តំណាងស្ថានទូតអូស្រ្តាលីប្រចាំនៅកម្ពុជា កាលពីថ្ងៃច័ន្ទ បានលើកឡើងអំពីក្តីព្រួយបារម្ភមួយចំនួនទាក់ទងនឹងសិទ្ធិសេរីភាពនយោបាយក្នុងប្រទេសកម្ពុជា នៅក្នុងជំនួបមួយជាមួយមន្រ្តីជាន់ខ្ពស់នៃគណៈកម្មាធិការសិទ្ធិមនុស្សកម្ពុជា ដែលជាស្ថាប័នរបស់រដ្ឋាភិបាល។
នេះជាកិច្ចប្រជុំរវាងលោក Luke Arnold ភារធារីនៃស្ថានទូតអូស្រ្តាលីប្រចាំកម្ពុជានិងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី។
ក្រោយកិច្ចប្រជុំ ភាគីទាំងពីរបានចេញសេចក្តីប្រកាសអំពីលទ្ធផលនៃជំនួបនេះរៀងៗខ្លួន។
គណៈកម្មាធិការសិទ្ធិមនុស្សកម្ពុជាបានលើកឡើងថាអូស្រ្តាលីបានប្តេជ្ញាបន្តជួយកម្ពុជា ជាពិសេសដំណើរការរៀបចំសេចក្តីព្រាងច្បាប់នៃការបង្កើតស្ថាប័នសិទ្ធិមនុស្សជាតិ។
លោក ជិន ម៉ាលីន អនុប្រធាននិងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា ប្រាប់ VOA នៅថ្ងៃអង្គារនេះថាភាគីអូស្រ្តាលីបានបង្ហាញនូវការបារម្ភមួយចំនួនផងដែរអំពីស្ថានការណ៍នយោបាយបច្ចុប្បន្ននិងសិទ្ធិសេរីភាពផ្នែកនយោបាយក្នុងប្រទេសកម្ពុជា។ លោកបន្ថែមថាជាការឆ្លើយតបនឹងការបារម្ភនេះ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាបានបកស្រាយនិងបំភ្លឺទៅកាន់ភាគីអូស្រ្តាលី។
លោក ជិន ម៉ាលីន បញ្ជាក់ថាការលើកឡើងរបស់តំណាងទូតអូស្រ្តាលីជាការបង្ហាញទស្សនៈផ្ទាល់ខ្លួនរបស់គេតែប៉ុណ្ណោះ។ ប៉ុន្តែលោកថាមិនមានជាការស្នើសុំ ឬដាក់សម្ពាធអ្វីមកលើកម្ពុជានោះទេ។
លោកថ្លែងថា៖ «ពាក់ព័ន្ធនឹងស្ថានការណ៍នយោបាយហ្នឹង មិនមានការដាក់សម្ពាធ ឬក៏ការស្នើសុំ ឬក៏ការរិះគន់អីទេ គ្រាន់តែបង្ហាញទស្សនៈនៃការយល់ឃើញរបស់ខាងអូស្រ្តាលី ហើយយើងក៏បង្ហាញនូវការបំភ្លឺនិងតថភាពពិតជាក់ស្តែងពាក់ព័ន្ធនឹងការអនុវត្តសិទ្ធិទាំងអស់នេះ ដោយផ្អែកទៅលើទិដ្ឋភាពច្បាប់ ទិដ្ឋភាពសិទ្ធិមនុស្ស ទិដ្ឋភាពនយោបាយ ប្រវត្តិសាស្រ្ត បរិបទសង្គមកម្ពុជាជាដើម។ល។»។
ចំណែកស្ថានទូតអូស្រ្តាលីបានបង្ហោះសារនៅលើបណ្តាញសង្គមហ្វេសប៊ុករបស់ខ្លួនថាមន្រ្តីស្ថានទូតបានជួបជាមួយគណៈកម្មាធិការសិទ្ធិមនុស្សកម្ពុជា រួមទាំងមន្រ្តីជាន់ខ្ពស់ដទៃទៀត ដើម្បីពិភាក្សាអំពីបញ្ហាសិទ្ធិមនុស្សនិងទទួលបានបច្ចុប្បន្នភាពពីសំណើសុំបង្កើតស្ថាប័នសិទ្ធិមនុស្សជាតិមួយដែលឯករាជ្យ។
បើតាមស្ថានទូត លោក Luke Arnold ភារធារីរបស់ស្ថានទូតអូស្ត្រាលីប្រចាំនៅកម្ពុជាបានលើកឡើងថា៖ «វាទាមទារឲ្យមានការកែលម្អ ដើម្បីធានាថាប្រទេសកម្ពុជាគោរពតាមកាតព្វកិច្ចសិទ្ធិមនុស្សអន្តរជាតិ ដែលខ្លួនបានចុះហត្ថលេខាដោយស្ម័គ្រចិត្ត រួមទាំងសេរីភាពនយោបាយ សេរីភាពខាងសមាគម និងសេរីភាពក្នុងការបញ្ចេញមតិ»។
ស្ថានទូតបញ្ជាក់បន្ថែមថា៖ «លោក Arnold ក៏បានកត់សម្គាល់ពីវឌ្ឍនភាពរបស់គណៈកម្មាធិការ[សិទ្ធិមនុស្សកម្ពុជា] លើការអភិវឌ្ឍសេចក្តីព្រាងច្បាប់ដែលបានស្នើឡើង សម្រាប់ស្ថាប័នសិទ្ធិមនុស្សជាតិរបស់កម្ពុជា ក៏ដូចជាភាពចាំបាច់សម្រាប់ស្ថាប័ននេះ ដើម្បីអនុវត្តតាមគោលការណ៍ទីក្រុងប៉ារីសឆ្នាំ១៩៩១ ស្តីពីស្ថាប័នសិទ្ធិមនុស្សជាតិ ដែលរួមមានឯករាជ្យភាពពិតប្រាកដពីរដ្ឋាភិបាល អំណាច និងធនធានគ្រប់គ្រាន់និងសមាជិកភាពចម្រុះ»។
