Inhlolisiso esanda kwenziwa yinhlanganiso ebona ngezokulondolozwa kwezikwelede zelizwe eye Zimbabwe Coalition on Debt and Development - ZIMCODD, iveza ukuba indlela esetshenziswa yilizwe ekuhlawuliseni abantu imithelo, ingaqondanga ngoba abayanga kuyibo abahlawula imithelo ephezulu, abalemali labamankampani bevikelwa emithelweni eminengi.
Emhlanganweni lentathelizindaba,wokuziphathisa ukuba zizwisise ngokugcweleyo udaba lokubuthaniswa kwemali zelizwe, owenzelwe eAmbassador Hotel, abe ZIMCODD bathi lesi simo sibangelwa yikuba ilizwe lokhe lisebenzisa imithetho yakudala engahambelani lesikhathi esesiphila kiso kanye lesisekelo sombuso esikhona.
Isiphathamandla esibona ngokuqutshwa kwenhlelo zale inhlanganiso, umnumzana Rangarirayi Chikova utshele lumhlangano ukuba lesi simo sidalela inhlupho uzulu oswelayo okwenza aqhubeke esiba ngumyanga ndamandla.
Omunye wamalunga eboard yeZIMCODD, oyingcwethi ecubungula ezenotho lezombusazwe, umnumzana Masimba Kuchera laye ugcizilele lumbono.
Kumele iguqulwe imithetho esetshenziswa ukuhlawulisa abantu lamankampani imithelo, kuveza uKuchera.
Linhlolisiso iveze njalo ukuba kuqakathekile ukuthi iguqulwe indlela yokuhlawuliswa kwemithelo ukuze abantu bafakwe ezigabeni ezehlukeneyo kusiya ngeholo lenzuzo abayitholayo.
