លោកRichard Branson និងលោក Steve Case មេដឹកនាំពាណិជ្ជកម្ម និងជានាយកប្រតិបត្តិក្រុមហ៊ុនថ្មីៗបំផុតបានផ្អាកចំណងទាក់ទងជាមួយប្រទេសអារ៉ាប់ប៊ី សាអូឌីត បន្ទាប់ពីការបាត់ខ្លួនអ្នកកាសែតអារ៉ាប៊ី សាអូឌីតម្នាក់នៅក្នុងប្រទេសតួកគីនៅដើមខែនេះ។
លោក Branson ប្រធានក្រុមហ៊ុនVirgin Group នៃចក្រភពអង់គ្លេសនិយាយនៅក្នុងសេចក្តីថ្លែងការណ៍ថា៖ «ខ្ញុំមានសេចក្តីសង្ឃឹមយ៉ាងខ្លាំងចំពោះរដ្ឋាភិបាលនៅបច្ចុប្បន្ននេះនៅក្នុងប្រទេសអារ៉ាប៊ី សាអូឌីត និងមេដឹកនាំរបស់ប្រទេសនោះគឺព្រះរជ្ជទាយាទMohammed bin Salmanហើយដោយហេតុដូច្នេះហើយបានជាខ្ញុំសប្បាយរីករាយដើម្បីទទួលយកដំណែង២នៅក្នុងគម្រោងវិស័យទេសចរណ៍នៅជុំវិញសមុទ្រក្រហម។ អ្វីដែលបានកើតមានឡើងនៅក្នុងប្រទេសតួកគីនៅជុំវិញការបាត់ខ្លួនអ្នកកាសែតឈ្មោះ Jamal Khashoggi បើត្រូវបានបង្ហាញការពិត នឹងផ្លាស់ប្តូរពិតប្រាកដនូវសមត្ថភាពរបស់ប្រទេសលោកខាងលិចដើម្បីធ្វើពាណិជ្ជកម្មជាមួយរដ្ឋាភិបាលអារ៉ាប៊ី សាអូឌីត។ យើងបានសុំព័ត៌មានកាន់តែច្រើនទៀតអំពីបញ្ហានេះ»។
លោកBranson បាននិយាយទៀតថា៖ «ខ្ញុំនឹងផ្អាកមុខនាទីរបស់ខ្ញុំជាអ្នកដឹកនាំក្នុងគម្រោងទេសចរណ៍ទាំង២នោះ។ ក្រុមហ៊ុនVirgin ក៏នឹងផ្អាកការពិភាក្សារបស់ខ្លួនជាមួយមូលនិធិវិនិយោគទុនសាធារណៈលើវិនិយោគទុន ដែលបានស្នើឡើងនៅក្នុងក្រុមហ៊ុនអវកាសVrigin Galactic និងVirgin Orbit»។
កាលពីសប្តាហ៍មុន លោកKhashoggi បានទៅស្ថានកុងស៊ុលអារ៉ាប៊ី សាអូឌីត នៅក្នុងប្រទេសតួកគីដើម្បីយកឯកសារសម្រាប់ការរៀបអាពាហ៍ពិពាហ៍របស់លោក។ លោក Khashoggi រស់នៅសហរដ្ឋអាមេរិកដែលបានសរសេរអត្ថបទរិះគន់អារ៉ាប់ប៊ី សាអូឌីតឲ្យកាសែតThe WASHINGTON POST ។ លោកមិនបានចេញពីស្ថានកុងស៊ុលនោះទេ៕
