Babban kamfanin nan na sufuri mai suna Uber na gwada wata sabuwar manhaja ta saukakawa matafiya ta yadda za su kira direba daga filin jirgin sama ba tare da fuskantar wata matsala ba.

Kamfanin na Uber ya fara gwajin manhajar kiran direba tun jiya Litinin a filin jirgin sama na kasa da kasa na Portland da ke jihar Origon ta nan Amurka, a cewar wani rahoton TechCrunch.

A baya dai kamfanin ya yi gwajin irin wannan manhajar a wasu manyan hidindimu na raye-raye da kade-kade da kuma wasannin motsa jiki.

Wannan ne karon farko da kamfanin zai gwada wannan manhaja a filin jirgin sama.

Sai dai babu tabbas ko kamfanin na Uber zai samar da irin wannan manhajar a wasu filayen jiragen sama.