កាលពីថ្ងៃទី ១១ ខែសីហា ប្រធានផ្នែកចារកម្មនៃប្រទេសអូស្ត្រាលីបានចោទប្រកាន់ប្រទេសដែលមានទំនាក់ទំនងល្អជាមួយនឹងអូស្ត្រាលីខ្លះថាបានធ្វើប្រតិបត្តិការជ្រៀតជ្រែកចូលក្នុងកិច្ចការរបស់ប្រទេសអូស្ត្រាលី ដោយនិយាយថាអត្តសញ្ញាណរបស់ប្រទេសទាំងនោះនឹងធ្វើឱ្យមានការភ្ញាក់ផ្អើលដល់ប្រជាពលរដ្ឋ ប្រសិនបើត្រូវបានបញ្ចេញ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
កាលពីឆ្នាំមុន អូស្ត្រាលីបានបញ្ជាក់ថាប្រទេសអ៊ីរ៉ង់បានប្រឡូកក្នុងការជ្រៀតជ្រែកកិច្ចការបរទេស និងថាផ្នែកស៊ើបការសម្ងាត់អូស្ត្រាលីបានបង្អាក់ «បុគ្គលមួយចំនួន» ដែលបានធ្វើប្រតិបត្តិការឈ្លបយកការណ៍លើផ្ទះរបស់ពលរដ្ឋអូស្ត្រាលីដើមកំណើតអ៊ីរ៉ង់ម្នាក់។
ក៏ប៉ុន្តែ ប្រទេសផ្សេងទៀតក៏កំពុងប៉ុនប៉ងស្ងាត់ៗដើម្បីជ្រៀតជ្រែកចូលក្នុងប្រព័ន្ធនយោបាយអូស្ត្រាលីនិងសហគមន៍ពលរដ្ឋអូស្ត្រាលីនៅបរទេសផងដែរ។ នេះបើតាមការបញ្ជាក់របស់លោក Mike Burgess អគ្គនាយកអង្គការស៊ើបការណ៍សម្ងាត់សន្តិសុខអូស្ត្រាលី (ASIO)។
លោក Burgess បាននិយាយនៅក្នុងកិច្ចសម្ភាសន៍មួយជាមួយបណ្តាញព័ត៌មាន ABCថា៖ «ខ្ញុំគិតថា យ៉ាងហោចណាស់ក៏មាន [ប្រទេស] ៣ ឬ ៤ ដែរដែលយើងបានរកឃើញថាបានប្រឡូកក្នុងការជ្រៀតជ្រែកចូលក្នុងសហគមន៍ពលរដ្ឋអូស្ត្រាលីនៅបរទេស»។
លោកបាននិយាយថា៖ «អ្នកនឹងភ្ញាក់ផ្អើលនៅពេលឮឈ្មោះប្រទេសខ្លះក្នុងចំណោមនោះ ដោយសារប្រទេសទាំងនោះក៏ជាមិត្តភក្តិរបស់អូស្ត្រាលីដែរ»។
លោក Burgess បានបដិសេធមិនបញ្ជាក់ថាប្រទេសណាជាប់ពាក់ព័ន្ធនៅក្នុងរឿងនេះទេ ក្រៅតែពីការបញ្ជាក់អំពីការចោទប្រកាន់របស់រដ្ឋាភិបាលអូស្ត្រាលីអំពីការជាប់ពាក់ព័ន្ធរបស់អ៊ីរ៉ង់។
លោក Burgess បាននិយាយថា ការជ្រៀតជ្រែកកិច្ចការបរទេស ចារកម្ម និងអំពីហិង្សាដែលកើតចេញពីនយោបាយគឺជាក្ដីបារម្ភផ្នែកសន្តិសុខដ៏ចម្បងមួយរបស់អូស្ត្រាលី។
