Hello VOA៖ បក្សកាន់អំណាចនឹងបង្ហាញមុខអ្នកដឹកនាំថ្មីៗ ខណៈបក្សប្រឆាំងបន្តរងសម្ពាធ មុនការបោះឆ្នោតជាតិមកដល់
មិនដល់មួយឆ្នាំទេ ការបោះឆ្នោតថ្នាក់ជាតិនៅកម្ពុជា នឹងឈានមកដល់។ លោក សេង សារី អ្នកស្រាវជ្រាវសង្គមកម្ពុជា បានលើកឡើងថា មកដល់ពេលនេះ ភាពអយុត្តិធម៌និងវិសមភាពនៅក្នុងការប្រកួតប្រជែងនយោបាយ កំពុងកើតឡើងខ្លាំង ចំពោះអ្នកនយោបាយថ្មីរបស់ក្រុមគណបក្សប្រឆាំង។ បញ្ហានេះកំពុងបង្កជាហេតុធ្វើឲ្យពួកគេមិនមានឱកាសនៅក្នុងការរៀបចំខ្លួនឲ្យបានល្អ ដើម្បីចូលរួមនៅក្នុងការប្រកួតប្រជែង ស្របពេលការបន្តធ្វើទុក្ខបុកម្នេញកើតមានឡើង។ លោក សេង សារី បានបញ្ជាក់នៅក្នុងកម្មវិធី Hello VOA ថា ស្ថានភាពនយោបាយមិនប្រែប្រួលអ្វីច្រើនទេ ខណៈគណបក្សកាន់អំណាចនៅតែក្តាប់ណែនក្នុងដៃនូវស្ថានភាពនយោបាយបច្ចុប្បន្ន។ លោកក៏បានកត់សម្គាល់ផងដែរថា នៅក្នុងការប្រកួតប្រជែងនយោបាយ ចាប់ពីពេលនេះរហូតដល់ឆ្នាំ ២០២៣ គណបក្សកាន់អំណាចនឹងបន្តបង្ហាញមុខអ្នកដឹកនាំជំនាន់ថ្មីកាន់តែច្រើនរបស់ខ្លួន ដែលមានវ័យក្រោម ៥០ឆ្នាំ ដោយផ្តល់ឱកាសនិងតួនាទីនៅក្នុងការដឹកនាំជាតិ៕ (ខាន់ សុគុំមនោ, Hello VOA, ភ្នំពេញ, ១៧ តុលា ២០២២)
