‘Yan sanda sun tunkari wasu masu zanga zanga da suka bijirewa dokar hana fitar, wacce ta fara aiki a jiya talata da karfe goman dare. Masu zanga zangar sun taru ne a wata mahada da ke yammacin Baltimore, inda zanga zangar ta ranar litinin ta fi muni.
Bayanai sun ce a lokacin da ‘yan sanda suka nemi masu zanga zangar su watse, sai suka fara jifan ‘yan sandan da duwatsu da kwalabe suna kuma yi musu ihu. Wanda sai bayan kusan sa’a guda sannan suka watse daga wuraren da suke.
Hotunan bidiyon gidajen talbijin sun nuna jami’an tsaro na musamman da ke kwantar da tarzoma, suna sintiri akan tituna a cikin motocin sojoji bayan da aka fara dokar. Sai dai a wani bangaren an ga mazaunan birnin na Baltimore sun fito a jiya talata suna share tituna yayin da wasu ke nuna alhinin kone-kone da wawure kayayyakin shagunan da aka yi.
Magajiyar garin, Stephanie Rawlings Blake, ta kwashe mafi yawan lokutan a jiya talata tana ziyartar wuraren da zanga zangar ta shafa.
