Amabandla ezombusazwe agoqela iZanu PF amacele eMDC akhokhelwa nguMnu. Morgan Tsvangirai loProfessor Welshman Ncube abikwa ekhulumisana ngokulungisa isisekelo sombuso welizwe lokunye okuhluphayo elizweni.
IZanu PF isiphike yemba phansi ngalezi nkulumo loba nje kusobala ukuthi kukhona okutshaya amanzi.
Inkokheli yeZanu PF iyaphika ukuthi kulenkulumo ezenziwayo phakathi kwamabandla wonke ezombusazwe lobanje amacele amabili aweMDC ekuveze sobala ukuthi baxoxisana ngokuthile.
Isikhulumeli seZanu PF, uMnu. Simon Khaya Moyo, uthi akula nkulumo ezinjalo.
Kodwa isikhulumeli seMDC-T, uMnu. Obert Gutu, uthi kuyaxoxiswana leZanu PF ngokulungisa imithetho okumele ihambelane lesisekelo sombuso welizwe lekhangelane lokhetho.
Lokhu kugcizelelwe nguProfessor Welshman Ncube umkhokheli welinye icele leMDC, othi kodwa inkulumo lezi kayisizo zokubumba uhulumende womanyano.
Uthi kungeke kwenzakale ukuthi kube lomunye uhulumende womanyano eZimbabwe ogoqela ibandla lakhe.
Isikhulumeli sePeople’s Democratic Party, uMnu. George Mkhwananzi, uthi ibandla lakhe akumelanga litshiywe phandle kwenkulumo lezi.
Ingcwethi kwezombusazwe ezigoqela uMnu. Dumisani Nkomo zithi kumele inkulumo lezi zikhangele ukuvuselela umnotho welizwe hatshi ukubusa ilizwe nje.
Uzulu usedladlazela ngokuzwa ngenkulumo lezi kulandela uhulumende womanyano owaphela ngo2013 kulandela ukhetho oluqhutshwe ngalowo mnyaka eZimbabwe.
