A jamhuriyar Nijar kamar a sauran kasashen AES an gudanar da gangami a yau Talata don jaddada ficewar kasashen 3 daga sahun mambobin ECOWAS duk da wa'adin watanni 6 da taron Abuja na watan Disamban 2024 ya dibar masu.
Dubban mazauna birnin Yamai ne suka yi jerin gwano daga dandalin Place Toumo zuwa Place de la Concertation inda suka gudanar da gangami a wannan Talata 28 ga watan Janairun 2025, da ke matsayin ranar cikar wa’adin watanni 12 na tabbatar da ficewar Nijar daga CEDEAO a hukumance bayan da a wata rana mai kamar ta yau a bara kasar da kawayenta Mali da Burkina Faso suka sanar da yanke shawarar raba gari da kungiyar da suke yi wa kallon ‘yar amshin shatan Faransa.
Mambobin majalissar soja ta CNSP sun hallara a dandalin na Place de la Concertation da zummar karfafawa jama’a guiwa game da juriyar da suke nunawa da kuma fafutukar da suka dage kanta tun bayan juyin mulkin 26 ga watan Yulin 2023 kawo yau.
Kungiyar CEDEAO mai kasashe mambobi 15 na fuskantar baraka bayan da ta yi barazanar amfani da karfin soja don mayar da hambararren shugaban kasar Nijar Mohamed Bazoum kan kujerarsa, lamarin da ya sa Nijar , Mali da Burkina Faso kafa gamayyar Confedration AES kafin su bada sanarwar ballewa kwata-kwata. Dukkan wani matakin sulhu ya ci tura.
Rahotanni sun tabbatar da cewa a jihohin Nijar da ma sauran kasashen na AES an gudanar da irin wannan gangamin a yau Talata.
Saurari cikakken rahoto daga Souley Moumouni Barma:
Dandalin Mu Tattauna