លោកបញ្ជាក់ថា៖ «នៅក្នុងសហគមន៍ពលរដ្ឋអូស្ត្រាលីនៅបរទេស មានប្រទេសជាច្រើនដែលប៉ុនប៉ងគំរាមកំហែងនិងបំភិតបំភ័យពួកគេដែលកំពុងរស់នៅក្នុងប្រទេសទាំងនោះ»។
លោកបន្ថែមថា៖ «នៅពេលយើងរកឃើញបញ្ហានេះ យើងដោះស្រាយបញ្ហានេះប្រកបដោយប្រសិទ្ធភាព»។
នៅក្នុងឆ្នាំ ២០២២ លោកBurgess បានបញ្ចេញឱ្យដឹងថា អង្គការស៊ើបការណ៍សម្ងាត់សន្តិសុខអូស្ត្រាលី (ASIO) បានបង្អាក់ផែនការជ្រៀតជ្រែកបរទេសរបស់អ្នកមានទ្រព្យសម្បត្តិម្នាក់ដែលលោកហៅថា «អាយ៉ង» ដែលមានទំនាក់ទំនងដ៏ជ្រាលជ្រៅជាមួយនឹងរដ្ឋាភិបាលបរទេស។
ជននោះបានផ្តល់ប្រាក់រាប់សែនដុល្លារដល់បុគ្គលិកម្នាក់ឱ្យព្យាយាមជះឥទ្ធិពលលើការបោះឆ្នោតមួយ។ នេះបើតាមការបញ្ជាក់របស់លោក Burgess ដោយមិនបញ្ជាក់អំពីការបោះឆ្នោតណាដែលជាប់ពាក់ព័ន្ធនៅក្នុងរឿងនេះទេ។
អង្គការស៊ើបការណ៍សម្ងាត់សន្តិសុខអូស្ត្រាលី (ASIO) នៅខែនេះក៏បានបង្កើនកម្រិតនៃការគំរាមកំហែងភេរវកម្មនៅក្នុងប្រទេសអូស្ត្រាលីទៅដល់កម្រិត «អាចកើតឡើង» ផងដែរ ដោយបាននិយាយថា ការកើនឡើងនូវមនោគមន៍វិជ្ជាជ្រុលនិយមក្នុងប្រទេសបានធ្វើឱ្យសកម្មភាពហិង្សាអាចកើតឡើងនៅក្នុងរយៈពេល ១២ ខែខាងមុខ។
លោកBurgess បាននិយាយកាលពីថ្ងៃទី ១១ ខែសីហាថា ការរីករាលដាលនៃព័ត៌មានក្លែងក្លាយនៅលើបណ្តាញសង្គមអនឡាញបានធ្វើឱ្យការដោះស្រាយការគំរាមកំហែងហិង្សាដែលកើតចេញពីនយោបាយកាន់តែលំបាកឡើង ដោយអនីតិជន «សម្ងំមើលកុំព្យូទ័រតែនៅក្នុងបន្ទប់របស់ខ្លួន» ដែលកាន់តែងាយប្រឈមនឹងឥទ្ធិពលនៃភាពជ្រុលនិយមហិង្សា។
ប្រធានផ្នែកចារកម្មអូស្ត្រាលីរូបនេះបានលើកឡើងទៀតថា អង្គការស៊ើបការណ៍សម្ងាត់សន្តិសុខអូស្ត្រាលី (ASIO) នឹងបន្តឃ្លាំមើលលើហានិភ័យបែបនេះពាក់ព័ន្ធនឹងការបោះឆ្នោតថ្នាក់ជាតិបន្ទាប់នៅក្នុងប្រទេសអូស្ត្រាលី ដែលគេរំពឹងថានឹងធ្វើឡើងនៅឆ្នាំ ២០២៥ ដោយសារតែការបោះឆ្នោតនេះនឹងក្លាយជា «ចំណុចសំខាន់មួយ» សម្រាប់ការជជែកដេញដោលខ្លាំងក្លាអំពីបញ្ហាសង្គម៕
ប្រែសម្រួលដោយលោក ជឹង ប៉ូជីន
វេទិកាបញ្ចេញមតិ