Dan wasan AC Milan Zlatan Ibrahimovic ya zama dan wasan kwallon kafa na uku da ya zura kwallaye 300 a manyan gasa guda biyar da ake bugawa a nahiyar turai.
Hakan na nufin ya bi sahun dan wasan Manchester United Cristiano Ronaldo da dan wasan PSG Lionel Messi wadanda tuni suka shiga wannan rukuni.
Ibrahimovic, wanda dan asalin kasar Sweden ne, ya shiga wannan rukunin ne bayan da ya zura kwallonsa ta 300 a kusan lokacin kammala wasan da suka kara da Udinese a gasar Serie A ta kasar Italiya
Yanzu yana da kwallo 73 a kungiyar ta Milan da 57 a Inter, 23 a Juventus duk a gasar ta Seria A.
Sannan yana da kwallo 113 a PSG da ke gasar Ligue 1 ta Faransa, 18 a Manchester United da ke gasar Premier League ta Ingila 16 a Barcelona da ke gasar La Liga a Sifaniya kamar yadda kamfanin dillancin labarai na AP ya ruwaito.
