រដ្ឋមន្ត្រីការបរទេសសហរដ្ឋអាមេរិកលោក Antony Blinken បានអញ្ជើញទៅដល់ប្រទេសឥណ្ឌូណេស៊ីនៅថ្ងៃចន្ទនេះដើម្បីចាប់ផ្តើមដំណើរទស្សនកិច្ចនៅតំបន់អាស៊ីអាគ្នេយ៍ដែលមានគោលបំណងពង្រឹងចំណងទាក់ទងនៅក្នុងតំបន់មួយដែលបានក្លាយសមរភូមិយុទ្ធសាស្ត្រមួយរវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
នេះជាដំណើរបំពេញទស្សនកិច្ចលើកដំបូងរបស់លោកចាប់តាំងពីប្រធានាធិបតីសហរដ្ឋអាមេរិកលោក Joe Biden ចូលកាន់តំណែងកាលពីខែមករាមក ហើយលោក Blinken ក៏គ្រោងនឹងទៅប្រទេសម៉ាឡេស៊ីនិងថៃនៅសប្តាហ៍នេះដែរបន្ទាប់ពីបំពេញទស្សនកិច្ចនៅរដ្ឋធានីហ្សាការតារបស់ឥណ្ឌូណេស៊ី ដែលនៅទីនោះលោកនឹងជួបជាមួយលោកប្រធានាធិបយី Joko Widodo ហើយនឹងថ្លែងសន្ទរកថាស្តីពីយុទ្ធសាស្ត្ររបស់សហរដ្ឋអាមេរិកនៅតំបន់ឥណ្ឌូប៉ាស៊ីហ្វិកនៅថ្ងៃអង្គារស្អែក។
តំបន់អាស៊ីអាគ្នេយ៍ ជាទីកន្លែងដ៏សំខាន់មួយសម្រាប់ការប្រកួតប្រជែងរវាងសហរដ្ឋអាមេរិកនិងចិនដែលជាប្រទេស២មានសេដ្ឋកិច្ចធំជាងគេបង្អស់នៅក្នុងពិភពលោក ដោយសមរភូមិដើម្បីបញ្ចេញឥទ្ធិពលនេះកាន់តែក្តៅគគុកនៅពេលដែលរដ្ឋបាលរបស់លោកប្រធានាធិបតី Biden បានស្វះស្វែងរកការទាក់ទងឡើងវិញជាមួយអាស៊ីអាគ្នេយ៍ក្រោយការប្តេជ្ញាចិត្តរបស់អាមេរិកចំពោះតំបន់នេះក្នុងអាណត្តិប្រធានាធិបតី Donald Trump មិនច្បាស់លាស់។
អ្នកការទូតកំពូលសហរដ្ឋអាមេរិក បាននិយាយមុនពេលដំណើរទស្សនកិច្ចនេះថា លោក Blinken នឹងបន្តនូវគោលបំណងរបស់លោកប្រធានាធិបតី Biden ក្នុងការបង្កើនទំនាក់ទំនងជាមួយសមាជិកទាំង១០ប្រទេសនៃសមាគមប្រជាជាតិអាស៊ីអាគ្នេយ៍ឬអាស៊ាន ហើយនឹងពិភាក្សាពីចក្ខុវិស័យរបស់លោកប្រធានាធិបតីសម្រាប់គម្រោងសេដ្ឋកិច្ចតំបន់ឥណ្ឌូប៉ាស៊ីហ្វិក។
សហរដ្ឋអាមេរិកនិងសម្ព័ន្ធមិត្តលោកខាងលិច កំពុងវាយបកប្រឆាំងនឹងការទាមទាររបស់រដ្ឋាភិបាលក្រុងប៉េកាំងនៅក្នុងសមុទ្រចិនខាងត្បូងដែលជាផ្លូវដឹកជញ្ជូនសម្រាប់បរិមាណទំនិញ១ភាគ៣នៃពាណិជ្ជកម្មសាកលលោកហើយបានចោទប្រកាន់កងនាវារបស់ចិនថាបានសំឡុតគំរាមប្រទេសនានារួមទាំងប្រទេសវៀតណាម ហ្វីលីពីន និងឥណ្ឌូណេស៊ី ដោយការបង្អាក់សកម្មភាពថាមពលនិងនេសាទ៕
