Hukumar kare hakkin dan adam ta Najeriya ta samu rahotannin daban-daban kan cin zarafin bil adama a jihar Yobe har guda 265 daga watan Janairu zuwa Nuwamban 2024.
Jami’in dake jagorantar NHRC a jihar yobe, Labaran Babangida, ne ya bayyana hakan yayin bikin zagayowar ranar kare hakkin dan adam ta duniya ta bana a birnin Damataru, fadar gwamnatin jihar Yobe.
“A bana an samu karuwar cin zarafin bil adama a jihar Yobe. hakan ta faru ne sakamakon wayar da kan jama’ar da aka yi da kuma amincewar da al’umma tayi na neman a bi musu hakkinsu idan an ci zarfinsu,” a cewarsa.
“Daga bayanan da muke dasu a halin yanzu, muna da kimanin rahotannin tauye hakki 265 wadanda suka zarta na bara. A duniya baki daya, matsalar durkushewar tattalin arzikin na daga cikin dalilan da suka sabbaba hakan tare da rikicin dake gudana a jihohin Borno da Adamawa da Yobe, dukkaninsu sun bada gudunmawa wajen karuwar cin zarafin.”
Ya kuma bukaci gwamnati da ta jajirce wajen kare hakkokin al’umma domin basu kariya.
Dandalin Mu Tattauna