប់នេះនឹងត្រូវបញ្ជូនទៅរដ្ឋសភានិងព្រឹទ្ធសភា ដើម្បីពិនិត្យនិងអនុម័តបន្ត។ លោកបដិសេធមិនអត្ថាធិប្បាយលើខ្លឹមសារនៃច្បាប់នេះ។
លោកមានប្រសាសន៍ថា៖ «ខ្ញុំមិនទាន់អត្ថាធិប្បាយទៅលើខ្លឹមសារនៅក្នុងហ្នឹងទេ»។
បើតាមសេចក្តីព្រាងច្បាប់នេះ ការដាក់ប្រទេសជាតិស្ថិតក្នុងភាពអាសន្ន អាចធ្វើឡើងនៅពេលប្រទេសប្រឈមមុខនឹងគ្រោះថ្នាក់ ជាអាទិ៍គ្រោះថ្នាក់ដែលបង្កឡើងដោយសង្រ្គាម ឬការឈ្លានពានពីកម្លាំងបរទេស គ្រោះអាសន្នបន្ទាន់ចំពោះសុខភាពសាធារណៈ បណ្តាលមកពីការឆ្លងរាលដាលនៃជំងឺ ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាល់ដល់កម្រិតទូទាំងប្រទេស។
សេចក្តីព្រាងច្បាប់បញ្ជាក់ថា ការប្រកាសដាក់ប្រទេសជាតិស្ថិតក្នុងភាពអាសន្ន ត្រូវធ្វើឡើងដោយព្រះរាជក្រឹត្យ ហើយការដាក់ប្រទេសជាតិស្ថិតក្នុងភាពអាសន្ន អាចធ្វើឡើងសម្រាប់ថិរវេលាមានកំណត់ ឬសម្រាប់ថិរវេលាមិនកំណត់។
បើតាមសេចក្តីព្រាងច្បាប់នេះ វិធានការដែលរដ្ឋាភិបាលមានសិទ្ធិដាក់ចេញ រួមមាន ហាមឃាត់ ឬកម្រិតសិទ្ធិសេរីភាពក្នុងការធ្វើដំណើរ ការជួបជុំ ហាមឃាត់ឬកម្រិតការធ្វើសកម្មភាពការងារ ឬមុខរបរ ហាមឃាត់ឬកម្រិតមិនឲ្យចេញពីលំនៅដ្ឋាន ឬទីសំណាក់ណាមួយ ការកំណត់តម្លៃទំនិញ និងសេវា ការបិទទីតាំងសាធារណៈ ឬឯកជនណាមួយ ហាមឃាត់ឬកម្រិតការចែកចាយឬការផ្សព្វផ្សាយព័ត៌មាន ដែលអាចបង្កឲ្យមានការភ័យខ្លាចដល់សាធារណជន ឬចលាចលដែលនាំឲ្យខូចខាតដល់សន្តិសុខជាតិ ឬធ្វើឲ្យមានការភាន់ច្រឡំអំពីស្ថានភាពនៃភាពអាសន្ន។
សេចក្តីព្រាងច្បាប់ចែងទៀតថា រដ្ឋាភិបាលក៏អាចដាក់នូវវិធានការឃ្លាំមើលនិងតាមដានតាមគ្រប់មធ្យោបាយ ដើម្បីទទួលបានព័ត៌មានតាមរយៈប្រព័ន្ធទំនាក់ទំនងទូរគមនាគមន៍គ្រប់រូបភាព។
ចំពោះការដាក់ទោសទណ្ឌវិញ បើតាមច្បាប់នេះ អំពើរារាំង ឬបង្កឧបសគ្គដល់កិច្ចប្រតិបត្តិការឆ្លើយតបចំពោះភាពអាសន្ន ត្រូវផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ។ ចំពោះអំពើរារាំងដល់កិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន ត្រូវផ្តន្ទាទោសដាក់ពន្ធនាគារពី៥ឆ្នាំទៅ១០ឆ្នាំ កាលបើអំពើនេះនាំឲ្យមានចលាចលជាសាធារណៈ ឬប៉ះពាល់ដល់សន្តិសុខជាតិ។
