Masana’antar Kannywood da ke arewacin Najeriya da masoya wasan barkwanci na jimamin mutuwar Kamal S. Aboki wanda ya rasu a ranar Litinin.
Kamal, wanda ya yi fice a fannin wasan barkwanci a shafukan sada zumunta musamman Instagram, ya rasu ne bayan hatsarin mota da ya rutsa da shi.
Mujallar fim, ta ruwaito cewa hatsarin ya auku ne yayin da jarumin yake kan hanyarsa ta komawa Kano daga Maiduguri.
Tuni dai aka mamaye shafukan sada zumunta da ta’aziyyar matashin jarumin, wanda dan asalin Maiduguri ne amma mazaunin Kano.
“Allah ya jikan ka da Rahama @kamal_aboki. Amin.” In ji Ali Nuhu.
Mawaki Salim Smart ya ce, “Allah ya jikan ka Kamal Aboki, ya sa karshen wahalar kenan, ya kyautata makwancin.”
“Inna lillahi Wa’inna ilaihhi Raji’un. Abokina Allah ya jikan ka da Rahama. Allah ya gafarta maka.” Real_adamsdorayi ya rubuta.
