កញ្ញា សេង ធារី មេធាវីខ្មែរ-អាមេរិកាំងដែលកំពុងជាប់ពន្ធនាគារនៅព្រៃស រាជធានីភ្នំពេញ បានប្រកាសធ្វើកូដកម្មបង្អត់អាហារចំនួន១០ថ្ងៃ ចាប់ពីថ្ងៃទី៧ ខែធ្នូ ឆ្នាំ២០២៣។ នេះបើយោងតាមសេចក្តីថ្លែងការណ៍មួយរបស់លោក Jared Genser មេធាវីរបស់កញ្ញា សេង ធារី ដែលវីអូអេទទួលបាននៅថ្ងៃសុក្រនេះ។
នេះជាកូដកម្មបង្អត់អាហារលើកទីពីរ ដែលលើកទីមួយធ្វើឡើងកាលពីខែកក្កដា ឆ្នាំនេះ។ ការបង្អត់អាហារក្នុងពន្ធនាគារព្រៃសនេះធ្វើឡើងនៅមុនសវនាការជំនុំជម្រះនៅសាលាឧទ្ធរណ៍ ដែលគ្រោងនឹងធ្វើឡើងនៅសប្តាហ៍ក្រោយ គឺនៅថ្ងៃទី១៣ ខែធ្នូ ឆ្នាំ២០២៣។
បើតាមសេចក្តីថ្លែងការណ៍របស់មេធាវី កូដកម្មបង្អត់អាហារនេះធ្វើឡើងដើម្បីទាមទារសិទ្ធិនៃការអនុវត្តច្បាប់ឱ្យមានភាពយុត្តិធម៌របស់កញ្ញាត្រូវបានគោរពនៅក្នុងដំណើរការនីតិវិធីនៅសាលាឧទ្ធរណ៍ និងដើម្បីអំពាវនាវឱ្យទម្លាក់ចោលការចោទប្រកាន់ទាំងអស់ប្រឆាំងនឹងកញ្ញា និងអ្នកនយោបាយផ្សេងទៀត។
ការបង្អត់អាហារនេះត្រូវបានក្រុមគ្រួសារបង្ហាញក្តីព្រួយបារម្ភខ្លាំងអំពីសុខភាពរបស់កញ្ញា សេង ធារី។ ក្រុមគ្រួសារអំពាវនាវឱ្យមានការទម្លាក់ចោលការចោទប្រកាន់លើកញ្ញា។ នេះបើយោងតាមសេចក្តីថ្លែងការណ៍របស់មេធាវីកញ្ញា សេង ធារី ដែលបានដកស្រង់សម្តីរបស់បងប្រុសកញ្ញា សេង ធារី គឺលោក ម៉ាឌី ធារី។
លោក ម៉ាឌី ធារី បានទទូចឱ្យប្រធានាធិបតីអាមេរិក លោក Joe Biden និងរដ្ឋមន្រ្តីការបរទេស លោក Antony Blinken ថ្លែងជាសាធារណៈភ្លាមៗថាការឃុំឃាំងកញ្ញា សេង ធារី គឺ«មិនត្រឹមត្រូវ ឬខុសច្បាប់»។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ ប្រាប់វីអូអេថាការធ្វើកូដកម្មបង្អត់អាហារនេះជាការអនុវត្តសិទ្ធិរបស់កញ្ញា ដែលសមត្ថកិច្ចមិនអាចរំលោភបំពានបានឡើយ។
លោកបញ្ជាក់ថា៖ «អ៊ីចឹងខាងយើងមានតែត្រៀមខាងគ្រូពេទ្យក៏ដូចជាម្ហូបអាហារដាក់ជូនគាត់ជាប្រចាំ ហើយនឹងតាមដានសុខភាពគាត់ជាប្រចាំ ហើយនឹងនិយាយលួងលោមគាត់ ដើម្បីកុំឱ្យគាត់ធ្វើអីផ្តេសផ្តាសតែប៉ុណ្ណឹងទេ»។
នាយកទទួលបន្ទុកទូទៅនៃអង្គការការពារសិទ្ធិមនុស្ស លោក អំ សំអាត លើកឡើងថាសកម្មភាពរបស់កញ្ញា សេង ធារី កន្លងទៅគឺជាការលើកកម្ពស់ការអនុវត្តសិទ្ធិ និងថាកញ្ញាមិនគួររងការចោទប្រកាន់ធ្ងន់ធ្ងរបែបនេះឡើយ។ អ្នកការពារសិទ្ធិមនុស្សរូបនេះជំរុញឱ្យអាជ្ញាធរទម្លាក់បទចោទលើកញ្ញា សេង ធារី។
លោកបញ្ជាក់ថា៖ «អ៊ីចឹងយើងនៅតែសង្ឃឹមថាសាលាឧទ្ធរណ៍លោកនឹងពិនិត្យហើយពិចារណាលើរឿងកញ្ញា សេង ធារី នេះ ហើយអាចនឹងមានការទម្លាក់ចោល និងដោះលែងកញ្ញា សេង ធារី ឱ្យមានសេរីភាពវិញ»។
កាលពីខែកញ្ញា ឆ្នាំ២០២៣នេះ កញ្ញា សេង ធារី ត្រូវបានបញ្ជូនចេញពីពន្ធនាគារក្នុងខេត្តព្រះវិហារ មកកាន់ពន្ធនាគារព្រៃសនៅរាជធានីភ្នំពេញវិញ តាមការស្នើសុំរបស់មេធាវីកញ្ញា។
កាលពីថ្ងៃទី១៤ ខែមិថុនា ឆ្នាំ២០២២ សាលាដំបូងរាជធានីភ្នំពេញបានសម្រេចផ្តន្ទាទោស កញ្ញា សេង ធារី ដាក់ពន្ធនាគាររយៈពេល៦ឆ្នាំពីបទរួមគំនិតក្បត់ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងនឹងផែនការមាតុភូមិនិវត្តន៍មិនជោគជ័យរបស់លោក សម រង្ស៊ី កាលពីចុងឆ្នាំ ២០១៩។
កាលពីដើមខែមិថុនា លោកនាយករដ្ឋមន្ត្រី ហ៊ុន សែន បានលើកឡើងថាលោកមិនដោះលែង ឬបន្ធូរបន្ថយទោសដល់មេធាវីខ្មែរអាមេរិកាំង កញ្ញា សេង ធារី ឡើយ ដោយសារតែមានអន្តរាគមន៍ពីបរទេស។
នៅពេលមកកម្ពុជា កាលពីខែវិច្ឆិកា ឆ្នាំ២០២២ ប្រធានាធិបតីអាមេរិក លោកJoe Biden ធ្លាប់បានអំពាវនាវឱ្យដោះលែងសកម្មជនដែលត្រូវបានឃុំខ្លួន ក្នុងនោះមានកញ្ញា សេង ធារី ដែរ៕
មេធាវីខ្មែរអាមេរិកាំងកញ្ញា សេង ធារី ធ្វើកូដកម្មបង្អត់អាហារ ដើម្បីទាមទារឱ្យទម្លាក់បទចោទប្រកាន់
ភ្នំពេញ —