សេចក្តីព្រាងច្បាប់នេះចែងបន្តថា បើជនណាមានចេតនាមិនគោរពវិធានការនេះត្រូវផ្តន្ទាទោសដាក់ពន្ធនាគារ ពី១ខែទៅ១ឆ្នាំ។ ចំណែកអំពើមិនគោរព ជនល្មើសត្រូវផ្តន្ទាទោសដាក់ពន្ធនាគារពី ១ឆ្នាំទៅ៥ឆ្នាំ កាលបើអំពើនេះនាំឲ្យមានចលាចលជាសាធារណៈ។
កន្លងទៅ រដ្ឋាភិបាលបានប្រើប្រាស់ការចោទប្រកាន់លើគណបក្សសង្គ្រោះជាតិ ដែលត្រូវបានតុលាការកំពូលរំលាយចោលថា «បានបង្កភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ» និងបានលើកឡើងជារឿយៗ អំពីការលូកដៃរបស់បរទេសក្នុងកិច្ចការផ្ទៃក្នុងរបស់កម្ពុជា។
កាលពីថ្ងៃចន្ទ លោកនាយករដ្ឋមន្រ្តី ហ៊ុន សែន បានប្រកាសថា ការបង្កើតច្បាប់នេះ គឺដើម្បីការពារអាយុជីវិតរបស់ប្រជាពលរដ្ឋ និងសម្រាប់ការរាតត្បាតកាន់តែធ្ងន់ធ្ងរនៃវីរុសកូរ៉ូណា។ បើទោះជាមានច្បាប់នេះក៏ដោយ លោក ហ៊ុន សែន ថា រដ្ឋាភិបាលរបស់លោកមិនទាន់ប្រកាសដាក់ប្រទេសក្នុងគ្រាអាសន្ននោះទេ ដោយលោកថា ប្រជាជននៅស្តាប់ការអំពាវនាវរបស់រដ្ឋាភិបាលនៅឡើយក្នុងគោលដៅប្រយុទ្ធប្រឆាំងនឹងវីរុសកូរ៉ូណា។
លោកបានថ្លែងថា៖ «បើទោះមានច្បាប់ហើយក្តី ការប្រកាសដាក់ប្រទេសក្នុងគ្រាមានអាសន្នពុំមែនជាលទ្ធភាពដែលត្រូវអនុវត្ត។ ខ្ញុំគ្រាន់តែគិតថា នេះគ្រាន់តែជាអ្វីដែលមានក្នុងដៃប៉ុណ្ណោះ នៅពេលសភាពការណ៍មិនអាចត្រួតត្រាបាន»។
មាត្រា២២ នៃរដ្ឋធម្មនុញ្ញចែងថា នៅពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិស្ថិតនៅក្នុងភាពអាសន្ន ក្រោយពីបានមតិឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា។
លោក ព្រាប កុល នាយកប្រតិបត្តិរបស់អង្គការតម្លាភាពកម្ពុជា បានថ្លែងប្រាប់ VOA កាលពីថ្ងៃចន្ទថា ច្បាប់ដាក់ប្រទេសក្នុងគ្រាអាសន្ននេះ មិនមានអីចម្លែកទេ ព្រោះនៅប្រទេសគេក៏មានច្បាប់នេះដែរ។ ប៉ុន្តែលោកថា ការតាក់តែងច្បាប់នេះត្រូវគិតគូរឲ្យគ្រប់ជ្រុងជ្រោយ ហើយគួរតែមានការចូលរួមពីគ្រប់ភាគី ក្នុងនោះមានសង្គមស៊ីវិលផងដែរ។
លោកបានថ្លែងថា៖ «តើធាតុចូល នៅពេលដែលធ្វើការព្រាងនេះ រាជរដ្ឋាភិបាលមានផ្តល់ឱកាសឲ្យសាធារណមតិ ឬក៏អ្នកជំនាញ ឬក៏តួអង្គសំខាន់ៗ រួមទាំងអ្នកច្បាប់ អ្នកសិក្សាធិការ សង្គមស៊ីវិលអីជាដើមហ្នឹង មានឱកាសផ្តល់ធាតុចូលឬក៏អត់ ក្នុងខណៈអវត្តមានគណបក្សប្រឆាំង»៕
