Wannan ba shi ne karo na farko da a ke yunkurin tsige Mahadi daga kujera ba tun lokacin da ya ki bin gwamna Bello Matawalle su sauya sheka daga PDP zuwa APC mai mulki a tarayya.
Cikin tuhumar da a ke yi wa Mahadi wanda dan Janar Ali Gusau ne ana zarginsa da azurta kansa da kudin gwamnati da rashin sauke nauyin tsarin mulki da aka dora ma sa.
In za a tuna gwamna Matawalle ya tattara dukkan gwamnatin sa ya shigar da ita APC; bayan tun farko kotun koli ta ba su damar cike dukkan kujerun APC a sanadiyyar soke zaben jihar.
A tarihin siyasar Najeriya wannan ba shi ne karo na farko da aka tsige mataimakin gwamna a irin wannan yanayi ba. A baya gwamnatin tsohon gwamnan Bauchi Isa Yuguda ta tsige marigayi tsohon mataimakin gwamnan jihar Garba Gadi bayanda aka sami sabani tsakanin gwamnan da mataimakinsa.
