Refugees

Ngesikhathi kunanzwa ilanga leziphepheli emhlabeni jikelele, eleWorld Refugee Day, eleBotswana lithi lizaqhubekela phambili liqinisa imithetho yokungaphi mahlayana abadinga ubuphepheli kulelozwe ngoba lisithi inengi alilazizatho eziqinileyo.

Inani labeZimbabwe abayiziphepheli kwele Botswana selehle okumangalisayo eminyakeni emithathu edluleyo.

Umphathintambo obona ngezomthetho kwele Botswana, uMnu. Ronald Shamukuni, ekhuluma ngesikhathi sokunanzwa kosuku lweziphepheli ngoMvulo, uthe sekungena noma ngubani kwele Botswana esodinga ubuphepheli.

Uthe noma ilizwe lakhe lichothozwa ukuthi alifuni ukunikeza inengi ubuphepheli, lizaqhubeka ngokuqinisa imthetho.

“Asingeke sithathe wonke umuntu. Kulabanye abatshiya ukuba yiziphepheli kwamanye amazwe begijimela kithi.”

UShamukani uthe kumele amazwe wonke aphathisane ukugcina iziphepheli hatshi ukuthi kusinde ilizwe lakhe kuphela.

Amazwi akhe aza ngesikhathi iziphepheli ezifika ikhulu ezidabuka kwele Democratic Republic of Congo zabaleka enkambeni yeTongogara Refugee Camp eZimbabwe, zachaphela kwele Botswana. Abe DRC laba, babekhala ngendlala, kodwa iBotswana ilokhe ingakabananzi njengeziphepheli.

Kusenjalo, sekusele iziphepheli ezinlutshwane kakhulu ezidabuka eZimbabwe enkambeni yeDukwi Refugee Camp ngaphandle kwedolobho leFrancistown. Lokhu kulandela isinqumo sikahulumende weBotswana ukwehlisa kakhulu inani leziphepheli eminyakeni emthathu endluleyo.

Abanye abeZimbabwe basanda kwalelwa isicelo ababesikhweze emthathwendaba waphezulu sokuthi bengabuyiselwa ekhaya ngoba bezabhekana lobunzima.

Omunye owayeyisiphepheli okhulume leStudio 7, ongafisanga ukuqanjwa ngegama, uthi impilo isinzima ngoba usephila ngokuvikana labomthetho.

“Udaba lwethu lwalahlwa emthethwandaba ngoba saphuza ukuhambisa amaphepha. Siphila kanzima ngoba lenhlanganiso yeUN seyasilahla. Akulamuntu osincedisayo.”

Uthi okunzima yikuthi angeke babuyele ekhaya ngesikhathi udlakela seluqala ukuqonga ngoba bona babeleka eZimbabwe ngenxa yezombusazwe.

“Lapha sesiphila njengama illegal immigrants. Wonke umuntu uyabona ukuthi ekhaya sekusibanzima, abantu bayanyamalala. Isimo esikiso sinzima. Asiyenelisi ukuhamba, asisebenzi labantwana sebebulawa yindlala.”

EleBotswana libuyisele phose iziphepheli eziyinkulungwane ezidabuka eZimbabwe kusukela ngomnyaka ka2019.

Abanye babuyela bekhonona bekhala ngokuthi isimo asiqondanga ukuthi babuyiselwe, kukanti abanye sebephendukile elizweni bephila okungekho emthethweni.

Inengi leziphepheli lalibaleke eZimbabwe ngomnyaka ka 2008 lapho okwaba lokhetho lokudinga umongameli olwalulodlakela olumangalisayo.