Ta yi hakan ne don nuna masu hanyoyin da za su bi don kauce wa cin karo da matsalolin kan hanya a wannan lokaci da yakin Rasha da Ukraine ke haddasa tsaiko wa ayyukan dakon kaya.
La’akari da wahalhalun da ‘yan kasuwar Nijar masu shigo da kaya daga kasashen waje ke fuskanta akan hanya ya sa gwamnatin kasar kafa hukumar Conseil Nigerien des Utilisateurs des Transports CNUT don ba su kariya daga matsalolin da ka iya tasowa.
Ganin yadda har yanzu ‘yan kasuwa da dama ba su da masaniya a game da alakar aikin dake tsakaninsu da CNUT musamman a jihohi ya sa hukumar kaddamar da aiyukan tuntuba da fadakarwa.
Sakataren kungiyar ‘yan kasuwar Import Export Chaibou Tchombiano wanda ya nuna gamsuwa da shawarwarin ya ce ‘yan kasuwa ke samu daga wannan hukuma tun daga lokacin da suka yi lodi akan jiragen ruwa har I zuwa lokacin sauke su a tashohn jiragen ruwa haka kuma daga lokacin fiton kaya zuwa nan gida Nijar sai dai ya bukaci gwamnati ta karawa CNUT din karfi ta yadda za ta gudanar da aiyuka ba tare da fuskantar kowace irin turjiya ba a waje.
Jamhuriyar Nijar dake tsakiyar yankin Sahel na fama da tarin kalubale wajen shigo da kayaki sakamakon rashin tashar jirgin ruwa lamarin da ke shafar sha’anin kasuwanci saboda wahalhalun kan hanya masu nasaba da harkokin dakon kaya dalilin da ya sa hukumomin kasar kulla yarjejeniya da kasashe makwabta dake gabar teku to amma duk da haka har yanzu da sauran rina a kaba, mafarin kafa wannan hukuma ta CNUT kenan don kare hakkokin ‘yan kasuwar kasar a ketare.
Saurari rahoton a sauti:
