Washington D.C. —
Sabon Kakakin Majalisar Wakilan Najeriya Tajudeen Abbas, ya ce, ba za su zama ‘yan amshin shata ba yayin wa’adin mulkinsu.
Ya bayyana hakan ne ga manema labarai a Abuja bayan wata ganawa da ya yi da Shugaba Bola Ahmed Tinubu a ofishinsa.
An zabi Abbas a matsayin shugaban majalisar ta wakilai bayan da ya samu gagarumar nasara a ranar Talata.
A lokuta da dama, akan zargi ‘yan majalisar dokoki da zama ‘yan amshin shatar bangaren zartarwa, zargin da sukan musanta.
A cewar Abbas, za su dukufa wajen samar da tsare-tsare da za su ciyar da kasa gaba tare da hadin kan bangaren zartarwa.
Wannan majalisa da aka kaddamar ita ce ta goma.
