លោក Elon Musk ដែលជាអ្នកមានទ្រព្យសម្បត្តិច្រើនជាងគេនៅលើពិភពលោកនឹងស្ថិតក្នុងចំណោមមហាសេដ្ឋីជាច្រើននាក់ដែលនឹងចូលរួមពិធីស្បថចូលកាន់តំណែងប្រធានាធិបតីលើកទី២របស់លោក Donald Trump។ នាយកប្រតិបត្តិក្រុមហ៊ុន Tesla លោក Musk ជាអ្នកជួយជ្រោមជ្រែងដល់ការជាប់ឆ្នោតម្តងទៀតរបស់លោក Trump ដោយលោកបានជួយថវិកាប្រមាណ២៥០លានដុល្លារដល់យុទ្ធនាការលោក Trump។ នេះបើយោងតាមទស្សនាវដ្តី Forbes។ លោក Musk នឹងដឹកនាំក្រសួងប្រសិទ្ធភាពរដ្ឋាភិបាលជាមួយលោក Vivek Ramaswamy ដែលជាសហគ្រិនជីវៈបច្ចេវិទ្យា។
សេចក្តីរាយការណ៍ថាលោក Musk នឹងអង្គុយនៅក្បែរប្រធានក្រុមហ៊ុនAmazon លោក Jeff Bezos និងនាយកប្រតិបត្តិក្រុមហ៊ុន Meta លោក Mark Zuckerberg។
ខណៈដែលមិនមែនជាទម្លាប់ក្នុងការអញ្ជើញមេដឹកនាំបរទេសនោះ លោកTrump បានអញ្ជើញមេដឹកនាំបរទេសជាច្រើន។ ប្រធានាធិបតីប្រទេសអាហ្សង់ទីនលោក Javier Milei ត្រូវបានគេរំពឹងថានឹងអញ្ជើញចូលរួម។ នេះបើយោងតាមកាសែត Bloomberg។ លោក Milei ជាមេដឹកនាំបរទេសមុនគេដែលជួបលោក Trump ក្រោយលោកឈ្នះការបោះឆ្នោតកាលពីខែវិច្ឆិកា។ លោក Trump ក៏អញ្ជើញប្រធានាធិបតីចិនលោក Xi Jinping ដែលនឹងបញ្ជូនប្រេសិតមកចូលរួមជំនួស។ នាយករដ្ឋមន្ត្រីស្តាំនិយមអ៊ីតាលីអ្នកស្រី Giorgia Meloni ក៏បានទទួលលិខិតអញ្ជើញ ប៉ុន្តែអ្នកស្រីថាអ្នក ស្រីមិនទាន់ច្បាស់ថាអ្នកស្រីមានពេលឆ្លៀតចូលរួមបានឬទេ។
វាជាប្រពៃណីមួយដែលប្រធានាធិបតីនៅមានជីវិតចូលរួមពិធីស្បថចូលកាន់តំណែងនេះ។ លោកប្រធានាធិបតី Joe Biden ដែលជិតចប់អាណត្តិនិងភរិយារបស់លោកគឺអ្នកស្រី Jill Biden នឹងចូលរួមពិធីថ្ងៃចន្ទក្រោយនេះ។ នៅពេលលោក Biden ស្បថចូលកាន់តំណែងកាលពី៤ឆ្នាំមុន ក្រោយលោក Trump ចាញ់ឆ្នោតនៅពេលនោះ លោក Trump មិនបានចូលរួមនោះទេ ព្រោះលោកជឿថាលោកបានឈ្នះការបោះឆ្នោតនាពេលនោះ។
អតីតប្រធានាធិបតីលោក Barack Obama លោក George W. Bush និងលោកBill Clinton ក៏នឹងចូលរួមពិធីស្បថចូលកាន់តំណែងរបស់លោក Trump ផងដែរ។ លោក Bush និងលោក Clinton នឹងចូលរួមជាមួយភរិយារបស់ពួកអស់លោកគឺលោកស្រី Laura Bush និងលោកស្រី Hillary Clinton។
ការិយាល័យរបស់លោក Barack Obama និងលោកស្រី Michelle Obama បានថ្លែងក្នុងសេចក្តីថ្លែងការណ៍ថា៖«អតីតភរិយាប្រធានាធិបតីលោកស្រី Michelle Obama នឹងមិនចូលរួមពិធីស្បថចូលកាន់តំណែងនេះទេ»។ វានឹងកា្លយជាលើកទី២ហើយក្នុងប៉ុន្មានសប្តាហ៍ចុងក្រោយនេះដែលលោកស្រីមិនបានចូលរួមពិធីសាធារណៈជាមួយអតីតប្រធានាធិបតីនិងភរិយារបស់ពួកគេ ក្រោយលោកស្រីអវត្តមានក្នុងពិធីបុណ្យសពលោកអតីតប្រធានាធិបតី Jimmy Carter។
លោកស្រីអនុប្រធានាធិបតី Kamala Harris និងស្វាមីគឺលោក Douglas Emhoff ក៏ត្រូវគេរំពឹងថានឹងចូលរួមក្នុងពិធីនៅថ្ងៃចន្ទផងដែរ។ លោកស្រី Harris ជាបេក្ខជនប្រធានា ធិបតីខាងគណបក្សប្រជាធិបតេយ្យនៅក្នុងការបោះឆ្នោតប្រធានាធិបតីកាលពីឆ្នាំមុន៕
មហាសេដ្ឋីនិងឥស្សរជនបរទេសនានានឹងចូលរួមក្នុងពិធីស្បថចូលកាន់តំណែងរបស់លោក Trump
វេទិកាបញ្ចេញមតិ