តំណាងរាស្ត្រចំនួន១១៣រូបក្នុងចំណោមតំណាងរាស្ដ្រមានវត្តមានសរុបចំនួន១១៨រូបបានបោះឆ្នោតផ្តល់សេចក្តីទុកចិត្តដើម្បីតែងតាំងសមាសភាពថ្មីនៃគណៈកម្មាធិការជាតិរៀបចំការបោះឆ្នោតចំនួនប្រាំបួនរូបនៅថ្ងៃព្រហស្បតិ៍នេះដែលប្រមុខដឹកនាំនៃគណបក្សជាប់ឆ្នោតបានថ្លែងពីសុទិដ្ឋិនិយមចំពោះឯករាជ្យភាពនៃអង្គភាពថ្មីនេះ។
តំណាងរាស្ដ្រមកពីគណបក្សសង្គ្រោះជាតិនិងមកពីគណបក្សប្រជាជនកម្ពុជាបានបោះឆ្នោតជាកញ្ចប់ដោយគូសលើសន្លឹកឆ្នោតដែលមានឈ្មោះបេក្ខជនទាំងប្រាំបួនរូបរួចជាស្រេចនិងយកទៅទម្លាក់ក្នុងប្រអប់ឆ្នោត។
លោក ហេង សំរិន ប្រធានរដ្ឋសភាបានប្រកាសបន្ទាប់ពីការរាប់សន្លឹកឆ្នោតរួចថាលោកស៊ិក ប៊ុនហុក តំណាងរាស្ដ្រមណ្ឌលកំពង់ធំរបស់គណបក្សប្រជាជនកម្ពុជាត្រូវតែងតាំងជាប្រធានគណៈកម្មាធិការជាតិរៀបចំការបោះឆ្នោត(គជប) លោកគួយ ប៊ុនរឿន អតីតអ្នកតំណាងរាស្ដ្រនិងជាមន្ត្រីទទួលបន្ទុកផ្នែកកិច្ចការបោះឆ្នោតមកពីគណបក្សសង្គ្រោះជាតិត្រូវតែងតាំងជាអនុប្រធានគ.ជ.ប។
ក្រៅពីនោះឥស្សរជនចំនួនប្រាំពីររូបទៀតត្រូវតែងតាំងជាសមាជិករួមមានលោករ៉ុង ឈុន ប្រធានសមាគមគ្រូបង្រៀនឯករាជ្យនិងជាសកម្មជនការពារសិទ្ធិកម្មករដ៏ល្បីល្បាញមួយរូប លោកហ៊ីង ធីរិទ្ធ អតីតចៅក្រមសាលាដំបូងរាជធានីភ្នំពេញដែលត្រូវដកហូតតំណែងពាក់ព័ន្ធនឹងសំណុំរឿងនយោបាយដ៏ចម្រូងចម្រាស និងលោកស្រីតែ ម៉ានីរ៉ុង ដែលជាមន្ត្រីរាជការចូលនិវត្តន៍កូតាគណបក្សសង្គ្រោះជាតិជាសមាជិក។
សមាសភាពសមាជិកបីរូបផ្សេងទៀតមកពីគណបក្សប្រជាជនកម្ពុជារួមមានលោកមាន សាទិ និងលោកឯម សូផាត ជាអតីតសមាជិកគជបចាស់ និងលោកទូច សុន មន្ត្រីក្រសួងមហាផ្ទៃ ចូលនិវត្តន៍។ រីឯលោកហង្ស ពុទ្ធា នាយកប្រតិបត្តិនៃអង្គការឃ្លាំមើលការបោះឆ្នោតមួយឈ្មោះថានិកហ្វិក ក៏ត្រូវតែងតាំងជាសមាជិកគជប ថ្មីដែរ។
លោកហេង សំរិន បានស្នើឲ្យសមាជិកសភាស្វាគមន៍សមាជិកថ្មីរបស់គ.ជ.បនេះ។
ដោយឡែកទាំងលោកនាយករដ្ឋមន្ត្រីហ៊ុន សែន អនុប្រធានគណបក្សប្រជាជនកម្ពុជា ទាំងលោកសម រង្ស៊ី ប្រធានគណបក្សសង្គ្រោះជាតិបានឡើងថ្លែងការណ៍បន្តបន្ទាប់គ្នាដោយក្រើនរំលឹកឲ្យសមាជិកនិងអ្នកដឹកនាំគ.ជ.បថ្មីប្រកាន់ជំហរឯករាជ្យ។