VOAមិនទាន់អាចសុំការបញ្ជាក់បន្ថែមពីស្ថានទូតអូស្រ្តាលីប្រចាំនៅកម្ពុជាតាមសារអេឡិចត្រូនិចEmailបានទេនៅថ្ងៃអង្គារនេះ។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជាបានបញ្ជាក់ថាវឌ្ឍនភាពនៃការរៀបចំសេចក្តីព្រាងច្បាប់បង្កើតស្ថាប័នសិទ្ធិមនុស្សជាតិ ដែលមានភាគីអូស្រ្តាលីចូលរួមជួយផ្តល់យោបល់ គឺក្រុមការងារបានបញ្ចប់រួចហើយនូវសេចក្តីព្រាងដំបូង និងកំពុងរៀបចំនូវកិច្ចពិគ្រោះយោបល់ជាមួយគ្រប់ភាគីពាក់ព័ន្ធជាបន្តបន្ទាប់ទៀតក្នុងពេលឆាប់ៗខាងមុខនេះ។
គួរបញ្ជាក់ថាក្នុងរយៈពេលចុងក្រោយនេះ តំណាងស្ថានទូតបរទេសនានាក៏បានចេញមុខជួបលោក កឹម សុខា មេដឹកនាំគណបក្សសង្រ្គោះជាតិដែលកំពុងជាប់បណ្តឹងតុលាការក្នុងសំណុំរឿង«ក្បត់ជាតិ» ដែលសវនាការត្រូវបានពន្យារពេលដោយមិនមានការកំណត់។
កាលពីថ្ងៃទី១២ ខែមេសា ឆ្នាំ២០២១ លោក កឹម សុខា បានជួបជាមួយលោក Pablo Kang ឯកអគ្គរដ្ឋទូតនៃប្រទេសអូស្ត្រាលី។ នេះបើតាមហ្វេសប៊ុករបស់លោក។ ចំណែកកាលពីថ្ងៃទី១១ ខែមិថុនា លោក កឹម សុខា ក៏បានជួបជាមួយតំណាងទូតបារាំង នៅស្ថានទូតបារាំងក្នុងរាជធានីភ្នំពេញ។ លោកក៏បានជួបជាមួយឯកអគ្គរដ្ឋទូតអាល្លឺម៉ង់ផងដែរ។
លោក កឹម សុខា បានបញ្ជាក់នៅក្នុងសារលើហ្វេសប៊ុករបស់លោកថា៖ «សូមអរគុណប្រទេសប្រជាធិបតេយ្យជាមិត្តរបស់កម្ពុជាដែលនៅតែផ្តល់តម្លៃឲ្យខ្ញុំ និងដែលនៅតែបន្តជួយដល់ប្រទេសកម្ពុជានិងប្រជាពលរដ្ឋខ្មែរ តាមស្មារតីនៃកិច្ចព្រមព្រៀងសន្តិភាពទីក្រុងប៉ារីសស្តីពីកម្ពុជា ២៣ តុលា ១៩៩១»។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយនិងជាអ្នកតាមដានសង្គមមួយរូបមានប្រសាសន៍ថាចាប់តាំងពីមានទស្សនកិច្ចរបស់អនុរដ្ឋមន្រ្តីការបរទេសអាមេរិក អ្នកស្រី Wendy Shermanក្នុងប្រទេសកម្ពុជាកាលពីដើមខែមិថុនា សហគមន៍អន្តរជាតិហាក់យកចិត្តទុកដាក់ខ្លាំងលើស្ថានការណ៍នយោបាយក្នុងប្រទេសកម្ពុជា។ លោកបន្ថែមថាប្រសិនបើសហគមន៍អន្តរជាតិមានការលើកឡើងអំពីបញ្ហានយោបាយនិងសិទ្ធិមនុស្សកាន់តែខ្លាំងឡើង នោះវាអាចជាសម្ពាធមួយមកលើរដ្ឋាភិបាលកម្ពុជាផងដែរ។
លោកថ្លែងថា៖ «ខ្ញុំគិតថាបើសិនជាយន្តការនេះ សហគមន៍អន្តរជាតិនាំគ្នាឈឺឆ្អាលច្រើន ខ្ញុំគិតថាលម្ហសេរីភាព វាអាចងាកទៅរកស្ថានភាព[ដូច]ពីមុនវិញ។ ទោះបីជាចង់រឹតត្បិត ឬមួយក៏ចង់បំបិទបាន ក៏មិនអាចបិទបាន ពីព្រោះកម្ពុជាមិនអាចរស់នៅតែឯងទេ។ វាត្រូវផ្សារភ្ជាប់ជាមួយបណ្តាប្រទេសដទៃទៀត»។
លោកបន្ថែមថារូបភាពនៃជំនួបរវាងតំណាងទូតបរទេសជាមួយលោក កឹម សុខា ជាបន្តបន្ទាប់បង្ហាញថាអន្តរជាតិនៅឲ្យតម្លៃ និងទទួលស្គាល់លោក កឹម សុខា ជាអ្នកនយោបាយស្របច្បាប់ គ្មានទោសពៃរ៍និងមិនយល់ស្របតាមតុលាការកម្ពុជានោះទេ៕
