‘Yan Sandan Ingila sun kama mutane hudu cikinsu harda dan sanda daya, a abin fallasa nan na satar sauraron zantuttukan mutane a waya, da ake zargin tsohuwar jaridar News of the World, da ta shahara wajen wallafa gulmace-gulmace a Ingila.
Rundunar ‘Yansandan tace an kama mutane uku da safiyar Asabar din nan a gidajensu dake cikin birnin Landan, ko kuma a kewayen birnin.
Jami’in ‘Yan sandan kuma an kamashi bayan ya iso bakin aiki a safiyar yau Asabar.
Mutanen hudu da aka kama shekarunsu na haifuwa ya kama daga 29-56, sun shiga hannu ne kan zargin cin hanci da rashawa. Ba a gurfanar da su a gaban kotu ba tukuna.
‘Yansanda suka ce bayanan da kamfanin tsohuwar jaridar ya bayar su suka taimaka aka kai ga kama mutanen.
