Abantu abanengi, abagoqela izisebenzi zikahulumende, bathi babhekane lendlala emaphandleni lemadolobheni ngenxa yesimo esibi somnotho lokuswelakala kwezulu lonyaka langomnyaka ophelileyo.
Bacela inhlanganiso ezizimele zodwa ukuthi zibanike ukudla njalo bakhala ngokuthi kukhanya engani abathola ukudla kunikwa abantu abasekela ibandla leZanu PF kuphela.
Omunye wabakhala ngendlala nguMnu. Jabulani Nkatha ohlala Esiphezini esabelweni seMatabeleland South othi indlala ibhakile esiqintini lesi.
Omunye njalo okhala ngendlala nguMnu. Chazani Mpofu ohlala ePlumtree othi abantu sebetshontsha ukwenzela ukuthenga ukudla.
UMnu. Malaki Nkomo, owakewamela indawo yeInsiza South edale lephalamende ekubandla leZanu PF, uthi uhulumende uyazama ukuphandela uzulu ukudla.
UNkomo uthi kungamanga ukuthi abanye abantu bayabandlululwa nxa kuphiwa uzulu ukudla nguhulumende.
Inhlanganiso yeUnited Nations ithi kulabantu abedlula izigidi ezinhlanu - 5.5 million ababhekane lendlala emaphandleni njalo kulabedlula izigidi ezimbili - 2.2 million abalambayo emadolobheni.
Inhlanganiso le ithi okunye okudala indlala le ngumbuso ongaqondakaliyo eZimbabwe.
