Shugaban Najeriya Muhammadu Buhari na shirin karbar bakuncin taron shugabannin kasashen da ke yankin tafkin Chadi, taron da zai mayar da hankali kan shawo kan matsalar hare-haren kungiyar Boko Haram.

Za a gudanar da taron kolin ne a ranar 12 ga watan nan na Yuni, a gefen bikin rantsar da shi a wani sabon wa’adi na biyu bayan da ya lashe zabe.

Yayin da suke wata ganawa da shugaba Idris Deby Itno na kasar Chadi a Saudi Arabia, inda shugabannin biyu suka halarci taron kungiyar kasashen Musulmi ta OIC, Buhari ya bayyana cewa, lokaci ya yi da za a shata sabbin hanyoyi tunkarar kungiyar a yankin.

Wata sanarwa dauke da sa hannun kakakin shugaba Buhari, Malam Garba Shehu, ta nuna cewa, yanzu Buhari zai samu karin lokacin tunkarar barazanar kungiyar tun da an kammala zabe.

A tattauwanar da shugabannin biyu suka yi, sun tabo batun yadda yanayi na ruwan sama yake kawo cikas ga ayyukan soji wajen yakar ta’addanci a yankin, lamarin da ya sa suka ce akwai bukatar a bullo da wasu sabbin dabarun tunkarar mayakan.