Gwamnan Bauchi Ya Zabi Sabon Mataimaki

Gwamnan jihar Bauchi da ke arewa maso gabashin Najeriya, Muhammad Abubakar, ya zabi shugaban ma’aikatan fadar gwamtinsa, Alhaji Audu Sule Katagum a matsayin sabon mataimakinsa.

Kwamishinan yada labaran jiyar, Alhaji Umar Sade ne ya bayyana hakan a jiya Asabar, kamar yadda jaridar Leadership ta ruwaito a shafinta na yanar gizo.

“Gwamnan ya zabi Audu Sule Katagum a matsayin mataimakin gwamna, bayan tuntubar masu ruwa da tsaki a jihar.” Inji Kwamishinan.

Yanzu haka, jami’in yada labarai a majalisar dokokin jihar ta Bauchi Mr. Lamara Chinade, ya ce an gabatar da sunan Katagum a gaban majalsiar.

Ya ce mai yiwuwa a gayyaci shi a zauren majalisar a mako mai zuwa domin a tantance shi.

Kusan makwanni biyu da suka gabata ne mataimakin gwamnan jihar ta Bauchi, Alhaji Nuhu Gidado, ya yi murabus daga mukaminsa.