Da safiyar yau Lahadi 26 ga watan Disamba ne gobara ta tashi a katafaren kantin saida kayayyaki na NEXT Cash & Carry da ke kan hanyar titin Ahmadu Bello zuwa Kado-kuchi a babban birnin tarayyar Najeriya Abuja.
A yanzu haka dai ma’aikata daga hukumar kashe gobara ta tarayya suna kan kokarin kashe gobarar kuma sun shawarci mazauna yankin da su guji bin wuraren da ma’aikatan ke aikin kashe gobarar a wani mataki na hana yaduwarta, a cewar jami’ar hulda da jama’a ta hukumar Mrs. Ugo Huan, la’akari da wannan lokaci na bukukuwan Kirsimeti ana sa ran mutane su ziyarci wajen don siyayya.
Huan ta ce ma’aikatan kashe gobara daga shiyyoyi dabam-daban, har da hukumar kashe gobara ta babban birnin tarayya Abuja, suna can suna fafatawa a aikin kashe gobarar.‘
Sai dai kawo yanzu ba’a san musabbabin gobarar ba.
