Ukhetho LweMelika 2020
UMongameli weMelika Ungena ngeCollege Electoral Vote Hatshi ngePopular Vote
Izigidi lezigidi zabantu beMelika lamhanje zikundwendwe zokuvota kukhetho lokusekela uMongameli Donald Trump webandla lamaRepublicans ukuthi aqhubeke esembusweni kumbe njalo ukuthi adedele kuMnu. Joe Biden ancintisana laye kulolukhetho lwalonyaka owebandla lamaDemocrats.
U-Biden usungule ilanga lakhe lokuvota ngokuya enkonzweni yamaKatolike esigabeni seDelaware. Abomkhankaso wakhe babika ukuba uzaphinda avakatshele emadolobheni amabili awesigabeni sePennsylvania andubana aphindele eDelaware lapho azakhulumisana labasekeli bakhe ntambama.
Umongameli Trump usungule ilanga lakhe lokuvota ngokukhuluma kuhlelo lukamabonakude olwe “Fox & Friends”, esithi uzazitsho ukuba usenqobile nxa esenqobile. Uzaphinda ayethekelele isigodlo sakhe lapho obekuqhutshelwa umkhankaso wokhetho esiphandle kwedolobho leWashington DC, andubana aphindele esigodlwenis akhe eseWhite House.
Emkhankasweni ngaphambilini kokhetho bekuphoselanwa aqhatha omunye lomunye esethesa omunye wakhe umlandu wokungabi lesithunzi eseneleyo sokukhokhela leli lizwe.
Abantu asebevotile ngaphambilini kosuku olwabekwayo lokuvota elikamhla ka 3 Lwezi, sebeyizigidi phose ezilukhulu-99 million emizameni yokuvimba ukuthelelanwa kweCovid 19, okulinani elikhulu kuqhathaniswa labavotayo ngomnyaka ka2016.
Okumangalisayo ngokhetho lweMelika yikuthi lanxa kunqoba othola amavoti amanengi ukwedlula abanye kukhetho lokudinga amalunga edale lephalamende eleCongress, oMeya bamadolobho labosibalukjhulu, onqoba kolokudinga umongameli akudingeki ukuthi athole amanengi kodwa kumele athole abayithi yiCollege Electoral Vote.
Isizatho esenza abancintisa kukhetho lokudinga umongameli bakhankase kakhulu kwezinye izigaba ukwedlula ezinye yikuthi yizo ezilamacollege electoral votes amanengi. Lezo zigaba yizo eziphiwa igama lokuthi ngama battleground states, ezinjenge Arizona, Georgia, Florida, Iowa, Michigan, Minnesota, Nevada, New Hampshire, North Carolina, Ohio, Pennsylvania, Texas, leWisconsin.
Kudingeka ukuthi onqobayo ukuze angene esigodlweni sikamongameli weMelika eseWhite House, kumele athole amacollege electoral votes angaba ngamakhulu amabili lamatshumi ayisikhombisa-270, phakathi kwengamakhulu edlula amahlanu aselizweni-538.
Ozatholake ukuthi ezinye izigaba zilamacollege electoral votes amanengi ukwedlula amanye ayiwo anikwa igama lokuthi ngama.
- Gibbs Dube
Bayavota Abantu eMelika Kukhetho Oluqakathekileyo
Abantu kwele Melika bayavota namuhla kukhetho lukamongameli, olwamanye amalunga edale leSenate lele House of Representatives, iziphathamandla zamapholisa lezemadolobheni atshiyeneyo.
Banengi abantu abavota kukhetho lolu okungqikilana uMongameli Donald Trump lowayengumsekeli kamongameli, uMnu. Joe Biden.
Sokulabantu abedlula izigidi ezilikhulu – 100 million asebevote kukhetho lolu besebenzisa iposo lendawo zokuvotelwa. Okwamanje luqhubekela phambili ukhetho lapha eMaryland.
UMnu. Eric Luedtke, umkhokheli weHouse of Delegates eMaryland obephandle kweyinye indawo yokuvotela eMontgomery County, uthi abantu bayavote okumangalisayo.
“Kulabantu abanengi abavotayo. Ngilapha ukuthi ngincendise abanye abangene kukhetho lolu. Kuhle kakhulu ukubona abantu bevota kukhetho lolu.”
Omele ibandla lama Republicans, obekhankasa endaweni le, uMnu. Joseph Gillen, uthi kuhle ukuthi abantu bayavota kodwa akumelanga batshayana.
“Kuqakathekile ukuthi abantu bavote njalo lokuthi basekele abakufunayo. Abantu bayatshiyana imibono yabo. Kumele sivume nxa singanqotshwa. Kuqakathekile lokhu.”
Omunye wabavote kukhetho lolu nguNkosikazi Priscilla Ndlovu, odabuka kwele Zimbabwe ohlala eSeattle, eWashington. UNkosikazi Ndlovu, osekela ibandla lama Democrats, uthi banengi abantu abavota kukhetho lolu.
Omunye njalo odabuka eZimbabwe, uMnu. Mark Tshuma, uthi kuqakatheke kakhulu ukuthi abantu bavote kukhetho lweMelika.
Kulabanye abantu abathi kungaba lodlakela sokwenziwe ukhetho lolu.
Ukhuluma Ngokhetho LweMelika
UNkosikazi Priscilla Ndlovu, odabuka eZimbabwe ohlala eWashington, ukhuluma ngokhetho lweMelika. #VOAElections2020 #elections #usa #joebiden #donaldtrump
Ukhuluma Ngokhetho LweMelika
Isizalwane seZimbabwe sikhuluma ngokhetho lweMelika olwenziwa ngoLwesibili. #VOAElections2020 #elections #usa #joebiden #donaldtrump