លោកហ៊ុន សែន ថ្លែងថាសមាជិកគ.ជ.ប ត្រូវលាលែងពីបក្សនយោបាយក្រោយពីជាប់ឆ្នោតនេះទៅ។
«គណបក្សទាំងអស់សុទ្ធតែផ្ញើជោគវាសនាលើគណៈកម្មាធិការជាតិរៀបចំការបោះឆ្នោតថ្មីនេះឯង។ដូច្នេះសង្ឃឹមថាឯកឧត្តម លោកជំទាវ ប្រធាន អនុប្រធាន សមាជិក សមាជិកាកុំមកសួរបក្សតទៅទៀត។ ហើយកុំសួរអ្នកណាទៀតអំពីដំណើរការរបស់ខ្លួន រាប់ទាំងអគ្គលេខាធិការ អគ្គលេខាធិការរងនិងអ្នកដទៃទៀតគឺត្រូវរៀបចំដោយខ្លួនឯងទាំងអស់»។
លោក សម រង្ស៊ី វិញដាស់តឿនឲ្យសមាជិកគ.ជ.បថ្មីបំពេញការងារដោយគោរពតាមមនសិការជាគោលការណ៍។
«មិនត្រូវមានក្រុមអ្នកនយោបាយណា ក្រុមណា បក្សពួកណាប៉ុនប៉ងសំឡុត ណែនាំ អូសទាញសន្យាអ្វីជាផ្ទាល់ខ្លួនចំពោះលោកជំទាវ ឯកឧត្តមរំពឹងតែលើសម្បជញ្ញៈ។សូមឲ្យសម្រេចដោយខ្លួនឯងតាមសម្បជញ្ញៈរៀងៗខ្លួន»។
លោកស៊ិក ប៊ុនហុក ប្រធានគ.ជ.ប ថ្មីបានប្រាប់ក្រុមអ្នកយកព័ត៌មានថាលោកនឹងដឹកនាំឲ្យមានឯករាជ្យនិងតម្លាភាព។
«យើងនៅក្នុងគ.ជ.បហ្នឹងមិនមែនទៅប្រទាញប្រទង់គ្នាទេ គឺអនុវត្តន៍ច្បាប់ជាកំពូល។ទោះជាសមាសភាពពីខាងណាក៏ដោយប៉ុន្តែយើងនៅក្នុងការដឹកនាំនេះ យើងជាគ.ជ.ប ជាអ្នកឯករាជ្យ ត្រូវធ្វើការដោយឯករាជ្យ តម្លាភាព។ត្រូវធ្វើម៉េចឲ្យគ្រប់ភាគីទាំងអស់អាចទទួលយកបាន»។
សមាជិកគ.ជ.ប លោករ៉ុង ឈុន ដែលធ្លាប់ជាសកម្មជនជំទាស់ដ៏សកម្មមួយរូបបានបញ្ជាក់ជំហរអំពីការប្រឆាំងនឹងការកេងបន្លំសន្លឹកឆ្នោត។
«ខ្ញុំនឹងប្រកាន់ជំហរស្មោះត្រង់នឹងជាតិ ស្មោះត្រង់នឹងប្រជារាស្ដ្រធ្វើម៉េចឲ្យសន្លឹកឆ្នោតបងប្អូនប្រជារាស្ដ្រហ្នឹងគង់វង្ស មិនមានបុគ្គលឬអ្នកនយោបាយណាកេងបន្លំនោះទេ»។
ប្រធាន អនុប្រធាន និងសមាជិកគ.ជ.ប ថ្មីត្រូវលាលែងពីតួនាទីនៅតាមស្ថាប័នរៀងៗខ្លួន។
បើយោងតាមការឯកភាពនៃគណបក្សទាំងពីរសមាជិកនិងប្រធាននិងអនុប្រធានគណៈកម្មាធិការជាតិរៀបចំការបោះឆ្នោតថ្មីនឹងស្បថចូលកាន់តំណែងនៅថ្ងៃសៅរ៍សប្ដាហ៍នេះ។ហើយពិធីផ្ទេរតំណែងនៃសមាសភាពគ.ជ.បចាស់មកគ.ជ.បថ្មីវិញនឹងត្រូវធ្វើឡើងនៅថ្ងៃច័ន្ទទី១៣ខែមេសា គឺមួយថ្ងៃមុនពិធីបុណ្យចូលឆ្នាំខ្មែរចាប់ផ្តើម៕
