Ibandla lama Republicans izolo lizame ukuvimba impumela yokhetho eMichigan okunqobe khona uMnu. Joseph Biden kwathi ngesikhathi esifanayo uMongameli Donald Trump waxotsha obekhangele ngezokuvikela ukhetho obekuhlangothi olweCybersecurity.

Abantu ababili abakubandla lama Republicans abaphakathi kwequla leWayne County Board of Canvassers eMichigan bathe ukhetho aluqhutshwanga ngemfanelo endaweni lapho uBiden anqobe khona ngamavoti amanengi lobanje amavoti obekuthiwa awakhanyi kahle ephansi kwamakhulu amane – 367.

Kuthe kusihlwa bavuma ukuba uBiden unqobile kulandela ukukhala kwabantu elizweni lonke ngemizamo yama Republicans ukuba baguqule impumela yokhetho ukwenzela ukuthi uTrump anqobe uBiden.

Kusenjalo, uTrump uxotshe kuhlangothi lweCybesecurity, uMnu. Chris Krebs, owethule umbiko othi ukhetho lweMelika lwenziwa ngemfanelo.

UKrebs uthi kungamanga aluhlaza tshoko okukhulunywa nguTrump othi ukhetho kalwenziwanga kahle.

Okwethulwe nguKrebs kusekelwa ngabantu abafika phose amatshumi ayisithupha abakunhlanganiso ezitshiyeneyo abathi ukhetho lwenziwa ngemfanelo. Abaqhuba ukhetho ezabelweni ezitshiyeneyo, abakubandla lama Democrats labanye abasekela ibandla lika Trump bathi kuyamangalisa okwenziwe ngumongameli ofuna ukunqoba ngendlela ezingaqondakaliyo.

Abalandela ukhetho lolu abagoqela uNkosikazi Lucia Dube, bathi kuyamangalisa okwenzakala eMelika.

UNkosikazi Dube uthi eleMelika kumele lilungise ezokhetho ngoba yilo elithenjwe ngamazwe wonke kwezombuso obalulekileyo.

Lokhu kusekelwa nguMnu, Kuthula Matshazi, ingcwethi ezimeleyo, othi kuyamethusa lokuthi uTrump waxotsha uMark Esper, owayephethe uhlangothi lwezomvikela ePentagon.

Kulabantu abathi okwenzakala eMelika kululazi ilizwe leli. Omunye wabalombono lo nguMnu.

Abacubungula ezimbangazwe bathi uTrump uzama ukuqambula amaElectoral Votes ukuze abavotela umongameli bangakhethi uBiden okusobala ukuba wanqoba kukhetho lukamongameli.

Okwamanje uBiden ulamaElectoral Votes afika phose amakhulu amathathu – 290 kuthi uTrump ulangamakhulu amabili lamatshumi amathathu lambili – 232. Umongameli ungena esikhundleni nxa elama Electoral Votes angamakhulu amabili lamatshumi ayisikhombisa – 270.

UNkosazana Emily Murphy, okuhlangothi olubona ngokutshiyeneyo kuhulumende weMelika olweGovernment Services Administration, uvimba uBiden ukuba alungiselele ukugcotshwa ukuba ngumongameli okuzakwenziwa mhlaka 20 ngoZibandlela ngomnyaka ozayo.

Ngesikhathi umongameli Donald Trump weMelika esenqaba ukuthi wanqotshwa kukhetho olwedluleyo, okhangelelwe ukuba ngumongameli uMnu. Joe Biden owebandla lamaDemocrats uthi ukwala kukaTrump ukuthi beqhubelane kuhle intambo zombuso kungabuyisela emuva inhlelo zokulwisana leegcikwane leCOVID 19.

Igcikwane leCOVID 19 selimemetheka ngamandla kweleMelika ngesikhathi abalungisa umuthi wokulwisana lalo besithi sebesemaphethelweni aloluhlelo, njalo bengaqeda ngenyanga ezayo.

Lokhu kwenzakala abasekeli bakamongameli Trump bemxhasa kumkhankaso wakhe wokuthi amavoti abalwe kutsha , kodwa amanye amalunga ebandla lakhe esithi kavume ukuthi unqotshiwe.

Ukuze sihlaziye ukuthi kambe kungawela ngaphi induku loxakuxaku, sixoxe lengcwethi ecubungula ezombusazwe njalo engumkhokheli webandla leZimbabwe Communist party uMnu. Ngqabutho Sibanda.

UMnu. Sibanda ugcizelela ukuthi njengebandla lamaKomanisi, kakho umkhokheli abamsekelayo kweleMelika ngoba kulilizwe elikhahlameza amanye, elama imperialists, okuyikho abalwisana lakho.

Embed share

Ingxoxo loMnu. Ngqabutho Mabhena

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:19 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Kulabanye abakubandla lama Republicans abathi uMongameli Donald Trump kumele avume ukuthi unqotshwe kukhetho olusanda kwenziwa ngowayengumsekeli kamongameli, uMnu. Joseph Biden.

Abanye abakubandla lama Republicans abagoqela owayengumcebisi wezomvikela, uMnu. John Bolton, bathi sesifikile isikhathi sokuthi UBiden alungiselele ukungena esikhundleni sikamongameli.

Kodwa uTrump, okewavuma enkundleni yokuxhumana eyeTwitter ukuthi unqotshwe nguBiden waphinda wakwala lokhu komunye umbiko awuthumeze enkundleni efanayo, uthi ukhetho lukamongameli aluqhutshwanga ngemfanelo.

Abantu abanengi kakhulu kwele Melika kanye leziphathamandla zohlangothi lukahulumende olubona ngendaba zekhaya bathi ukhetho lolu lwaqhutshwa kahle. Esabelweni seGeorgia, lapho uTrump athi ukhetho kalwenziwanga ngemfanelo, sebeqalile ukubala kutsha amavoti.

Umabhalane omkhulu wesabelo lesi, uMnu. Brad Raffensperger, uthi lokhu kwenzelwa ukuthi umuntu wonke asuthiseke ngokhetho lolu.

UTrump wethule omunye umbiko enkundleni yeTwitter emadabukakusa namuhla esithi wanqoba kukhetho lolu. Abakubandla lama Democrats bathi uyazikhulumela umongameli obhuqwe nguBiden kukhetho lolu.

Isizalwane seZimbabwe, uMnu. Simayedwa Ndlovu, uthi kuyethusa okwenzakala eMelika.

Kulabanye abathi uTrump wesaba ukuthi uzabonakala njengomuntu owehluleke ukubusa nxa engavuma ukuthi unqotshiwe kukhetho lukamongameli. UMnu. Sikhumbuzo Moyo ngomunye wabalombono lo.

Olandela ezombangazwe, uMnu. Sikhumbuzo Mlalazi, uthi uTrump ususwe esikhundleni ngenxa yokuthi kulabantu abanengi abakhangwe ngabakubandla lama Democrats ukuba bavote ngobunengi babo lobanje uTrump ubemela iqiniso.

Embed share

UTrump Lokhu Esithi Unqobe uBiden Kukhetho Lukamongameli

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:04:27 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

UBiden okwamanje ulama Electoral aVotes afika phose amakhulu amathathu – 290 kuthi uTrump ulangamakhulu amabili lamatshumi amathathu lambili- 232. Onqoba kukhetho lweMelika kumele athole amaElectoral Votes angamakhulu amabili lamatshumi ayisikhombisa – 270.