Kungiyar masu gidajen gasa burodi a jihohin arewacin Najeriya sun gudanar da wani taro a jihar Bauchi domin yin nazari dangane da kalubalen da gidajen gasa burodi ke fuskanta saboda harajin da hukumar kula da abinci da magunguna wato NAFDAC ta dora masu.
Kungiyar ta ce, harajin da hukumar ta umurci masu gidajen gasa burodi su biya ba zai yiwu ba kuma wannan wata hanya ce ta neman raba su da sana’arsu.
Taron na masu gidajen gasa burodi da aka yi, ya sami halarcin shugabannin kungiyoyin na jihohin arewacin Najeriya goma sha tara da kuma birnin tarayya Abuja.
Bayan kammala taron, shugaban masu gidajen gasa burodi na birnin tarayya Abuja, Mr. Dominic Daniel Tumba, ya gana da manema labarai don fayyace matsayin kungiyar.
Shi kuma shugaban kungiyar masu gidajen gasa burodi na jihohin arewa, kuma shugaban kungiyar a jihar Kaduna, Alhaji Bashir Tahir, ya ce gidajen burodi na da alfanu wajen bunkasa tattalin arzikin kasa.
Saurari cikakken rahoton cikin sauti.
Facebook Forum