ក្រុមមេដឹកនាំជាន់ខ្ពស់រដ្ឋឥស្លាមនៅប្រទេសស៊ីរីកំពុងផ្ទុះកំហឹងចំពោះអ្វីដែលហាក់ដូចជាបង្ហាញថាជាយុទ្ធនាការបន្ទាន់មួយដើម្បីធ្វើឲ្យប៉ះពាល់ដល់ការជឿទុកចិត្តរបស់ក្រុមភេរវកម្ម។
កងកម្លាំងប្រជាធិបតេយ្យស៊ីរីដែលជាសម្ព័ន្ធមិត្តរបស់សហរដ្ឋអាមេរិកត្រូវបានកោតសរសើរនៅក្នុងបេសកកម្មកម្ចាត់មេដឹកនាំរដ្ឋឥស្លាម Abu Bakr al-Baghdadi ហើយអ្នកនាំពាក្យរដ្ឋឥស្លាម Abu Hassan al-Muhajir កាលពីថ្ងៃចន្ទបាននិយាយថា ក្រុមរបស់ខ្លួនបានធ្វើការវាយឆ្មក់ជាបន្តបន្ទាប់ដើម្បីរំដោះសមាជិកសំខាន់ៗនៃក្រុមរដ្ឋឥស្លាមមិនថាពួកគេទាំងនោះស្លាប់ឬក៏រស់នោះទេ។
លោក Mustafa Bali អ្នកនាំពាក្យកងម្លាំងប្រជាធិបតេយ្យស៊ីរីបានថ្លែងថា «ជ័យជម្នះមួយទៀតក្នុងការវាយឆ្មក់និងចាប់ខ្លួនសមាជិកក្រុមរដ្ឋឥស្លាម។ អ្នកដែលមិនទាន់ស្លាប់ត្រូវបានចាប់ខ្លួន។ ពួកឧក្រិដ្ឋជនភេរវកម្ម Daesh នឹងមិនរួចខ្លួនឡើយ»។
សារនានាអំពីប្រតិបត្តិការប្រឆាំងក្រុមរដ្ឋឥស្លាមត្រូវបានចេញផ្សព្វផ្សាយភ្លាមៗ បន្ទាប់ ពីមន្រ្តីជាន់ខ្ពស់ក្រសួងការបរទេសម្នាក់បានកោតសរសើរដល់កងកម្លាំងប្រជាធិបតេយ្យស៊ីរីថាជាអ្នកដើរតួនាទីយ៉ាងសំខាន់នៅក្នុងប្រតិបត្តិការវាយឆ្មក់របស់សហរដ្ឋអាមេរិកទៅលើទីតាំងរបស់មេដឹកនាំរដ្ឋឥស្លាម Baghdadi ក្នុងតំបន់ Bashira ប្រទេសស៊ីរី ដែលអាចឈានទៅសម្លាប់មេដឹកនាំរូបនេះបាន។
មន្រ្តីរូបនោះក៏បានបញ្ជាក់អំពីការអះអាងរបស់កងកម្លាំងប្រជាធិបតេយ្យស៊ីរីដែលថា កងកម្លាំងរបស់ខ្លួនក៏បានសម្លាប់អ្នកនាំពាក្យម្នាក់របស់ក្រុមរដ្ឋឥស្លាម នៅក្នុងប្រតិបត្តិការដាច់ដោយឡែកមួយកាលពីថ្ងៃអាទិត្យនៅក្នុងក្រុង Jarablus ជិតព្រំដែនរវាងស៊ីរីនិងប្រទេសតួកគី។
ក្រុមមន្រ្តីនៃមន្ទីរបញ្ចកោណបានបដិសេធអំពីការជាប់ទាក់ទងនៅក្នុងការវាយប្រហារដែលបានសម្លាប់មេដឹកនាំទីពីរនៃរដ្ឋឥស្លាម និងការចាប់ខ្លួនមនុស្សទីបី បើទោះបីជាក្រសួងការបរទេសបានប្រកាសថាសហរដ្ឋអាមេរិកមានជាប់ពាក់ព័ន្ធក៏ដោយ។ កាលពីព្រឹកថ្ងៃចន្ទម្សិលមិញ រដ្ឋមន្រ្តីការពារប្រទេសលោក Mark Esper បានកោតសរសើរថាប្រតិបត្តិការវាយឆ្មក់របស់សហរដ្ឋអាមេរិកដែលបានសម្លាប់មេដឹកនាំរដ្ឋឥស្លាម Baghdadiនេះគឺជាការបោសម្អាតក្រុមរដ្ឋឥស្លាមដែលនៅសេសសល់ និងបានសន្យាថា សហរដ្ឋអាមេរិកនឹងបន្តទំនាក់ទំនងយ៉ាងជិតស្និតជាមួយនឹងកងកម្លាំងប្រជាធិបតេយ្យស៊ីរី៕
